Спордунан утумнаахтык дьарыктанааччылар көрдөрүүлэрин тупсартыыллара – айылҕа халбаҥнаабат сокуона

Сааскыттан, туох-ханнык идэлээххиттэн, тугу үлэлииргиттэн тутулуга суох. Ону, тардыныы курдук хамсаныы биир олус судургута суох уустук уонна ыарахан көрүҥэр - “SakhaLiftinf” (“Бэйэни өрө тардыныы”) группатыгар да көрүөххэ сөп. Уларыйыы, сайдыы барыыта ааспыты кытта тэҥнээтэххэ үчүгэйдик биллэр. 1-2 да тардыныынан эбиллибит буоллахха, ол тустаах киһиэхэ үчүгэй. Инники диэки хардыылааһын, хамсааһын баарын арылхай көстүүтэ.

Маладьыастар!

Группаҕа киирэн баран аан маҥнай саҕалааһыннарыгар 55 саастаах тустуу тренерэ Ноговицын Афанасий 8 тардыммыт эбит буоллаҕына, билигин, стабильно 25-27 тардынар буолла. Бастыҥ көрдөрүүтэ 28 тэҥнэһэр. 46 саастаах Николай Калачев 10-н 23-кэ, 18-таах Герман Колесов 12-20, 60 с. Олег Аржаков 10-22, 50 с. Леонид Александров 12-26, 55 с. оҕо спорт оскуолатын дириэктэрэ Николай Гуляев 14-26, хаһан да тардымматах 58 с.  Федор Данилов 4 тардынар буолла, 45 с. Альберт Алексеев 17-25, 38 с. Дьулустаан Егоров 15-21, 56 с. Гаврил Федоров 14-30, Владимир Чичигинаров 14-15, 51 с. Николай Барашков 14-27, 21 с. Алексей Терентьев 21-27, 52 с. Михаил Варламов 3-7, 73 с. Иннокентий Кочкин 22-31, 39 с. нэһилиэк баһылыга Ньургун Попов 8-21, 54 с. Николай Иванов 15-16, 33 с. Михаил Пахомов 25-30, 40 с. Константин Пахомов 30-41 тардыннылар.

Намыһах турниктан сытан эрэ тардыныылартан саҕалаабыт 60 с. Юрий Петров 8 төгүл классическайдык тардынар буолла, онтон 56 с. Афанасий Андреев 10 тардынна. Көҥүл тустууга Россия чөмпүйүөнэ Петр Малардыров группаҕа киириитигэр биирдэ тардыммыта, ыйааһына төһө да эбиллибитин үрдүнэн, билигин үстэ тардынар буолта, сааһырбыт бөҕөскө улахан ситиһии, ыһыктынан кэбиспэккэ, бэйэ эт-хаан туругун илиигэ ылан, дьарыктанан, эбиллиэххэ, көннөрүнүөххэ сөбүн көстүүтэ. Афанасий Андреев сайын устата күүскэ үлэлээн-эрчиллэн, ыйааһынын 106 киилэттэн 85 кг диэри түһэрэн лаппа чэпчээтэ, сирэйдиин-харахтыын сырдаата.

Үөһээ-Бүлүү Тамалакааныттан Федор Иванов арочнай спортивнай сааланы страховката суох илиитинэн үөһэнэн эргийэн сөхтөрбүтэ. Бу сайын тыа баһаарын умулларыытыгар үлэлии сылдьан тииккэ баттатан сиһэ икки сиринэн тостубута. Суорҕан-тэллэх киһитэ буолар аналын кытта охсуһан, хамсанан-имсэнэн, атаҕар турда уонна таптыыр турнигар эргилиннэ! Ыччаттары, ол иһигэр бэйэтин уолун тардынарга үөрэтэрэ, уһуйара кэрэхсэбиллээх.

Эрдэттэн тардына үөрүйэх 56 с. Николай Федоров маҥнай утаа 30 тардынар бэйэтэ, санаата көтөҕүллэн, азартанан, “уутугар-хаарыгар” киирэн, 50 тардынан группа рекордун олохтоото!

