Кини 1932 сыллаахха Чурапчы сэлиэнньэтигэр төрөөбүтэ. 1948 сыллаахха Дьокуускай куорат 9-с №-дээх оскуолатын 7-с кылааһын, 1952 сыллаахха Чукрапчытааҕы педагогическай училищены бүтэрбитэ. 1975 сыллаахха Саха государственнай университетын историческай отделениетын бүтэрэн, история учууталын дипломун ылбыта.
1962-1968 сс. Чурапчытааҕы интернат-оскуола иитээччитинэн, 1968-1984 сс. спортивнай оскуола уонна интернат-оскуола директорынан үрдүк таһаарыылаахтык үлэлээбитэ.
Константин Сергеевич директор, салайааччы эрэ быһыытынан буолбакка, Д.П. Коркинныын саха тустуутун Аан дойду таһымыгар таһаарбыт киһинэн буолар. Россия, ССРС элбэх куораттарынан оскуола оҕолорун араас таһымнаах күрэхтэһиилэргэ, эрчиллэр түмсүүлэргэ илдьэ сылдьыбыт тренер быһыытынан Сойуус араас республикаларын сүрүн тренердэрин үксүлэрин кытта тэҥҥэ сылдьар, наада буоллаҕына, хамаандатын, оҕолорун туһугар туруулаһар тренер быьыытынан билинэллэрэ. Хапкаас омуктарга «Дарагой Костя», нууччаларга «Уважаемый Константин Сергеевич» диэн дэлэҕэ улуу омуктар ааттаабатахтара буолуо.
Директор, салайааччы быһыытынан оскуолатын иитэр-үөрэтэр үлэ саҥа кэрдиистэригэр таһаарбыта. Республика оччотооҕу РСФСР, ССРС үөрэҕириитин үрдүкү салалталарын кытта быһаччы кэпсэтэр кыахтаах этэ. Үөрэтии-иитии саҥа ньымаларын киллэриигэ, педагогтар профессиональнай таһымнара үрдүүрүгэр, интернат-оскуола материальнай-техническай базата бөҕөргүүрүгэр күнү-дьылы аахсыбакка, сынньанары билбэккэ үлэлээбитэ.
Константин Сергеевич үгүс сыратын үөрэнээччилэр личность быһыытынан сайдыыларыгар уурбута. Сүүһүнэн ыччаты олох киэҥ аартыгар киллэрсибитэ, сыыһа-халты да суолу тутуһуох оҕолору олоххо сүнньүлэрин булларбыта. Үлэһит да буолбут үөрэнээччилэри кытта үгүспүтүн кытта сибээһин быспат этэ. Араас хайысхалаах үлэлэргэ да сылдьар кэммитигэр өрүү билсэ, сүбэ-ама биэрэ сылдьар үтүөкэн аҕа табаарыспыт этэ.
Соҕуруу куораттарга күрэхтэһиигэ илдьэ сылдьарын быыһыгар киин куораттар бэлиэ, историческай сирдэригэр, музейдарга, пааматынньыктарга сырытыннаран, элбэҕи кэпсиирэ, билиһиннэрэрэ. Оҕолор улуу норуоттар историяларын, ураты культураларын, абыычайдарын билэллэригэр кыһаллара. Дьону кытта сатаан кэпсэтии, тутта-хапта сылдьыы, оннооҕор остолобуойга, рестораҥҥа сылдьыы култьуратыгар, этикатыгар үөрэтэрэ.
Д.П. Коркин, К.С. Постников бииргэ үлэлээһиннэрин түмүгэр Саха тустууга оскуолата Аан дойдуга аата ааттаммыта. Планета араас омуктарын кэккэтигэр саха омук баарын тустуук уолаттарбыт биллэрбиттэрэ, нация быһыытынан киэн туттуубутун, дьонтон итэҕэһэ суох буоларбытын өрө көтөхпүттэрэ.
