Саха төрүт көрүҥнэрин республикатааҕы киинин коллектива, СР хапсаҕай тустууга федерациятын, “Сахаада-спорт” саха төрүт көрүҥнэрин уонна оонньууларын Ассоциациятын ааттарыттан табаарыспыт, доҕорбут

Геннадий Васильевич Хабаров

бэс ыйын 6 күнүгэр бу сирдээҕи олохтон соһуччу барбытынан кэргэнигэр Анастасия Ивановнаҕа, оҕолоругар, сиэннэригэр, чугас дьонугар уонна доҕотторугар дириҥ кутурҕаммытын биллэрэбит.

Геннадий Хабаров 1955 сыллаахха сэтинньи 16 күнүгэр Абый улууһун Дружина бөһүөлэгэр төрөөбүтэ. 1963 сылга оскуолаҕа киириэҕиттэн, алтыс кылааска дылы дойдутугар үөрэммитэ. Тустууга дьоҕурдаах уолу сэттис кылаастан улуу тренер Дмитрий Петрович Коркиҥҥа ыыппыттара. Чурапчы туонатыгар эдэр бөҕөс оскуолатын бүтэрбитэ. Оччотооҕу ыччаттар үгүстэрин курдук, дойдутун көмүскүүр ытык иэһин толорон, Сэбиэскэй Армияҕа сулууспалаан кэлбитэ.

Онтон үөрэҕин салгыы, Коркин уолаттарын суолунан Украина Донецкай куоратыгар тиийэн, физкультура техникумугар үөрэнэ киирбитэ. Ол сылларга кини көҥүл тустууга Украинскай ССР эдэрдэргэ чемпиона, Украина Кубогын үрүҥ көмүс призера буолбута, аатырбыт маршал Малиновскай бирииһигэр Бүтүн Сойуустааҕы турниры кыайбыта. Барыта алта төгүл ССРС спордун маастарын толорбута да, баҕалаах аатыгар-суолугар тиксибэккэ хаалбыта.

Дойдутугар кэлэн, инники олоҕун Эҥсиэли хочотун кытта сибээстээбитэ, Аппааны бөһүөлэгэр дьиэ туттан олорбута. Нам оройуонунааҕы оҕо спортивнай оскуолатыгар бастаан Саха АССР үтүөлээх тренерэ Семен Федотович Алексеев, онтон салгыы Россия үтүөлээх тренерэ Борис Прокопьевич Егоров салалталарынан эдэр бөҕөстөрү иитиигэ көҥүл тустууга тренеринэн ситиһиилээхтик үлэлээбитэ. Үлэлии-үлэлии кэтэхтэн үөрэнэн, СГУ Физкультураҕа уонна спорка институтун бүтэрбитэ. Кини өр сыллаах үлэтэ Саха Республикатын үөрэҕириитин туйгунун үрдүк аатынан бэлиэтэммитэ.

Сүрүн үлэтин быыһыгар хапсаҕай тустуунан үлүһүйэн туран дьарыктаммыта, Саха сирин маастарын чиэстээх аатын ылбыта. Онтон баай уопуту мунньунан, судьуйалыыр куорпуска киирэн, кэнники сылларга көҥүл тустууга уонна хапсаҕайга араас улахан таһымнаах күрэхтэһииллэргэ үлэлээбитэ. Бу икки көрүҥҥэ республикатааҕы категориялаах судьуйа аатын сүкпүтэ.

Саха сирин спордун ветеранын ытык аатынан, төрөөбүт-үөскээбит Абыйын улууһугар спорт сайдыытыгар тус кылаатын иһин бочуоттаах бэлиэнэн наҕараадаламмыта.

Доҕорбут Геннадий Васильевич, быдан дьылларга быраһаай…

Владислав Коротов.

Поделиться:

Добавить комментарий

#Новости