90-120 киилэни үктүүр Александров Леонид, Алексеев Василий, Егоров Дьулустаан, Захаров Дмитрий, Калачев Николай, Неустроев Алексей, Пахомов Михаил, Попов Ньургун, Татаринов Анатолий, Фролкин Сергей уонтан быдан тахсалыыта тардыналлара бухатыырдыы күүс-күдэх, сэниэ баарын көстүүлэрэ. “Выход силой” оҥорор дьон бааллар. Үгүс дьон 50-60 саастаахтар эрээри, кэлин, Виталий Никифоров, Евгений Самсонов, Эркин, Тургун курдук күннэригэр сылдьар спортсменнар, тренердэр, спорт маастардара группаҕа эбиллэннэр, сэргэхситиини таһаардылар. Инньэ гынан, “профи” тыына илгийэр. 

Мас тардыһыыга аан дойду Кубогын кыайыылааҕа, 134 киилэни үктүүр ыйааһыннаах 28 саастаах Сергей Фролкин муус устар ыйга группаҕа киирэн 19 тардыммыта, бэс ыйыгар 21 тардынан эбиллибитин, күүһүрбүтүн көрдөрбүтэ уонна атырдьах ыйыгар Россия абсолютнай чөмпүйүөнүнэн буолары ситиһэн группа дьонун эҕэрдэлэрин ылла! 73 саастаах Иннокентий Кочкин биир да ыйы көтүппэккэ 30-31 тардынара барыбытыгар үтүө холобур!

248dcdaf c7de 4f1b a39d 94393f42cccd

Санаа күүһүн уҕараабат дьиктитэ

Маныаха группа бас-көс дьоно, эрчиллии лидердэрэ, чөл олох аргыстаах, Дмитрий Петрович Захаров, Владимир Ильич Чичигинаров, Егор Иванович Яковлев, саҥаны киллэрэр, өйүүр ураты сылаас, истиҥ сыһыаннарын суолтата улахан. Ити онлайн кэтэхтэн дьарыкка олус наадалаах. Тус бэйэлэринэн көҕүлүүллэр. Д.П. Коркин аатынан Чурапчытааҕы Республиканскай оҕо спортоскуолатын интэринээтин дириэктэрэ Николай Николаевич Гуляев оҕолору бүтүннүүлэрин сарсыарда сэрээккэлэтэр, тардыннарар. Төрөппүт уолаттарын кытта тэлгэһэлэригэр туруоруллубут турниктарга улаханныын-кыралыын биир-тэҥҥэ уончалыыта тардына туралларын көрөр эмиэ бэртээхэй үтүө дьыала буоллаҕа!

Ааһан-арахсан биэрбэт СOVID-19 бүрүүкээбит кэмигэр онлайн (кэтэхтэн) дьарыктаныы суолтата үс бүк улахан. Ыарыы группаны тумнубат. Ыарыыга хаптарбыттар хамсаныыларынан, тыыныы ньымаларынан, араас сүбэлэринэн-амаларынан, сүһүөхтэригэр туран, эрчиллиилэрин салгыыллар, сыыйа туруктарыгар, формаларыгар киирэн көрдөрүүлэрин тупсартыыллар. Физкультура-спорт туһатын, көмөтүн итэҕэтэллэр.

Группа төлөпүөн ватсаабын нөҥүө эрчиллэр, санаа атастаһар. Бэйэ-бэйэбитин бу диэн билсибэппит даҕаны. Үгүстэр, уулуссаҕа көрүстэхпитинэ аасыһа туруохпутун сөп. Ол чахчы. Ол эрээри, төһө да түмсүбэтэрбит, мустубатарбыт, биир сиргэ бүгэн олоруу таһаарыллыбат. Группабыт сэргэхтик олорор. Араас дьаһаллар, куонкурустар онлайн ситиминэн тиһигин быспакка ыытылла тураллар.

