Баннер ТОП Мобайл

“Стритлифтиҥҥэ” Москваҕа буолан ааспыт Россия чемпионатын кыһыл көмүс медалиһа Евгений Самсонов “Сахалифтинг” группаҕа киирдэ. Тардынааччылар кэккэлэрин хаҥаппыт чөмпүйүөнү үөрүүлээх түгэнинэн эҕэрдэлиибит! 

33 саастаах Евгений Самсонов Хаҥалас Үөдүгэйиттэн төрүттээх-уустаах. IX кылааска үөрэнэ сырыттаҕына убайа Илиҥҥи дойдулар охсуһар көрүҥнэрин тустарынан кинигэлэри, видеолары дьиэтигэр аҕаларын көрөн, бэйэтин кыанар, күүстээх буолар баҕа санаа үөскээбитэ. Инньэ гынан, ким да күһэйиитэ суох бэйэтэ дьарыктаммытынан, эрчиллибитинэн барбыта. Убайа секция аспытыгар сылдьыбыта. Оҕолорго өрөспүүбүлүкэ күрэхтэһиилэригэр бастаталаабыта.

sams 2

Оскуолатын кэнниттэн менеджер идэтин баһылаабыта. Ушуну, тхэквондону, самбону үөрэтэр Покровскайдааҕы Олимпийскай эрэллэр бойобуой искусствоҕа оскуолатыгар тренердээбитэ. Оҕолорго Россия чөмпүйүөннэрин, призердарын таһаарыыга кылаатын киллэрсибитэ. Бэйэтэ 2016 сыллаахха Россия чемпионатыгар ушу-саньдаҕа миэстэлэһэн хара кур хаһаайынынан буолбута. Самбонан, буккаас охсуһууларынан, панкратионунан утумнаахтык дьарыктаммыта, ММА байыаһынан буолбута.

Евгений Самсонов хайа да ыарахан, уустук түгэн тирээн кэллэҕинэ, саараан, тээтэҥнээн туран хаалбат, толлубат, туруоруммут сыалын-соругун ситиһэргэ булугас өйө-санаата сөхтөрөр. Охсуһуу көрүҥнэригэр атаҕар эчэйиини ылан баран, уһата-кэҥэтэ барбакка, тута, силовой көрүҥнэргэ көспүтэ. Утумнаахтык дьарыктанан, сытан эрэ штанганы өрө анньыыга өрөспүүбүлүкэҕэ бастакы миэстэни ылбыта, Россия маастарын нуорматын толорбута. Аны, сиһин эчэтэн, сиһин бөҕөргөтөөрү, становой тяганан дьарыктаммыта уонна пауэрлифтиҥҥэ маастарга кандидат нуорматынан өрөспүүбүлүкэҕэ бастаабыта. Туппутун ыһыктыбат, ытарчалыы харбыыры күүһүрдэр пауэрлифтинг көрүҥүн сөбүлээбитэ. Салгыы, этин-сиинин, былчыҥнарын сайыннарар инниттэн мас тардыһыытынан дьарыктанан, өрөспүүбүлүкэҕэ бастаабыта.

Киһи кыаҕыттан олус тутулуктаах, күүстээх эрчиллиини эрэйэр спорт саҥа көрүҥнэрин сэҥээрбитэ. Кроссфитка холоммута. Бэйэтигэр барсар көрүҥ диэн санааттан стритлифтининэн эрчиллиитин саҕалаабыта. 2019 с. перекладинаҕа 30 тардынан, брусьяҕа 60 анньынан өрөспүүбүлүкэҕэ бастаабыта. Ол быыһыгар, пауэрлифтиҥҥэ уонна рингэҕэ киирсэн бастаталаабыта. 2020 с. пандемия кэмигэр күрэхтэһиилэр тохтотуллубуттарыгар, дьарыктанарын тохтоппотоҕо. Форматын тута сылдьыбыта.

