Арай биир күһүн ССРС чемпиона, Чурапчытааҕы оҕо спортивнай школатын тренерэ Карпов В. П. оҕо хомуйа кэлэр үһү диэн сурах тарханна. Аан бастаан Вячеслав Павловиһы онно көрбүтүм уонна сөхпүтүм диэн - улахана суох киһиэхэ, туох ааттаах кэтит көҕүстээҕий диэн этэ.
Аҕабынаан ССРС спордун маастара, Саха сирин 1966-67 сыллардааҕы чемпиона Клим Никитинниин табаарыстыы эбиттэр, инньэ гынан тренерим Петр Васильевич, Вячеслав Павлович уонна мин аҕабынаан бултуу бара сылдьыбыппыт. Онно үчүгэйдик билбитим, билэрэ-көрөрө элбэҕэ, кэпсээнэ дэлэйэ, тутта-хапта сылдьара дуоспуруннааҕа, оҕо киһини бэйэтигэр тардар этэ.
Кэлин армияттан кэлэн баран сырыттахпына, Чурапчыга кэлэн туста-туста тренердээ, диэн этэ сылдьыбыта. Олох эн-мин диэн билсиибит, табаарыстаһыыбыт, мин Верхоянскай оройуонун спорткомитетин салайыахпыттан этэ. Вячеслав Павлович спорт үрдүкү маастарыстыбаларын фондатын салайар кэмигэр биһиги оройуонна элбэҕи көмөлөспүтэ: тустуу, саахымат, дуобат лаппа сайда сылдьыбыта, элбэх үчүгэй спортсменнар тахсыталаабыттара. Араас сылларга барыта холбоон түөрт тустуу көбүөрүн ыллыбыт быһылааҕа, аны араас спортивнай тренажердар, форма, спорт араас атрибутиката уо.д.а.көмөтө элбэх буолара.
Республикатааҕы саахымат уонна дуобат кулуубун салайа олорон, аатырбыт дуобатчыты Александр Азаровы, фотограф, дуобатчыт Александр Назаровы илдьэ кэлэн сеанс бэрдэрэр, дуобат араас эгэлгэ киитэрэһин ырыттарар этэ. Дуобатчыттарбыт, саахыматчыттарбыт республика зонатыгар куруук бириистээх миэстэҕэ сылдьаллара, араас сбордарга хаалан эрчиллэллэрэ.
Командировкаҕа тиийдэхпинэ сарсыарда олох эрдэ киниэхэ тиийэбин. Тахсан ипподромна аттары көрөбүт, хаама сылдьан кэпсэтэбит, сүбэлэһэбит. Вячеслав Павлович сүүрүк аттары олус үчүгэйдик билэр этэ. Баар аттары барыларын кэрийэ сылдьан хантан кэлбиттэрин, туох хааннаахтарын, сүүрэр бириэмэлэрэ төһөтүн, ситиһиилэрин лоп бааччы кэпсээн биэрэр. Киирэн Татьяна Петровна минньигэс астаах остуолугар олорон тото аһаан баран кини үлэтигэр барабыт. Аҕам тэҥэ саастаах табаарыспын Вячеслав Павловиһы тыл үтүөтүнэн куруук өйдөөн санаан ааһабын.
Иннокентий Никитин, Дьааҥы оройуона, 2022 сыл.
