Ижевскэйгэ
Олунньу ыйга Удмуртия өрөспүүбүлүкэтин Ижевскэй куоратыгар хайыһарга Россия чемпионатыгар Сахабыт сириттэн 18 ветеран-хайыһардьыттара тиийэн үтүө түмүктэрдээх күрэхтэстилэр.
Дойду 37 регионнарыттан 500-кэ кыттааччы саастарынан араас дистанцияларга стаартаатылар. Хамаанданы “Чысхаан” хайыһары таптааччылар кулууптарын бэрэссэдээтэлэ Екатерина Никитина уонна Василиса Слепцова салайан илдьэ сырыттылар. Хамаанданан түмүккэ сэттэ мэтээллээх бэһис уонна сэттис миэстэлэнэннэр үчүгэй көрдөрүүлэннилэр. Киэҥ киэҥ Россия хайыһардьыттарын кытта эгил-тэгил эрийсэн, 55 саастаах Марина Пухова боруонса, көҥүл тустууга уонна дуобакка үс аан дойду чөмпүйүөнэ уолаттардаах идэтинэн физкультура учуутала, хайыһар уонна тустуу тренерэ 81 саастаах Степан Контоев икки үрүҥ көмүс уонна биир боруонса, 87 саастаах Степан Абрамов 3 боруонса мэтээллэри ылаттаабыттара. Россия курдук хайыһар сайдыбыт дойдутугар үрдүк көрдөрүүлэр.
Тольяттига
Итинтэн салгыы, Степан Контоев быраас идэлээх доҕорунаан Роман Васильевтыын иккиэ буоланнар салгыы Самараскай уобалас Тольятти куоратыгар Бүтүн Россиятааҕы марафоҥҥа тиийэн 25 км марафоҥҥа эмиэ ситиһиилээхтик кытыннылар. Ыраах хоту Саха сириттэн икки хайыһардьыттар тустарынан күрэхтэһии бара турар үгэнигэр комментатор саҥата: ,,В нынешном 28 Тальяттинском марафоне из клуба "Чысхаан" из далекой Якутии участвуют два лыжника - это трижды призер нынешнего чемпионата России Степан Контоев, ему 81лет и мастер по марафону Роман Васильев. Они расширили географию участников нашего марафона."- диэн биллэрбитигэр стадиоҥҥа баар элбэх ыалдьааччылар ытыс таһыммыттар уонна “ураа” бөҕө хаһыытааннар, соһуппуттар, үөрдүбүттэр, күрэхтэһэ, сүүрэ сылдьар ветеран-хайыһардьыттарбытыгар күүс-сэниэ эппиттэр.
Онон Саха сиригэр баар “Чысхаан” кулууп туһунан элбэх киһи билбит. Хайыһары таптыыр элбэх дьону кытта билсибиттэр, бары да олус эйэҕэс, киһиэхэ туох кыалларынан көмөлөһө сатыыр майгылаах дьоннордоох дойду эбит диэн астыммыттар.
Бүтүн Россиятааҕы хайыһар марафонугар Степан Степанович Контоев бэйэтин бөлөҕөр кыһыл көмүс, Роман Романович Васильев үрүҥ көмүс мэтээллэрдээх тапталлаах Сахаларын сиригэр эргилиннилэр. Эҕэрдэлиибит!
Бакуга
Азербайджан киин куоратыгар Бакуга Антипов бирииһигэр үтүө үгэскэ кубулутуллан сыллата ыытыллар чэпчэки атлетикаҕа Норуоттар икки ардыларынааҕы турнирга сахалыы атах оонньуутугар эмиэ күрэхтэһэллэр. Турнирга Сахабыт сириттэн түөрт киһилээх хамаанданы атах оонньуутун Федерациятын толрооччу дириэктэрэ, “Модун” спорткомплекс тренерэ Максим Оегостуров иитиллээччилэрин илдьэ сырытта. Кылыыһыттарбыт “илии тутуурдаах, өттүк харалаах” кытыннылар.
Дьахталларга 60 м сүүрүүгэ Олесова Валерия 8,30 сөк. көрдөрүүлээх 4м, 18-гар диэри саастаах кыргыттарга Тумакова Маргарита уһуну ойууга 5 м 12 см түһэн үрүҥ көмүс, 18-гар диэри саастаах уолаттарга Барашков Лев 6 м 50 см ойон үрүҥ көмүс, эр дьоҥҥо үстэ төхтөрүйэн ойууга (тройнойга) Сокольников Ньургун 15 м 10 см көрдөрүүлээх боруонса мэтээллэргэ тигистилэр.
Үчүгэй көрдөрүүлэр сахалыы атах оонньууларыгар ситиһилиннилэр. 18 саастаах ыччаттарга Маргарита Тумакова сэттэ ойууга кылыыга 21 м 92 см, ыстаҥаҕа 22 м 27 см, куобахха 18 м 03 см түһүтэлээн кыһыл көмүс мэтээллэри; дьахталларга Валерия Олесова кылыыга 24 м 34 см, ыстаҥаҕа 24 м 59 см, куобахха 19 м 33 см түһүтэлээн бастаталаата; 18 саастаах уолаттарга Лев Барашков 26 м 97 см кылыйан, лоп-курдук 26 м ыстаҥалаан, 21 м 87 см куобахтаан күүстээх утарсааччыларын кыайталаата. Азербаджан уонна Казахстан ойооччулара бириистээх миэстэлэргэ тигистилэр.
