Дальнай Восток үрдүк үөрэхтэрин кыһаларын күрэхтэһиитигэр бастаата. “Студеннар волейболга ассоциацияларын Кубога” Россия финалыгар сүүмэрдиир суолталаах түһүлгэ. Бу иннинээҕи сылларга Саха сирин студеннарын волейболистара Дальнай Восток күрэхтэһиилэригэр миэстэлэһэллэр этэ. Бу сырыыга бастаатылар уонна Россия финалыгар кыттар быраабы ыллылар!
Кыайыылааҕы быһаарар сирэй-сирэйгэ утарыта оонньууларга, аан бастаан, Владивосток университетын хамаандатын үс партияҕа 25:15, 25:17, 25:18 оонньооннор, эрэллээхтик кыайдылар. Дальнай Восток университетын хамаандатын, тыҥааһыннаах киирсиилэргэ, быһаарыылаах төрдүс партияҕа ахсааны 29:27 тиэрдэннэр, 3:1 хоттулар. Бурятия университетын хамаандатын үс партияҕа 25:22, 25:19, 25:18 эмиэ эрэллээхтик хоттулар. Инньэ гынан, “круговой систиэмнэн” оонньууларга алта кыайыы очколаах Дальнай Восток студеннарын Бүтүн Россиятааҕы күрэхтэһиитигэр Артем Готовцев, Андрей Баранкевич, Денис Осетров, Андриан Григорьев, Дмитрий Пермяков, Айтан Кириллин, Дмитрий Федоров, Баяр Шинэ, Кирсан Эверстов, Данил Лисачев, Алтан Афанасьев, Айтал Шишигин кыһыл көмүс мэтээллэри кэтэннэр пьедестал үрдүкү үрдэлигэр тахсан турдулар! Турнир түмүгүнэн, Андриан Григорьев “Бастыҥ оонньооччу”, Данил Лисачев “Бастыҥ көмүскээччи” анал бириистэринэн наҕараадаланнылар.
Хамаанданы Саха Өрөспүүбүлүкэтин волейболга сүрүн тренерэ Айсен Жерготов салайан илдьэ сырытта. Айсен Елфидифорович Нам оҕо спортоскуолатыгар волейбол отделениетыгар 12-с сылын тренердиир. Сыллата өрөспүүбүлүкэ күүстээх хамаандатын бэлэмниир. Билигин Арсеньев куоракка бааллар, тунирдарга кытталлар. Төлөпүөнүнэн үөрүүтүн кытта үллэһиннэ:
“2026 с. Студеннар волейболга ассоциацияларын Дальнай Востоктааҕы сүүмэрдиир күрэхтэһиилэрэ буолан бүттэ. ХИФУ хамаандата эрэллээхтик бастаатыбыт. Барыта бэйэбит оҕолорбут Намтан, Чурапчыттан, Сунтаартан, Мэҥэ-Халастан волейбол оскуолатын ааспыт уолаттар. Бу кыайыы биир күннээх үлэ буолбатах. Өр сыллаах үлэбит түмүгэ. Саамай үөрэрбит диэн, Россия финалыгар путевка ыллыбыт. Ахсынньы ыйга Москва куоракка буолуоҕа. Онно барыахпыт. Хамаанда үчүгэй. Куһаҕана суох. Волейболга биир бастыҥ хаачыстыба оонньооччулар уҥуохтарын үрдүгэ буолар. Уолаттарбыт үрдүкэринэн хаалсыбаттар. 190-н тахсалаах түөрт уоллаахпыт. Уонна бары 180-тан тахсалаах уолаттар. Олус эппиэттээх оонньууга Бурятия университетын 3:0 ахсаанынан кыайдыбыт. Урукку кэмнэри санаан аастахха, саха волейбола, Дальнай Востокка, а.э. Уһук Илиҥҥи региоҥҥа бастыы иликипит. Тренер үлэтин саҕалаабытым 12-с сылыгар барда. Онон, волейболист уонна тренер быһыытынан, аан бастакыбын Уһук Илиҥҥи региоҥҥа бастаатым. Ол иннинэ иккис-үһүс буолуталыыр этибит. Бастакы миэстэҕэ кыра тиийбэт буолааччы. Сөптөөх үлэни ыытан, өрөспүүбүлүкэ федерациятын күүстээх өйөбүлүнэн уонна, проректорбыт Ильин Александр Александрович хамаандабытын эмиэ күүскэ өйүүр. Үлэ барар. Бу кыайыыбытын дьоммутугар-сэргэбитигэр, волейболу таптааччыларга аныыбыт. Саха волейбола баар диэн. Ол курдук, бу аҕыйах хонуктааҕыта биир уолум Будимир Мыреев Москватааҕы РТУ МИРЭА диэн студеннар хамаандаларыгар контракт баттаһан киирдэ. Ол курдук үлэбит баран иһэр. Бу турнеҕа кэллибит. Үс күрэхтэһиигэ сылдьыахтаахпыт. Бэҕэһээ Владивостокка бастааммыт, бүгүн Приморскай кыраай Арсеньев диэн куоракка баарбыт. Приморье хамаандаларын кытта киирсииэхтээхпит. Онтон кэлэр нэдиэлэҕэ Тындаҕа Байкаллааҕы Амурскай Магистраль (БАМ) үбүлүөйдээх турнирыгар күүстээх хамаандалар кэлэллэр, баран иһэммит онно кыттыахпыт”.
Волейболистарбытын өтөр ситиһиллибэтэх кыайыыларынан эҕэрдэлиибит!
Айсен Елфидифорович Жерготов сүрүн тренердээх, Айаал Аргунов, Альберт Бродников курдук тренердэрдээх, студеннар сүүмэрдэммит хамаандалара улахан дьоҥҥо өрөспүүбүлүкэ чөмпүйүөннэрэ. Эдэр, эрчимнээх устудьуон-волейболистарбыт Дальнай Востокка бастааннар, историяҕа киирэр чаҕылхай түгэннэри бэлэхтээбиттэринэн эҕэрдэлиибит! Ахсынньыга Москваҕа буолар Россия студеннарын чемпионатыгар ситиһии тосхойдун!
Баһылай Посельскай
