2019 с. от ыйын 5 күнүгэр 502-РГ нүөмэрдээх Саха Өрөспүүбүлүкэтин Ил Дархана Айсен Николаев талааннаах оҕолору булар уонна өйүүр туһунан таһаарбыт Дьаһалыгар олоҕуран, кулун тутар 29 – муус устар 1 күннэригэр Уус-Алдан, Чурапчы, Мэҥэ-Хаҥалас улуустарынан аан-бастакы Үөрэхтээһин Экспедициятын саҕалаата.
Дьоһун хамсааһын Сочига төрүттэммит Бүтүн Россиятааҕы Үөрэхтээһин Экспедициятын программатыгар тирэҕирэр. Саха сиринээҕи Үөрэхтээһин Экспедицията Василий Климович Павлов салайааччылаах “Малая Академия наук” базатын иһинэн үлэлэтэ саҕаланна.
Маҥнайгы айаҥҥа туруммут Үөрэхтээһин Экспедициятын сүрүн сыала-соруга түөрт хайысхаҕа туһуланар: наукаҕа, искусство эйгэтинэн балекка, музыкаҕа уонна спорка талааннаах оҕолору көрдөөһүн уонна булуллубут талааннары сүүмэрдээн, салгыы сайыннарыы буолар. Бу дьоһун хамсааһын Үүнэр көлүөнэ Фондатын үбүлээһининэн өйөнөр. Быйылгы сылтан Үөрэхтээһин Экспедициятын тэрийтэлээн оҕолору үөрэтэн, чинчийэн, Дьокуускайдааҕы Балет оскуолата уонна Музыка оскуолалара талааннаах оҕолору бэйэлэригэр үөрэххэ ылан, салгыы үөрэттэриэхтээхтэр. Спорт хайысхатынан оҕо спортивнай оскуолаларыгар спорка талааннаах оҕолору сыһыаран, үөрэтии, дьарыктааһын программата оҥоһуллан, ол булуллубут талааннары кытта салгыы үлэлэһии барыахтаах.
21 киһилээх Үөрэхтээһин Экспедициятын Саха Өрөспүүбүлүкэтин спорка солбугу бэлэмниир киин дириэктэрэ Василий Иванович Егоров уонна киин дириэктэрин солбуйааччы Аграфена Львовна Колесова салайаллар.
Маҥнайгы күн Бороҕоҥҥо сылдьыы түмүгүнэн, Уус-Алдан улууһун баһылыгын Алексей Васильевич Федотовы кытта көрсөн кэпсэтии сүнньүнэн, бииргэ үлэлээһин Сөбүлэһиитин докумуонун ылынан Василий Егоров уонна Алексей Федотов илии баттастылар. Мындаабатааҕы оҕо спортоскуолатын спортивнай саалатыгар Үөрэхтээһин Экспедициятын үөрүүлээх быһыыга-майгыга аһыллыытын түгэнэ буолла. Улуус нэһилиэктэриттэн кэлитэлээбит наукаҕа, музыкаа, искусствоҕа уонна спорка хайысхаларынан сүүһүнэн оҕолоро түмсүбүт үөрүүлээх түгэнигэр улуус баһылыга Алексей Федотов, Өрөспүүүлүкэ спорка солбугу бэлэмниир киин дириэктэрэ Василий Егоров, Чурапчытааҕы физическэй культура уонна спорт институтун ректора Иннокентий Готовцев эҕэрдэ тыллары эттилэр. Улахан экраҥҥа оҕо спордун видеоролига, Туйаара Ларионова салайар “Энергия” оҕолор үҥкүүлэрин бөлөҕө, эдэр ырыаһыттар толоруулара дьоро түгэни киэргэтэн-тупсаран биэрдилэр.
Эбиэттэн киэһэ түөрт хайысхаларынан Үөрэхтээһин Экспедицията айаннаан кэлбит сүрүн сыалын-соругун толортообутунан барда. Мүрүтээҕи оҕо гимназияҕа математика олимпиадатын сүүмэрдиир түһүмэхтэрин туурдара, музыкальнай оскуолаҕа балекка уонна норуот инструменнарыгар, итиэннэ, Мындаабатааҕы спортивнай саалаҕа эт-сиин бэлэмигэр, көҥүл тустууга үүнэн иһэр эдэр талааннары бэйэлэрин идэлэрин баһылаабыт специалистар, үтүөлээх учууталлар, тренердэр оҕолору көрдүлэр-иһиттилэр, төрөппүттэри, учууталлары, тренердэри, физкультура учууталларын кытта кэпсэттилэр, спорт хайысхатынан оҕолор эт-сиин өттунэнэн бэлэмнэригэр, ох саанан ытыы, буулдьанан ытыы, дуобакка маастар кылаастар, муостаттан анньыныыга, скакалкаҕа, эттэрин-сииннэрин, доруобуйаларын туругун научнай лабораторияҕа чинчийдилэр.
Иккис күн, улуус дьаһалтатын дьиэтигэр Үөрэхтээһин Экспедициятын сырыытын-айанын түмүгүнэн санаа атастаһыытыгар туһуламмыт төгүрүк остуол тэрилиннэ.
Үөрэхтээһин Экспедицията Чурапчы, Мэҥэ-Хаҥалас улуустарынан үлэтин салгыыр.
Баһылай Посельскай
