Биһи, сахалар, тыйыс айылҕалаах буоламмыт, төрүт былыргыттан күүстээх, быһый дьону биһириибит. Ыччаттарбыт ситиһиилэриттэн үөрэбит, киэн туттабыт

Швеция Хальмстад куоратыгар алтынньы 3 күнүгэр түмүктэммит аан дойду 23-гэр диэри саастаах ыччаттарын классическай пауэрлифтиҥҥэ чемпионатыгар Үөһээ-Бүлүүттэн Богдан Прокопьев саамай ыарахан 120 кг тахса ыйааһыннаахтарга тус бэйэтин көрдөрүүлэринэн биир үрүҥ көмүс, үс боруонса уонна хамаанданан түмүккэ кыһыл көмүс – барыта биэс мэтээллэннэ!

Пауэрлифтинг – илиилэринэн-атахтарынан, систэринэн лаппа кыанар дьон сөбүлээн дьарыктанар көрүҥнэрэ. Утумнаахтык дьарыктанааччылар былларыттаҕас былчыҥнардаахтар, тас көстүүлэрэ, быһыы-таһаа да мааны буолар. Тупсаҕайдык таҥналлар, ордук-хоһу хамнамматтар, ис культуралаахтар. Кыраһыабайдар. Бэйэлэригэр эрэллээхтэр. Ол сиэринэн чэгиэн-чэбдик туруктаналлар, күннээҕи режими тутуһаллар, бэрээдэктэнэллэр, күннэрин-дьылларын туһалаахтык, көдьүүстээхтик атаараллар. Биир тылынан эттэххэ, күүстээх-уохтаах дьону киһи хараҕа хайгыы, таптыы көрөр. 

1d336560 2830 4afa 9d36 280687f03236

Богдан Прокопьев пауэрлифтининэн дьарыгырбыта биэс сыл буолла. Бу иннинэ мас тардыһыытыгар орто ыйааһыннарга өрөспүүбүлүкэ оҕолоругар миэстэлэһэрэ. Тимиринэн дьарыктаныаҕыттан ыйааһына үрдээбитэ, күүс-уох да өттүнэн эмиэ эбиллибитэ. Ити биэс сыл иһигэр Россия ыччаттарыгар тэҥнээҕэ суох, Европаҕа бастаабыта. Саха бухатыыр ыччата көрдөрүүлэрин эбэн, бэйэтэ оҥортообут рекортарын тупсартаан иһэр.

Аан дойду чемпионатыгар эмиэ бэркэ кытынна, Россия ыччаттарыгар бэйэтин рекортарын куоһарталаата. Богдан Дьокуускайга кэлээтин кытта, үгэһинэн, “Модун” спорткомплекска эрчиллэ сырыттаҕына көрүстүбүт. Бу сайын Россия чемпионатын кэнниттэн аан бастаан кэпсэппит буоламмыт, билсэр дьон быһыытынан, бу сырыыга кэпсэтиибит Богдан хайдах күрэхтэспитигэр туһаайылынна.

449afdfb 39f3 4a83 a752 486e2c7f03ae

Спорт - күүстээхтэр аналлара. Тэҥнээхтэр күрэхтэһиилэригэр эҥкилэ суох туруккар сылдьар эрэ буоллаххына кыайыаххын-хотуоххун, туруоруммут сыалгын-соруккун толоруоххун сөп. Кыра да түгэн мэһэйдээччи. Боччумнаах улахан күрэхтэһиигэ хайаатар да бастыыр сыалы-соругу туруоруммут тустаах спортсмеҥҥа, иккис-үһүс миэстэҕэ тиксии, астыннарбата баар суол.

Ыраах Саха сириттэн аан дойду чемпионатыгар аат-ааттаан күрэхтэһэ тиийбит Үөһээ-Бүлүү күүстээх ыччата Богдан Прокопьев тренеринээн Антон Викторович Солодовтыын кыһыл эрэ көмүскэ суоттаммыттара. Россия уонна Европа чөмпүйүөнэ, рекордсмена курдук таһымнаах, улахан дьоҥҥо үс иһигэр сылдьар көрдөрүүлэрдээх  ыччат оннук да буолуохтааҕа. Россия пауэрлифтинг сайдыбыт, күүстээх пауэрлифтердар баар дойдунан биллэр.

Бастакы көрүҥҥэ - штанганы сүгэн баран олорон турууга (приседка) Богдан 345 кг ылан  былааныгар 5 кг тиийбэтэх.  Бэйэтэ быһаарарынан, маҥнайгы холонуутугар 330 кг ылан баран, утарсааччылара эрдэ туорааннар, күрэхтэһии тэтимэ түргэтээн, иккис холонуутугар ситэ сынньана илигинэ ыҥырбыттар. Инньэ гынан, ситэ сынньаммакка, тыынын толору ылбакка помостка тахсан, баҕар, тиийэн кэлиэн сөп кутталы аһарынан (рискуйдаабакка), эрдэ былааннаммыт 350 кг оннугар, 345 кг сакаастаабыт уонна кэбэҕэстик олорон турбут. Ити көрдөрүүтүнэн Россия ыччаттарын рекордун олохтообут. Дьиҥинэн, 350 кг да ыларга “бэлэм этим, дьарыкка 330 иккитэ олорон турар этим”- диир. Онон, баар кыаҕын туһамматах. иккис үчүгэй көрдөрүүлэммит.