Ытык гражданскай иэстэрин толороннор, патриотическай тыыннарын киллэрэннэр Егор Яковлев, Федор Иванов, Леонид Александров уонна да атыттар соһуччу бүрүүкээбит айылҕа иэдээнин – тыа баһаарын умулларыыга кытыннылар. Тутуу саҥа технологияларынан дьарыктанар урбаанньыт Петр Малардыров тыа баһаарыттан эмсэҕэлээбит Горнай улууһун Бэс-Күөлүн сэлиэнньэтигэр саҥа дьиэлэри тутууларынан ылыста. Хаачыстыбалаах, эрэллээх тутууну ыытар. Саха Өрөспүүбүлүкэтин баһылыга Айсен Сергеевич Николаев Петр Михайловиһы санныттан таптайан “Тутуу сүрүн идеолога. Кытаатыҥ!” диэн хайҕаабытынан киэн туттабыт.

Киһини санаа күүһэ хамсатарын туһунан биллиилээх  дьон мындыр сүбэлэрэ, бэргэн этиилэрэ ватсаап-группабытыгар ситимин быспакка кэлэ тураллар. Күүстээх санаалаах киһи ылыммыт сыалын толорор кыаҕа элбэх. Саҥа суоллары тэлэн ситиһиини, кыайыыны оҥороро элбиир. Эти-сиини эрчийии, сайыннарыы, бөҕөргөтүү тустарынан олус туһалаах этиилэр бааллар: “Дьыбаан уонна олоппос киһини улаханнык мөлтөтөллөр. Атах – киһи иккис сүрэҕэ. Төһө кыалларынан атаххар сырыт, хаама сырыт!”. Ити кимиэхэ баҕарар кыаллар, ылынан толоруоххун эрэ наада. Уһун үйэлээх дьон бары хамсаныыны сөбүлүүр дьон буолаллара биллэр. Эбэтэр: “Олоххо интэриэстээх буол, туһалаах дьыаланан дьарыктан!”. Ити барыта киһиттэн бэйэтиттэн тутулуктаах. “Олох диэн - киһини кытта туох буолар түгэнэ буолбатах, ол түгэни эн хайдах ылынарын буолар (Жизнь – это не то, с вами случается, а то, как вы на это реагируете)”. “Материальнай баайы-дуолу дьиссипилиинэлээх, бэрээдэктээх, сүрэхтээх буолуу оҥорор”. Туруоруммут сыалгын-соруккун оччоҕо ситиһэҕин. Маннык эмиэ баар: “Өскөтүн, эн көрөр, хаамар, саҥарар, таптыыр уонна сарсыарда аайы ороҥҥуттан турар буоллаххына – эн остуоруйаҕа тэҥнээх баай киһигин!”. “Наһаа хойут утуйума, баар кыаххын мүччү тутума, дьарыккын көтүтүмэ, куһаҕаны, төттөрүнү, солуута суоҕу истимэ, биирдэ бэриллэр олоххун халтайга барыыргын тохтот”. “Дьоллоох дьон аҕыйахтык саҥараллар, киһиргээн чабыламматтар, элбэхтик күлэллэр-үөрэллэр, күн аайы үөрэнэллэр, солуута суохха кыһаллыбаттар”. “Улуу албан аат ким охтубатахха кэлэр буолбатах, ким охтон баран турбукка, ол туран баран өссө үөһэ дабайбыкка албан аат кэлэр”. “Сыаллаах-соруктаах эр бэрдэ чуҥкуйары билбэт”. “Эйиигин өйдүүр, өйүүр эрэ дьону кытта алтыс. Эйиигин аллара тарда сатааччылар элбэхтэр”. “Настарыанньаҥ, күн-дьыл хайдаҕыттан тутулуга суох дьарыктан. Дьыллар-хонуктар аастахтарына ону үтүө түмүктэрин көрдөрүөхтэрэ”. “Иннин диэки баран иһээччини ийэ-сир сылаппат. Киҥнээх буолуу, итэҕэйбэт буолуу, санаа түһүүтэ, соҕотохсуйуу сылаталлар. Туохха дьулуһарын эрэ төттөрү барбатар”.

Күннэтэ иннигит диэки дьулуһун, сайдыҥ, саҥаттан-саҥаны оҥоруҥ-айыҥ,  физкультуранан уонна спордунан дьарыктаныҥ, тардыныыны баһылааҥ!

Баһылай Посельскай

Поделиться:

Добавить комментарий

#Новости