Манна дьиэ кэргэнинэн сынньанарга аналлаах сыыр арааһа, хаҥкылыыр сир, итии чэйдээх кафелар, буран, квадроцикл о.д.а. бааллар. Ону таһынан киһи хараҕын сымнатар хаартан араас композициялар оҥоһуллубуттар.
Тэрээһин үөрүүлээх аһыллыытыгар күрэх кыттааччылара параадтаан киирдилэр. Күрэхтэһээччилэри, кэлбит ыалдьыттары улуус баһылыга Юрий Слепцов, Ленскэй нэһилиэк баһылыгын солбуйааччыта Тимофей Охлопков, Саха сирин керлиҥҥэ федерациятын вице-президенэ Надежда Евсеева, ИП Василий Аргунов эҕэрдэлээтилэр, ситиһиини баҕардылар.
Хаартан скульптура оҥорууга иккилии киһилээх 15 хамаанда кыттыыны ылла. Мэҥэ Хаҥаластан сылдьар аҕа уонна уол Альберт, Архип Скрябиннар дэгиттэр дьоҕурдарын, сатабылларын көрдөрөн, «Кыайыы сулуһа» диэн үлэлэринэн бастыҥнарынан ааттаннылар. Иккис миэстэни Намтан Василий Аргунов уонна Никита Захаров «Олох салҕаныыта», үһүс миэстэни Дьокуускайтан Алексей Капитонов уонна Алексей Попов «Куйаар үҥкүүтэ» композициялара ыллылар.
Оттон керлинг күрэҕэр уопсайа 8 хамаанда илин-кэлин түһүстэ. Түмүккэ Үөһээ Бүлүү уонна Нам улуустарын холбоммут хамаандата кыайыылааҕынан таҕыста. Иккиһи Бүлүү улууһун хамаандата, үсүһү Дьокуускай уонна Нам улууһун холбоммут хамаандата ыллылар. Кыайыылаахтар грамотанан, мэтээлинэн, сыаналаах бириистэринэн наҕараадаланнылар.
Муус, хаар оҥоһуктарыгар норуоттар икки ардыларынааҕы таһымнаах маастар, Нам улууһугар керлинг күрэҕин тэрийээччи Григорий Максимов:
–Эҥсиэли хочотугар керлинг күрэҕэ үһүс төгүлүн ыытыллар. Аан бастаан Хамаҕаттаҕа буолбута. Бу спорт саҥа көрүҥэ Сочига ыытыллыбыт Олимпиада кэнниттэн Саха сиригэр тэриллэр буолбута. Сонун көрүҥү тарҕатар сыаллаах республика улуустарыгар хаста да ыытылынна. Бүгүн керлинг федерациятын вице-президенэ Надежда Евсеева кэлэн кыттыыны ыла сылдьар. Сочиттан кэлбит таастарынан оонньуубут. Быраабылата Олимпийскай, каток анал ньыманан кутуллар. Дьиҥинэн, керлинг күрэҕэ сабыылаах катокка ыытыллыахтаах, ол эрэн, маннык таһымнаах күрэхтэр аһаҕас катокка ыытыллаллара көҥүллэнэр. Сотору маннык хабааннаах күрэх Мэҥэ Хаҥалас улууһугар тэриллиэҕэ.
Бүлүү хамаандатыттан Меркурий Мохначевскай:
— Саха сирин керлиҥҥэ федерацията 2015 сыллаахха тэриллибитэ, онтон бастакы күрэх Дьокуускайга 2016 сыллаахха ыытыллыбыта. Ол кэнниттэн сыллата улуустарынан барар. Бүгүн хаар түһэн мэһэйдээн, аһаҕас катокка күрэхтэһэр уустук буолла. Керлинг көрүҥэ Сахабыт сиригэр күүскэ сайдарын туһугар уонна маассабай буолуутун ситиһэргэ төһө кыалларынан күүскэ үлэлэһэ сатыыбыт. Маассабай буоллаҕына, бюджеттэн үп көрүллэн сайдыы барыахтаах. Бу көрүҥ саҥа буолан, дьарыктанааччы элбэҕэ суох, таптаан үлүһүйэн оонньуур дьон мустабыт.
Дьокуускайга биир эрэ муус дыбарыастаахпыт. Онно, сүрүннээн, хоккейга уонна шорт-треккэ дьарыктаналлар. Ааспыкка спорт министерствотыгар киирэн кэпсэтэн, чааспытын элбэттэрдибит. Мантан инньэ өрөбүллэргэ дьарыктанар буолуохпут. Барыта олимпийскай быраабыланан барар. Бүгүҥҥү күрэхтэһээччилэр, энтузиастар, киирсэр буоламмыт, таһыммыт тэҥ. Олимпийскай таас аан дойдуга биир сиргэ – Шотландияҕа эрэ оҥоһуллар. Биир 20 киилэлээх таас 100 тыһ. солк. сыаналаах. РФ керлиҥҥэ федерацията биһиэхэ биир комплегы 2016 сыллаахха бэлэхтээбитин, улуустарынан илдьэ сылдьан күрэхтэһэбит.
Бу курдук сандал сааһы көрсө сэргэх тэрээһиннэр үрдүк таһымҥа ыытылыннылар. Өрөбүл күн буолан, көрөөччү да, сынньанааччы да үгүс буолла.
Газета «Эҥсиэли»