Эр дьоҥҥо Саха сирин күүстээх маастара, өрөспүүбүлүкэ чөмпүйүөнэ, Манчаары оонньууларын призера, Уус-Алдан Бэйдиҥэтин маанылаах кылыыһыта Ньургун Сокольников кылыыга 29 м 18 см, ыстаҥаҕа 28 м 70 см, куобахха 24 м 16 см түһүтэлээн бастаталаата уонна үс көрүҥ түмүгүнэн 82 м 04 см көрдөрүүлээх Бакутааҕы норуоттар икки ардыларынааҕы күрэхтэһии абсолютнай чөмпүйүөнүн үрдүк аатын ылары ситистэ.
Сахалыы атах оонньуутунан омук дойдуларыгар тиийэрэ кэрэхсэбиллээх. Атах оонньуутун таптааҥ, дьарыктаныҥ, үрдэллэри дабайан иһиҥ!
Буулдьанан ытыы
Доруобуйаларыгар хааччахтаах спортсменнар ортолоругар буулдьанан ытыыга өрөспүүбүлүкэ чемпионатыгар 12 улуустартан 32 кыттааччы “Дохсун” спорткомплекска күрэхтэстилэр. Күрэхтэһии кыттыылаахтарын Адаптивнай физическэй культура уонна спорт Киинин дириэктэрин солбуйааччы Анастасия Михайлова, Федерация бэрэссэдээтэлэ Сергей Платонов, сүрүн судьуйа Александр Сотников эҕэрдэлээтилэр.
“Дохсун” спорткомплекска икки күн ыытыллыбыт күрэхтэһиилэр түмүктэринэн үчүгэй эрчиллиилээх, бэлэмнээх ситиһиилэннилэр. Пневматическай винтовканан ытыыга Үөһээ-Бүлүүттэн Юлия Иванова, Василий Алексеев, Уус-Алдантан Елизавета Васильева; салгын бэстилиэтинэн ытыыга Надежда Белолюбская (Таатта), Декабрина Аргунова (Уус-Алдан), Людмила Собакина (Нам); Эркин Васильев (Дьокуускай), Евгений Птицын (Мэҥэ-Хаҥалас), Афанасий Васильев (Уус-Алдан) өйдөбүнньүк мэтээллэринэн наҕараадаланнылар.
Илиилэригэр-атахтарыгар эчэйиилээх анал байыаннай дьайыы байыастара Тааттаттан Айаал Алексеев, Игнат Максимов, Өлүөхүмэттэн Данил Сольжиграсов, Муоматтан Захар Слепцов реабилитация кэнниттэн кэлэн аан бастаан күрэхтэстилэр.
Данил Сольжиграсов: 1-кы Нөөрүктээйиттэн сылдьабын. Оҕунан ытыынан дьарыктанан эрэбин. Буулдьанан ытыыга аан бастаан холоннум. Олимпийскай эрэллэр училищеҕа Артур Федорович Кравченкоҕа, Лаврентий Семенович Соломоновка, Александр Петрович Леоновка боксанан дьарыктаммытым, спорт маастарабын, Дальнай Востокка чөмпүйүөннээбитим. Контрагынан мотострелковай чааска сулууспалаатым. Атахпар ыарахан бааһырыы ыламмын кэлбитим. Спорка көрдөрүүлэниэм, ситиһиилэниэм диэн эрэллээхпин. Кус, куобах булдун, балыктыырбын сөбүлүүбүн.
Мотострелковай гвардейскай биригээдэҕэ сулууспалыы сылдьан кыргыһыы толоонугар хаҥас илиитин сүтэрбит байыас Захар Слепцов: Эрдэттэн спорт араас көрүҥнэринэн умсугуйар этим. Билигин теннистээн эрэбин, эппэрээссийэ кэнниттэн буулдьанан ытыыга маҥнайгы холонуум буолла. “Фонд защитников Отечества” уонна Адаптивнай Киин биһиэхэ улахан болҕомтолорун уураллар. Тренерим пока суох, дьиэбэр салгын саалаахпын, дьарыктанабын. Мотострелк бридага гвардейскай, бронегруппа. Фроҥҥа баар уолаттарбын кытта сибээһи тутуһабын. Үөрэнэр баҕалаахпын. Спорка күүскэ дьарыктанаары гынабын, интэриэһинэй, өйүн-санаан сааһыланар, сэргэх сылдьаҕын, аралдьыйаҕын. Сэрии бүтүөн баҕарабын, уолаттарбыт бары төннөн кэлэллэрэ буоллар. Элбэх киһи бааһыран сытар, күүстээх санааны, сытынан кэбиспэккэ, олоххо киирэллэрин баҕарабын.
Михайлова Анастасия Семеновна – Адаптивнай Киин дириэктэрин солбуйааччы:
Сыл устата элбэх күрэхтэһиилэр буолаллар. Анал байыаннай дьайыыттан бааһыран кэлбит байыастары кытта үлэлиибит, спордунан дьарыктаннарабыт, күрэхтэһиилэргэ кытыннарабыт. Элбээн иһэллэр. Бары эдэр дьон. Дьиэҕэ олорон бүгэн хаалбакка, тэҥнээхтэрин кытта көрсөллөр, сэргэхсийэллэр. Россия Паралимийскай кэмитиэтэ ылсан үлэни саҕалаата. Өрөспүүбүлүкэ үрдүнэн 130 инвалидностаах ветераннар бааллар. Манчаары спартакиадатыгар бэлэмнэнии барар. Былааммыт элбэх.
Адаптивнай спорт спортсменнарыгар үлэ былааннаахтык ыытыллар. Спорт кыһыҥҥы көрүҥнэригэр Россия Кубогар, пауэрлифтиҥҥэ Россия чемпионатыгар уонна Манчаары оонньууларыгар бэлэмнэниилэр үгэннэрэ. Ситиһии тосхойдун!
Баһылай Посельскай
