Тохсунньу 27-28 күннэригэр “Кыайыы 50 сыла” спорт Дыбарыаһыгар аҕыс хамаандалар үс балассаакканан иккилии бөлөҕүнэн арахсан, онтон бөлөхтөрүгэр ким хаһыс миэстэни ылбыттарынан утарыта тахсан оонньоотулар.
1№ хамаанданы адаптивнай физкультура уонна спорт киинин диириэктэрэ Ньургун Иванов, Олимпийскай солбук Бэрдьигэстээҕи оҕо спортоскуолатын дириэктэрэ Осип Михайлов; 2№ физическэй культура уонна маассабай спорт Управление салайааччыта Роман Оконешников; 3№ спорт кыһыҥҥы көрүҥнэригэр спортоскуола дириэктэрэ Владимир Хисамутдинов; 4№ өрөспүүбүлүкэ сүүмэрдэммит хамаандаларын бэлэмниир Киин дириэктэрин солбуйааччылар Владимиир Карпенко, Нина Викторова уонна А.И. Пахомов аатынан боксаҕа Олимпийскай эрэл спортоскуола дириэктэрин солбуйааччы Афанасий Тарасов; 5№ Манчаары Баһылай аатынанспорт национальнай көрүҥнэригэр өрөспүүбүлүкэ Киинин дириэктэрин солбуйааччы Иван Борисов, единоборство көрүҥнэригэр Олимпийскай солбук спортоскуолатын дириэктэрин солбуйааччы Арсен Бадаев; 6№ футбол спортоскуолатын дириэктэрэ Николай Цыпандин, Чурапчы физкультураҕа уонна спорка Институтун ректора Иннокентий Готовцев; 7№ спорка солбугу бэлэмниир өрөспүүбүлүкэ Киинин салайааччыта Александр Андреев, физкультура уонна спорт министиэристибэтин кииннэммит бухгалтериятын салайааччыта Александра Слепцова; 8№ Н.С. Тимофеев аатынан Олимпийскай солбук оҕо спортоскуолатын дириэктэрин солбуйааччы Раиса Негнюрова, В.П. Уваров аатынан Олимпийскай эрэл спортоскуола дириэктэрэ Дьулустаан Захаров хамаандаларын үөрүүлээх параакка батыһыннаран таҕыстылар. Параады өрөспүүбүлүкэ спорка солбугу бэлэмниир Киин профсойууһун салайааччыта Кузьма Тарабукин сэргэхтик, эрчимнээхтик салайда.
Күрэхтэһии кыттыылаахтарын Саха Өрөспүүлүкэтин физическэй культураҕа уонна спорка миниистиирин солбуйааччы, VII Спартакиада тэрийэр кэмитиэтин бэрэссэдээтэлэ Гаврил Мохначевскай, физкультура уонна спорт үлэһиттэрин профсойууһун бэрэссэдээтэлэ Михаил Варламов, сүрүн судьуйа Ася Бережнева эҕэрдэлээтилэр.
Быйылгы Спартакиадаҕа түөрт көрүҥ – биатлон, дартс, киберспорт эбии киллэриллэннэр, сыл устата спорт 13 көрүҥнэригэр күрэхтэһиилэр буолуохтара диэн саҥа талыллыбыт профсойуус бэрэссэдээтэлэ Михаил Варламов иһитиннэрдэ. Ону сэргэ, “выездной” күрэхтэһиилэр ыытыллыахтара. Ол курдук, биатлон Алдаҥҥа, буулдьанан ытыы – Бэрдьигэстээххэ буолуохтара. Спартакиада сүрүн судьуйата Юрий Иванов, сүрүн сэкэрэтээрэ Николай Цыпандин.
