Бүлүү, Горнай, Хаҥалас, Нам, Мэҥэ Хаҥалас, Кэбээйи улуустарыттан уонна Дьокуускай куорат, ол иһигэр 14 нэһилиэктэн, 95 оскуола үөрэнээччилэрэ саастарынан үс бөлөххө араарыллан "Дохсун" кубогар остуол тенниһигэр күрэхтэстилэр. Айан суола мөлтөҕүнэн, өрүһү туорааһыҥҥа күчүмэҕэйдэр баалларынан, сорох улуустар кыайан кыттыбатылар. Күрэхтэһиини оҕо спордун уонна спортивнай бэлэмнэнии управлениетын тренерэ, оҕолорго остуол тенниһигэр республика сүрүн тренерэ Аркадий Никифорович Иванов үүннээн-тэһииннээн тэрийэн-салайан ыытта.
Оонньуулар "Дохсун" спорткомплекс иккис этээһигэр баар кэҥэс теннис саалатыгар кэккэлэччи туруоруллубут алта остуолларынан икки күн устата буоллулар. Күрэхтэһии сүрүн сыала-соруга: эһиил Дьокуускайга ыытыллар "Азия оҕолоро" норуоттар икки ардыларынааҕы спортивнай оонньууларга, итиэннэ Россия чемпионатыгар бэлэмнэнии, күүһү көрүнүү.
Туруоруллубут сыал-сорук ситиһилиннэ. Кыра саастаах уолаттар оонньуур таһымнара үрдээбитэ көһүннэ. Хамсанан-имсэнэн, сүрдээх сылбырҕатык, техникалаахтык теннистиир оҕолор бааллар. Сүрүн тренер Аркадий Иванов этэринэн, топ-спинг уҥа да, хаҥас да өттүлэринэн биир-кэм эп-элэҥнэс кыракый мээчиктэринэн ыарахан, уустук ылыылары-биэриилэри оҥортууллар. Киһи көрдөр-көрө туруох кыраһыабайдык киирсэллэр. Талбааран тэпсэҥнии, күүтүһэ турбаттар, эрийэн-охсон куһурҕатыһан иһэллэр. Күүстээх охсуулардаах атаака, ону ылыылар, утары саайыы, эриэхимэйдик эриллэн кэлбит мээчиги төттөрү утаарыы остуол тенниһин оонньуутун тупсараллар, киэргэтэллэр. Оҕолор үүнэн-сайдан, бу бэртээхэй спорт көрүҥүн баһылаан иһэллэрэ харахха быраҕыллар. Кытайга тиийэн эрчиллибит оҕолор бааллар, аны да бараары сылдьаллар. Республика спорка министиэристибэтэ Хэйлунцзян провинициятын спорка управлениетын кытта бииргэ үлэлээһиҥҥэ илии баттаспыт дуогабар сүнньүнэн үлэ күүскэ барар. Тренердэр, спортсменнар икки өттүттэн хардарыта сылдьыһыыларыгар лаппа сэргэхсийии баар буолла. Ааспыт сыллары кытта тэҥнээтэххэ, үп-ас да үгүөрү көрүллэр. Ордук "Азия оҕолоругар" оонньуохтаах саастаах оҕолор оонньуур кылаастара, таһымнара үрдээн иһэриттэн киһи үөрэр-астынар. Дальнай Востокка оҕолор саастарынан үс бөлөххө үһүөннэригэр оонньуур буоллулар. Ити биллэн турар, хамсааһыны, сайдыыны эрэ аҕалар. Итиэннэ Дальнай Восток күрэхтэһиилэригэр теннисист оҕолорбут кыайталыыр буоллулар. Ити эмиэ хамсааһын тахсан эрэрин көстүүтэ. Быйыл Россия финалыгар икки оҕобут – Богдан Капитонов уонна Лыппахова Катя – тиийэн күрэхтэһэн, ааспыты кытта тэҥнээтэххэ, үчүгэй түмүктээхтик күрэхтэһэн кэллилэр.
Бу алтынньы ый 29 Хэйлунцзян киин куоратыгар Харбиҥҥа эрчиллэр-үөрэтэр түмсүүгэ оҕолор барыахтара.