9a57c732 6035 4e2b 857c 83c11983c8d5

Сытан эрэ штанганы сыыйа өрө анньыыга (жим лежа) 210 кг былааннааҕын, эмиэ сэрэхэдийэн, 205 кг туруортаран, холкутук ылбыт. Үһүс көрдөрүүлэммит.

Бүтэһик үһүс көрүҥҥэ - штанганы тобугар диэри тардан таһаарыыга (тяга) 320 кг былааннааҕын - 310 кг бэрт чэпчэкитик тардан таһаарбыт. Быһаарыылаах иккис холонуутугар, били, икки көрүҥ түмүгүнэн 10 кг сүтэрбитин ситиһээри, 332,5 кг туруортарбыттар. Иккис миэстэҕэ киирэргэ диэн. Эмиэ аҕыйах мүнүүтэнэн тыынын ситэ илигинэ помоска ыҥырыллбыт. Ыарахан штанганы тобугар диэри тардан иһэн, аара, тарбахтара хамсааннар, ону лаппыйаары, штанганы тохтотон ылбытын аахпатахтар. Пауэрлифтинг техникатын быраабылата оннук, кытаанах. 310 кг көрдөрүүлээх эмиэ үһүс буолар.

Онон, үс көрүҥ түмүгүнэн 860 кг хомуйан үһүс абсолютнай көрдөрүүлэнэн, аан дойду ыччаттарын чемпионатыттан биир үрүҥ көмүс, үс боруонса уонна биир кыһыл көмүс мэтээллээх дойдутугар эргилиннэ!  Оҕолорго, ыччаттарга, улахан дьоҥҥо уопсай түмүгүнэн Россия хамаандата бастакы миэстэни ыларыгар сүҥкэн кылаатын киллэрдэ. Дьэ, чахчы, үчүгэй көрдөрүү! Богданы ситиһиитинэн эҕэрдэлиибит!

aaf1a94f bba5 468f bde9 88f10123f021

Богдан этэринэн: “Аан дойду киэҥ, саҥа ааттар кэлэ тураллар. Бу киһи кыахтаах диэбэккин, киһи үрдүгэр киһи син-биир баар. Ыарахан соҕус. Билигин грузин уонна итальянец бастакы уонна иккис буоллулар. Эрдэ грузин биллибэт да, иһиллибэт да этэ, ханна эрэ кыттан кэллэҕэ дии. Көрө иликпин. Итальянец эмиэ. Грузинтан допинг-контроль ыллылар. Араас буолуон сөп”.

Аны, ахсынньы ыйга Европа ыччаттарын чемпионата эмиэ пауэрлифтини өрө тутар Швецияҕа буолуохтаах. Богдан онно кыттар путевканы илиитигэр тутта. Билигин Европа чемпионатыгар бэлэмнэнии саҕаланна. Ыччаттарга ити бүтэһик күрэхтэһиитинэн буолуоҕа. Эһиил улахан дьоҥҥо көһөр. Кулун тутарга буолар улахан дьоҥҥо Россия чемпионатыгар кыттыахтаах. Үс иһигэр киирэн Европа уонна аан дойду чемпионаттарыгар сүүмэрдээһини ааһар кытаанах сыал-сорук турар.  Россияҕа улахан дьоҥҥо 860-880 киилэлэри ылаттыыр икки-үс киһи баар. Бастыҥнара аан дойду чөмпүйүөнэ уонна рекордсмена 35 саастаах Самара бухатыыра Андрей Коновалов, үс көрүҥҥэ көрдөрүүтэ 942,5 киилэ. Кини кэтэҕэр ыччаттар тыыналлар. Олор истэригэр саха толуу-мааны күүстээх ыччата Богдан Прокопьев сыллата көрдөрүүтүн эбэн, улам чугаһаан иһэр.

Богдан кытаат!

Баһылай Посельскай, Sportyakutia.ru

Поделиться:

Комментарии

Тимир
0 Тимир 15.10.2021 23:05
Богдан сыл аайы эбиллэн иһэр, кытаат! Ситиһиилэри баҕарабыт.
Ответить Ответить с цитатой Цитировать

Добавить комментарий

#Новости

турник3

“SakhaLifting” ватсаап бөлөх үтүө холобурдара

Утумнаах дьарык, күннэтэ хамсана сылдьыы дьиҥ туһатын Дмитрий Петрович Захаров…
турник3

“SakhaLifting” ватсаап бөлөх үтүө холобурдара

Утумнаах дьарык, күннэтэ хамсана сылдьыы дьиҥ туһатын Дмитрий Петрович Захаров…