Субуоталаах өрөбүл күннэргэ буолбут күрэхтэһиилэргэ, эр дьоҥҥо “А” бөлөххө биир да хотторуута суох “Триумфтар” бастаатылар. УФКиМС иккис, “Модун” үһүс, Минспорт төрдүс; “Б” бөлөххө Намнар бастаатылар, “Чолбон” иккис, “Дохсун” үһүс, “Туймаада” төрдүс; дьахталларга “А” бөлөххө “Дохсун”, Нам, “Чолбон”, “Туймаада” уонна “Б” бөлөххө УФКиМС, “Триумф”, Минспорт, “Модун” хамаандалара, туһааннааҕынан, бастакы, иккис, үһүс, төрдүс миэстэлэри ылаттаатылар.
Хамаандалар састааптара эдэрсийбит буолан, сылбырҕалар, блокка чэпчэкитик үөһэ ойон тахсаллар, мээчиги туталлар, аһарбаттар, охсоллоро күүстээх. Көрөргө үчүгэй, интэриэһи үөскэтэллэр. Оонньуу таһыма үрдээбитэ харахха быраҕыллар. Хамаандалар аайы Ньургун Сокольников, Кай Адамов, Яков Дмитриев, Еремей Ильин, Владислав Попов, Владлен Сергеев, Тимофей Слепцов курдук өрөспүүбүблүкэ күүстээх атах оонньуутун маастардара бааллара күрэхтэһиини сытыырҕатта, киэргэттэ.
Кытаанах киирсиилэр түмүктэринэн, эр дьоҥҥо Намнар бастаатылар, “Триумф” иккис, УФКиМС үһүс бириистээх миэстэлэннилэр. Итинтэн аллара “Чолбон”, “Модун”, “Дохсун”, Минспорт, “Туймаада”; дьахталларга эмиэ Намнар бастаатылар, “Дохсун” иккис, УФКиМС үһүс буоллулар, онтон “Триумф”, “Чолбон”, Минспорт, “Туймаада”, “Модун” хамаандалара.
Волейбол отделениелаах сыллата бастыыр Нам оҕо спортоскуолатын эр дьоҥҥо уонна дьахталларга хамаандалара бу да сырыыга эрэллээхтик бастаатылар. Хамаанда хапытаана, тренерэ Айсен Жерготов: “Волейбол көрүҥнээх буоламмыт, волейбол идэбит, онон анал эрчиллиилээх, бэлэмнээх буоламмыт кыайыахтаахпытын кыайдыбыт. Атын да хамаандалар сүрдээҕин эбиллибиттэр, “Триумф”, “Чолбон”, УФКиМС волейболистара бэркэ оонньоотулар. Хамаадаҕа атах оонньуутун спордун маастара Владислав Попов олус табыллан оонньоото. 195 см үрдүктээх, оонньуутун маастара, эдэр тренер Владлен Сергеев эмиэ бэркэ оонньоото. Кыргыттарга Клавдия Павлова хамаандатын бастатта. Ааспыт спартакиадаҕа Бэстээхтэри кытта холбоһоммут, бастаабыппыт. Алта тренер “Азия оҕолоругар” бэлэмнэнэбит. Куоракка кэлэммин хамаанданы эрчийэ сылдьабын. 2000-2001 сыллардаах төрүөх бастакы выпуск уолаттарым үөрэхтэрин бүтэрэн дойдуларыгар үлэлии кэлбиттэрэ. Онон, күүһүрдүбүт. Волейбол отделениелара Намҥа, куоракка, Хаҥалас Мохсоҕоллооҕор тренердэрбит үлэлииллэр. Нам волейболистара өрөспүүбүлүкэ волейболга Федерациятын Кубогар бастаабыттара. Оҕолорго өрөспүүбүлүкэҕэ бастаатыбыт. Кэлэр нэдиэлэҕэ Дальнай Востокка баараары сылдьабыт. Бу иннинэ оҕолорго “Байкал Кубогын” норуоттар икки ардыларынааҕы турнирга бараммыт аҕыс хамаандаттан төрдүс миэстэ буолбуппут. Үлэлиибит”.