Оҕолорбут улахан дьону кытта тэҥҥэ кэриэтэ күрэхтэһэр кыахтанан эрэллэр.
"Дохсун" Кубогын кыайыылаахтарынан буоллулар уонна миэстэҕэ тигистилэр:
2004 с.т. кыра саастаахтарга уолаттарга 1м. Иванов Женя – Үөһээ Бүлүү, Нам (тр.Васильев Василий Дмитриевич), 2м. Сергеев Саша Үөһээ Бүлүү, Нам с. (тр.Васильев Василий Дмитриевич), 3м. Винокуров Дима, Дьокуускай, Хатас с. (тр Иванов Аркадий Никифорович); кыргыттарга 1м. Осипова Динара – Бүлүү к. (тр.Осипов Александр Семенович), 2м. Артамонова Вика, Хаҥалас, Улахан Аан (тр.Яковлев Александр Никифорович), 3м. Буслаева Айта, Дьокуускай, Хатас с. (тр.Иванов Аркадий Никифорович);
2001-2003 сс.т. уолаттарга 1м. Федоров Максим – Мэҥэ Хаҥалас, Чүүйэ с. (тр.Ларионов Яков Романович), 2м. Ильин Олег - Дьокуускай к. (тр.Слепцов Артур Арсентьевич), 3м. Кривошапкин Сандаар - Хаҥалас, Ой с. (тр.Гермогенов Альберт Петрович), кыргыттарга 1м. Котковец Аня - Кэбээйи, Сангаар б. (тр.Мосин Николай Иванович), 2м. Федорова Аина Мэҥэ Хаҥалас, Чүүйэ с. (тр.Ларионов Яков Романович), 3м. Захарова Аина - Хаҥалас, 2-ис Жемкон (тр.Исаков Петр Романович);
1998-2000 сс.т. уолаттарга 1м. Богдан Капитонов - Бүлүү к. (тр.Осипов Александр Семенович), 2м. Осипов Саша - Бүлүү к. (тр.Осипов Александр Семенович), 3м. Евсеев Гоша - Бүлүү к., Хампа с. (тр.Иванов Аркадий Иванович), кыргыттарга 1м. Тихонова Ольга - Дьокуускай (тр.Спиридонов Михаил Валерьевич), 2м. Власенко Валя - Хаҥалас, 2-ис Жемкон (тр.Исаков Петр Романович), 3м. Марина Бетчитова – Үөһээ Бүлүү, Тамалакаан с. (тр.Федотов Владимир Федорович);
Сезону бэркэ саҕалаатылар.
Быйылгы дьыл уратыта – республикабыт иһигэр күрэхтэһиилэр элбээбиттэригэр. Күрэхтэһиилэр аны рейтинговай буоллулар. Күрэхтэһэр оҕолор рейтиннэрин үрдэтэргэ дьулуһуохтара. оҕолор күрэхтэһэ үөрэниэхтэрэ. Улуустарынан турнирдар календарнай былааҥҥа киллэрилиннилэр. Аммаҕа, Тааттаҕа, Чурапчыга, Уус Алдаҥҥа, Намҥа, Хаҥаласка, Бүлүүгэ, Сунтаарга, Мирнэйгэ, Алдаҥҥа, Нерюнгригэ остуол тенниһигэр күрэхтэһиилэр тэриллиэхтэрэ. Сэтинньи 14-15 күннэригэр Дьокуускайга "Чолбон" бассейн бирииһигэр республика турнира буолуоҕа. Ахсынньы ый ортотугар Хатаска республика турнира былааҥҥа турар. Кыттыыны ылан ситиһиилээхтик кыттыбыттар рейтиннэрин үрдэтиэхтэрэ, уопут ылыахтара. Онтон ким чахчы күүстээҕин олунньу ый 24-28 күннэригэр республика чемпионата быһаарыаҕа. Республика чемпионатын түмүгүнэн "Азия оҕолорун" оонньууларыгар республика хамаандата сүүмэрдэниэҕэ.
Онон кытаатыҥ!
Баһылай ПОСЕЛЬСКАЙ