sams 5

2021 с. саҥатыгар пауэрлифтиҥҥэ штанганы сытан эрэ өрө анньыыга өрөспүүбүлүкэҕэ бастаабыта. Ый курдук бэлэмнэнэн баран, стритлифтиҥҥэ Россияҕа тиийэн чөмпүйүөннүүрүн таһынан, ыйааһыныгар рекорд олохтоото! Тардыныыга уонна биилигэр ыйааһын иилиниилээх брусьяҕа анньыныыга холбоон 147 кг көрдөрдө. Балаһыанньа быһыытынан, тардынаргар бэйэҥ ыйааһыҥҥыттан элбэҕи оҥорор буоллаххына маастар нуорматын иҥэрэллэр. 60 кг ыйааһыны үктүүр спортсмен 65 кг көтөҕөн тардыныахтаах. Брусьяҕа анньыныыга 85 кг көтөҕүөхтээҕин, 95 кг көтөхпүт. Көстөрүн курдук, бэйэтин ыйааһыныттан лаппа элбэҕи көтөхпүт. Өссө, күрэхтэһии быраабылатын сыыһан, күүһүн ситэ туһамматах. 90 кг ыарык тимири биилигэр иилинэн брусьяҕа анньыммыта уонна 62,5 кг үктүүр ыйааһына эбиллэннэр, рекорд быһыытынан ааҕыллыбыттар. Ону таһынан, Россия маастарынан буолары ситистэ. Ону туоһулуур зачетнай книжкатыгар бэлиэтээтилэр уонна маастарын значогун ылла. Рекорд олохтообутун туһунан сертификаттаах. Маастарын дастабырыанньатын толорон ыытыахтаахтар.

Евгений Самсонов тренерэ суох, оҕо эрдэҕиттэн бэйэтин баҕа санаатынан дьарыктанар. Аныгы үйэ киһитэ буолан, интернетинэн көрөн, ааҕан, билиини-сатабылы сомсор. Күрэхтэһиилэртэн, үөрэтэр-эрчиллэр түмсүүлэртэн элбэҕи сүһэн ылар. Элбэх уопуту мунньунна. Чэгиэн-чэбдик олоҕу тутуһар, доруобуйатын көрүнэр. Сбордарга сылдьар кэмигэр быраастар хонтуруолларын ааһар. Ыйааһынын тутарга, түһэрэргэ-таһаарарга үөрүйэхтээх. Аһылыгын күрэхтэһиэн биир ый иннинэ улаханнык тутуһар, көннөрү күннэргэ аһылыга дьонтон уратыта суох, туох баарынан.

Россия чемпионатыгар интернетинэн сирдэтэн бэйэтэ баран кэллэ. Киин сирдэргэ буолуталыыр дойду күрэхтэһиилэригэр эрэ маастары иҥэрэллэр. Ол иһин маастар нуормалаах күрэхтэһиилэргэ кытта сатыыр. Билигин единоноборствоҕа дьарыктыыр оҕолорун эмиэ илдьэ сырытта. Онон, бэйэтэ эрэ буолбакка, тренер быһыытынан эрчийэр оҕолоро бары мэтээллээх кэллилэр. Результат баар.

sams 1

Ситиһиилэр төрүөттэринэн балачча уһун кэмҥэ утумнаахтык, систиэмэллээхтик дьарыктаныыларынан иҥэриммит кытаанах спортивнай хараахтар, санаа күүһэ буоларын, сүрүн мотивациянан кыайыылар инникигэ кынаттыылларын ааҕар. “Бэйэҕитигэр баар  кыаххытыгар хаһан да саарбахтааман, кыаллыбат диэн суох, ханнык баҕарар дьыаланы саҕалаабыт буоллаххына – ол кыайыы!”,- диэн “Сахалифтинг” хамаандаҕа баҕа санаатын тиэрдэр.

Евгений Самсонов билигин стритлифтиҥҥэ Европа чемпионатыгар бэлэмнэнэр. Сүрүн сыала-соруга - норуоттар икки ардыларынааҕы кылаастаах маастар нуорматын толоруу.

Ситиһиини баҕарабыт!

Баһылай Посельскай

Поделиться:

#Новости