Василий Винокуров дириэктэрдээх Н.С. Тимофеев аатынан Нам Олимпийскай эрэл оҕо спортоскуолатын үлэһиттэрин түмсүүлээх кэлэктиибэ үүммүт саҥа сылы ситиһиинэн саҕалаата. Үлэ күөстүү оргуйар. Спортоскуолаҕа 232 спортсмен-оҕолор волейболу сэргэ, стендовай ытыынан, дуобатынан, чэпчэки атлетиканан дьарыктаналлар.
“Дохсун” хамаандатыттан Алина Шестакова “Бастыҥ ситимнээччи”, Намтан Клавдия Павлова “Бастыҥ оонньооччу”, “Триумфтан” Саргылаана Васильева “Бастыҥ көмүскээччи”, маассабай спорт управлениеттан Мария Глухарева “Бастыҥ ситимнээччи”, Намтан Семен Васильев “Бастыҥ оонньооччу”, “Триумфтан” Дмитрий Шестаков “Бастыҥ охсооччу”, маассабай спорт управлениеттан Гаврил Черкашин “Бастыҥ ситимнээччи”, Намтан Айсен Жерготов “Бастыҥ көмүскээччи” анал бириистэринэн наҕараадаланнылар.
Чугастааҕы кэмҥэ, олунньу 22 күнүгэр Бэрдьигэстээххэ буулдьанан ытыы, Дьокуускайга муус устар 5-6 күннэригэр дуобат, остуол тенниһэ, муус устар 10-12 күннэригэр Алдаҥҥа биатлон, онтон атын көрүҥнэр Дьокуускайга балаҕан ыйыгар хабылык, хаамыска, киберспорт, алтынньыга харбааһын, ГТО, ахсынньыга канаты тардыһыы, чэпчэки атлетика, футбол, дартс күрэхтэһиилэрэ буолуохтара.
Саахымакка Аҕа Баһылык Кубога
Гроссмейстердар кыттыылаах Россия Кубогын бастакы этаабынан, Саха Өрөспүүбүлүкэтин Аҕа Баһылыгын Кубогар аҕыс гроссмейстердар, өрөспүүбүбүкэ күүстээх маастардара, барыта 58 саахымаччыт Дьокуускайга Национальнай художественнай музейга түмүктэнэн эрэллэр. Алта туур кэнниттэн гроссмейстер Дмитрий Кокарев, гроссмейстер-суруналыыс, саахыматы ырытааччы Дмитрий Кряквин, ыччаттарга аан дойду чөмпүйүөнэ, 18 саастаах Алексей Гребнев, Алексей Придорожнай, Антон Шомоев, Сахабыт сириттэн Владислав Жирков, Денис Назаров 5-4 ½ очколаах турниры баһылаан-көһүлээн иһэллэр. Гроссмейстердар Олег Рычков, Баира Кованова, Сахабыт сирин маастардара Роман Ганжуров, Нариман Мустафин, Арсений Чумаевскай, Дмитрий Егоров, Юрий Родионов 4-түү очколаахтар.
Ярыгин турнирыгар
70 кг Айсен Потапов (Дьааҥы), 125 кг Никита Хабаров (Муома) боруонса мэтээллэргэ тиксэннэр тустууну таптааччыларын үөртүлэр. Саха сирэ тустуулааҕын итэҕэттилэр. Саамай ыарахан ыйааһыннаахтарга Никита Хабаров үһүс миэстэлэнэн, сахалар күүстээх омук буоларбытын көрдөрдө.
Быһыйдарбыт ситиһиилэрэ
Россия кыһыҥҥы чемпионатыгар 100 км сүүрүүгэ Изабелла Борисова уонна Пелагея Григорьева кыһыл көмүс мэтээллэри ыллылар. Роман Алексеев уонна Дмитрий Ловцов үрүҥ көмүс мэтээллэннилэр. Дальнай Восток чемпионатыгар Игорь Скрябин уһуну иккис, үстэ төхтүрүйэн ойууга кыһыл көмүс уонна үрүҥ көмүс мэтээллэр хаһаайыннарынан буолла.
Баһылай Посельскай
