Саха Өрөспүүбүлүкэтин Ил Түмэнин наукаҕа уонна үөрэҕириигэ сис кэмитиэтин бэрэссэдээтэлэ Антонина Григорьева бэлиэтээбитинэн, норуоппут успуорка төрүт көрүҥнэрэ аан дойду таһымыгар таҕыстылар. Ол курдук, аҕыйах ыйынан Дьокуускай куоракка «Азия оҕолоро» норуоттар икки ардыларынааҕы спортивнай оонньуулар ыытыллыахтара. «Бүгүҥҥү ыытыллар тэрээһин буолаары турар “Азия оҕолорун” оонньууларыгар бэлэмнэнии чэрчитинэн барыаҕа. Онно эмиэ эһиги саамай улахан кыттыыны ылыаххыт диэн эрэнэбин», – диэн эттэ парламентарий.
Норуот дьокутаата успуордунан дьарыктаныы уонна чөл олоҕу тутуһуу оҕо көмпүүтэр куһаҕан дьайыытыттан харыстанарыгар көмөлөөҕүн ыйда. «Оҕо кыра эрдэҕиттэн успуорка, физическэй култуураҕа сыстыыта – судаарыстыбаннай бэлиитикэбит улахан сыала буолар».
Антонина Григорьева агрооскуолаҕа үөрэнэр оҕолор патриоттуу иитиилээх буолалларын тоһоҕолоон эттэ. «Төрөөбүт дойдугутугар, тыа сирин сайдыытыгар оскуола саҕаттан эһиги кылааты киллэрэ сылдьаҕыт. Күннэтэ үлэнэн дьарыгырар буолаҥҥыт, эһиги ордук күүстээххит, сатабыллааххыт, өйдөөххүт уонна кыанаҕыт», – диэтэ Ил Түмэн дьокутаата.
Кэмитиэт бэрэссэдээтэлэ Антонина Григорьева оҕолорго уонна тириэньэрдэргэ улахан кыайыылары уонна инники олохторугар ситиһиилэри баҕарда.
Саха Өрөспүүбүлүкэтин агрооскуолаларын сойууһун дириэктэрэ, СӨ үөрэҕириитин үтүөлээх үлэһитэ, СӨ үөрэҕириитин бочуоттаах бэтэрээнэ Петр Дягилев, Саха Өрөспүүбүлүкэтин норуодунай дьокутаата, Манчаары Баһылай аатынан саха төрүт көрүҥнэригэр өрөспүүбүлүкэтээҕи киин дириэктэрэ Геннадий Васильев, «Саха сирин кэнчээри ыччата» өрөспүүбүлүкэтээҕи тирэх киин дириэктэрин солбуйааччыта Александр Брызгалов, Л.Н. Харитонов аатынан Маҕарас орто оскуолатын дириэктэрэ Максим Максимов, «Өбүгэ оонньуулара» күрэх тэрийээччитэ, РФ үөрэҕириитин туйгуна, СӨ физкультураҕа уонна успуорка туйгуна, учууталлар учууталлара, күрэх кылаабынай судьуйата Николай Николаев, Россия, Саха сирин успуордун маастара, күрэх сүрүн сэкирэтээрэ Константин Ширяев бэстибээл аһыллыытыгар кыттыыны ыллылар.
Ил Түмэн пресс-сулууспата
