Сандал сааһы көрсө, үөрүүлээх түгэннэр буолуталаан, күн-дьыл сылыйан, дьиэтээҕи түбүгү быраҕан туран, ыраахтан-чугастан хайыы үйэ үгэскэ кубулуйбут күрэххэ улууспут киинигэр буоларынан дьон кэлиитэ, кыттыыта да быйыл үчүгэй буолла. Быйылгы күрэҕи, Покровскай к. мэра П.П.Гермогенов, улуус булт тэрилтэтин салайааччыта Н.И.Гоголев, айылҕа харыстабылын салайааччыта А.Д.Павлов, спорт уонна физическэй култуура салайааччытын солбуйааччы Р.Д.Протодьяконов сүрүннээн-дьаһайан ыыттылар. Тэрээһин аҕалар уонна булчуттар күннэрин көрсө буолбутун чорботон бэлиэтиэҕи баҕарыллар. Хаҥалас улууһун булчуттарын уопсастыбаларын бэрэссэдээтэлэ, Николай Иннокентьевич Гоголев күрэхтэһии туһунан бу курдук эттэ: - Бүгүҥҥү улуус булчуттарын 10 көрүҥнээх күрэхтэһиитигэр уопсайа тоҕус хамаанда кыттыыны ыла сылдьар. Быйыл Покровскай к. туспа хамаанда тэриммитэ үөрүүлээх суол. Бу иннинээҕи булчут күрэҕэ иллэрээ сыл Нөмүгүгэ буолбута. Улууспут киинигэр Покровскайга дьону-сэргэни түмээри манна ыыттыбыт. Күрэхтэһиибит «Орто Дойду» этнокомплекс сиригэр, балаһыанньа быһыытынан истиэндэбэй ытыыттан уонна сүнньүөҕүнэн ытыынан саҕаламмыта. Биһиги бу күрэхтэһиибитин өрөспүүбүлүкэ күрэхтэһиитигэр кыттарга сүүмэрдээһин курдук ыыттыбыт, - диэтэ Николай Иннокентьевич.
Сарсыардаттан Орто дойду сиригэр – уотугар кыраҕы харахтаахтар, бэргэн ытааччылар күрэхтэһиини саҕалаатылар. Онтон салгыы, күүрээннээх күрэхтэһии түһүмэхтэрэ, бириэмэҕэ ойбон алларыыта, салгыы мас хайытан оллоон туруоран, кутаа оттон чэй өрүүтэ, МЦ 21-12 сааны ыһыы-хомуйуу курдук булчуту тургутар көрүҥнэр ыытыллан истилэр. Маны сэргэ, булт тиэмэтигэр мындыр өйдөөхтөр викторинаҕа кытыннылар. Хаҥалас улууһугар айылҕа харыстабылын ыстаарсай инспиэктэрэ, Виктор Прокопьевич Михайлов тулалыыр эйгэҕэ сыһыаран булчуттарга баҕа санаатын тириэртэ: - Быйыл Россия үрдүнэн Экология сыла, онон бу күрэхтэһиибитин айылҕаны харыстыырга аныыбыт. Бука бары булчуттары, айылҕаҕа тыаҕа сырыттахтарына булчут сиэрин тутуһан, бэрээдэктээх буоларга ыҥырабын. Өбүгэлэрбит үтүө үгэстэрин өрүү өйдүү-саныы сырыттыннар, тыыннаах айылҕаҕа харыстабыллаахтык сыһыаннастыннар!,- диэн баҕа санаатын кылгастык тиэртэ.
Дьэ, ол кэннэ быһаарыылаах түһүмэххэ, аҕыс араас мэһэйдэрдээх эстафетаҕа булчуттар толору маллаах-саллаах, бултаабыт бултара хааламмыт үрүксээктэрин, сааларын сүкпүтүнэн100 м хаарынан сүүрэн быыппаһыннылар, хайыһарынан сырыстылар, үрдүк сыырдары дабайдылар, харгыстары аастылар, үрэҕи ханаатынан туораатылар, дулҕалаах сиринэн сүүрдүлэр. II Дьөппөн булчуттарын хамаандатын хапытаана, Александр Иванович Алексеев хамаандатын кыттыытын бу курдук билиһиннэрдэ: - Биһиги нэһилиэк хамаандата иллэрээ сыл булчут күрэҕэр кыайбыт буоламмыт, эрэллээхтик кубокпытын көмүскүү сылдьабыт. Билиҥҥи туругунан көрүҥнэринэн көрдөххө, үчүгэйдик кытта сылдьабыт. Ол курдук, үс бастакы, биир үһүс, биир төрдүс миэстэлэрдээхпит. Түмүктүүр түһүмэххэ, эстафетаҕа үчүгэйдик кытыннахпытына бастыырга эрэл баар. Бука бары булчуттарга өрүү байанайдаах буолуҥ! диэн баҕа санаабын тиэрдэбин - диир эдэр, эрчимнээх хапытаан Александр Алексеев.
Дьэ, бу курдук булчуттар күрэхтэһэн илин-кэлин түсүһэн, үөрдүлэр-көттүлэр. Бу да сырыыга Александр Алексеев хапытааннаах II Дьөппөн булчуттарын хамаандата иккис төгүлүн эрэллээхтик бастаата, кубогы илдьэ хаалла. Иккис бириистээх миэстэҕэ Ыксаллаах быһыы-майгы Хаҥаластааҕы салаатын үлэһиттэрэ (бэрэстэбиитэл А.П.Егоров) үһүс бочуоттаах миэстэҕэ «Эркээни» хамаанда (хапытаан К.К.Острелин) таҕыста. Миэстэлэспит хамаандалар уонна биирдиилээн дьон сыаналаах бириистэринэн, мэдээллэринэн, кырааматанан наҕараадаланнылар. Манна улууспут баһылыга Г.Ю.Алексеев, Покровскай к. мэра П.П.Гермогенов тус бэйэлэринэн улахан көмөнү оҥордулар. Сүрүн бириистэри «Якутцемент» ААУо ген. Дириэктэрэ А.З.Мамедов, «Сокол» ХЭТ ген.дириэктэрэ Р.С.Еремеев, «Нөмүгүтээҕи килиэп собуота» ген.дириэктэрэ А.А.Нестеров туруордулар. Күрэх көрүҥнэрэ, сиэрдээх булчут айылҕаны харыстыырыгар, сиэри-туому тутуһарыгар, инникитин көрөн сөбүгэр бултууругар кынаттыыр. Айылҕабыт барахсан кыыла-сүөлэ, туруга хас биирдии бэйэбититтэн тутулуктааҕын умнумуоҕуҥ! Баай хара тыа иччитэ, Байанай тойон эһэккэ үрдүк сотолооҕуттан, түөрэҥ туйахтааҕыттан, көтөр кынаттааҕыттан, маанылаах булдуттан өрүү күндүлүү турдун!
Уйбаан УЙГУУРАП,
ааптар хаартыскаҕа түһэриитэ.