Кинилэр үлэлэрин туһунан элбэх сурукка үйэтитилиннэ. Ону барытын суруйбакка туран туран, аҕыйах ахсааннаах саха саха норуотуттан икки Олимпийскай чемпиону Роман Дмитриевы, Павел Пинигины, Олимпиада үрүҥ көмүс призерун Александр Иванову Чурапчы спортивнай оскуолата спорт саамай кылаан чыпчаалыгар – Олимпиадаҕа таһаарбытын бэлиэтээн ааһыахтаахпыт. Бу устата-туората биллибэт киэҥ Саха сириттэн, аар тайҕа быыһыгар сытар кыракый дэриэбинэлэртэн, тумара туундара муоратыгар турар булчут, табаһыт дьон олорор бөһүөлэктэриттэн талааннаах оҕолору Чурапчыга аҕалан, интернакка олохтоон, дьарыктаан, үөрэтэн таһаарбыт киһинэн К.С. Постников буолар. Уонунан ааҕыллар Россия, ССРС чемпионнара, элбэх Аан дойдутааҕы күрэхтэһиилэр кыайыылаахтара, призердара иитиллэн тахсыбыттара. Кэлин үлэһит буолан норуот хаһаайыстыбатын араас салааларыгар, үөрэхтээһиҥҥэ, спортка элбэх ахсааннаах үтүөлээх үлэһиттэр, учууталлар, тренердэр ситиһиилэригэр бу оскуола баспытааталлара, учууталлара, тренердэрэ тугунан да кэмнэммэт улахан кылааттаахтар. Олортон биир бастакынан иитээччи, тренер, директор Константин Сергеевич аата чиэстээхтик ааттанар. Биир идэлээҕэ, доҕоро, элбэх сыл олохторун анаабыт тустууларыгар өйөһөн-өйдөһөн сылдьыбыт соратнига Д.П. Коркин аатын үйэтитиигэ элбэх үлэни ыыппыта. Олорбут дьиэтиттэн саҕалаан музей тэрийэн, ол ситэри сайдан, кэҥээн, билигин Россияҕа тиийэ биллэр музей буолан турар.
Республика автономиятын 100 сылыгар сөп түбэһиннэрэн К.С. Постников 90 сааһын Республика, улуус таһымыгар бэлиэтиир дьаһаллар ыытыллаллара былааннанар. Улуус баһылыга С.А. Саргыдаев бэрэссэдээтэллээх анал комиссия тэриллэн үлэтин саҕалаата. Үйэтитии быһыытынан «Боотур Уус» стадион иннигэр Афанасий Кирикович Софроновка аналлаах бюст таһыгар Чурапчыга спорт сайдыытыгар умнуллубат үтүөлээх К.С. Постников бюһун туруоруу былааҥҥа бастакынан киирдэ. Саҕалааһын быһыытынан Чурапчытааҕы интернат-оскуола 1973 сыллаах выпускниктара бюст туруутугар туттуллар үпкэ көмө буоларга анаан диэн, оскуоланы бүтэрбит бары выпускниктарга, бииргэ үлэлээбиттэргэ ыҥырыы таһаардылар, харчы хомуйуутун саҕалаатылар. Бу махталлаах, үйэлээх буолар өйдөбүнньүгү олоххо киллэриигэ бары кыах баарынан күүс-көмө, өйөбүл буолуохтара диэн эрэнэбит!
Константин Сергеевич бу олохтон туораабытын кэннэ, икки төгүллээн эдэр ыччаттарга көҥүл тустууга республиканскай турнир тэриллэ сылдьыбыта. Кэлин сайыннаран, норуоттар икки ардыларынааҕы да турнир буолуон сөбүн үрдүк трибунаттан эппиттэрэ. Ол турнир кэнники ыытылла илик. Онон бу 90 сөп түбэһиннэрэн, тустууга күрэхтэһиини саҥаттан сөргүтэр сорук турар. Ыытыллар кэмин Республика сүрүн тренердэрин, спорт министерствотын кытта сөҥнөһөн, балаҕан ыйын бүтүүтэ оҥоруохха сөп диэн этиилэр бааллар.
Онон, Республика спордун, чуолаан көҥүл тустуу сайдыытын историятын кэлэр көлүөнэҕэ хаалларыыга, Д.П. Коркин үлэтин үйэтитиигэ тугунан да кэмнэммэт үтүөлээх киһибит, Саха АССР үтүөлээх тренерэ, Россия физическэй культураҕа уонна спортка үтүөлээх үлэһитэ Константин Сергеевич Постников 90 сааһын үрдүк таһымҥа чиэстээхтик бэлиэтиир, үтүө өйдөбүнньүгү туруоран үйэ-саас тухары хаалларыы - биһиги үөрэппит оҕолоро, эдэр көлүөнэ спортсменнар, кэскиллээх аныгы салайааччылар ытык иэспит уонна эбээһинэспит!
Бюст туруорууга көмө харчытын бу счекка ыытаргытыгар көрдөһөбүт:
МОО СОДЕЙСТВИЮ В РАЗВИТИИ И БЛАГОПОЛУЧИИ ДЕТЕЙ ЧУРАПЧИНСКОГО УЛУСА “КОРКИНЕЦ”
Расчетный счет: 40703810576000001612
ИНН: 1430011461
КПП: 143001001
ОГРН: 1191447004165
Банк: ЯКУТСКОЕ ОТДЕЛЕНИЕ №ПАО СБЕРБАНК
БИК: 049805609
Корр.счет: 30101810400000000609
С.С. Морфунов, СР физическэй культураҕа уонна спортка үтүөлээх үлэһитэ, көҥүл тустууга ССРС спордун маастара, Чурапчы улууһун Бочуоттаах олохтооҕо,
В.С. Дьяконов, РФ физическэй культураҕа уонна спортка туйгуна, СР үөрэҕириитин туйгуна, СР үөрэхтээһинин Бочуоттаах ветерана.
