Бүгүн, от ыйын 16 күнүгэр, С. А. Зверев-Кыыл Уолун аатынан норуот айымньытын киинигэр улууспут чулуу спортсменнарын, успуорт улахан түһүлгэлэрин кыайыылаахтарын, кинилэр тириэньэрдэрин Сунтаар улууһун дорҕоонноохтук ааттаппыт спортсменнарбытын чиэстээһин буолла. Ол курдук, бу манна Азия оҕолорун норуоттар икки ардыларынааҕы спортивнай оонньууларын, Нерюнгри куоракка буолбут 5-с кыһыҥҥы спортивнай күрэхтэрин, Арассыыйаҕа бастыыр иһин күрэхтэһиигэ, Европаҕа тустуу көрүҥэр бастыыр иһин кыайыыларын, ситиһиилэрин үөрүүлээх быһыыга-майгыга бэлиэтиир дьоро күнэ тосхойдо. Улууспут аҕа баһылыга Анатолий Григорьев эҕэрдэ тылын этэн туран наҕараадалары туттарда.
Буулдьанан ытыыга Арассыыйа успуордун маастарын кандидата, «Азия оҕолоро» норуоттар икки ардыларынааҕы VIII спортивнай оонньууларыгар буулдьанан ытыыга 2-с миэстэ иһин 70 тыһ. солк. сууммалаах, паарнай буулдьанан ытыыга 3 миэстэ иһин 40 тыһ. солк. суумалаах сэртипикээттэринэн Виктория Ераскумова наҕараадаланна. Кини тириэньэрэ Арассыыйа буулдьанан ытыы успуордун маастарыгар кандидата, СӨ буулдьанан ытыы успуордун маастара, СӨ физическэй култуураҕа уонна успуордун туйгуна, үрдүкү категориялаах буулдьанан ытыыга уһуйааччы Александр Николаев 2-с миэстэни ситиһиилэрин иһин 35 тыһ. солк. суумалаах уонна 3-с миэстэни ылбытын иһин 20 тыһ.солк. суумалаах сэртипикээтинэн наҕараадаланна.
Ох саанан ытыыга А.И. Иванов аатынан олимпийскэй эрэллэри бэлэмниир оскуола иитиллээччитэ, ох саанан ытыыга 2-с спортивнай разрядтаах Владимир Ким «Азия оҕолоро» VIII спортивнай оонньууларыгар 1 миэстэни ылбытын иһин 100 000 солк., тириэньэрэ оҕунан ытыы успуордун Арассыыйа маастара, СӨ маастара, СӨ физическэй култуура уонна успуордун туйгуна Балдар Балданов 50 000 солк. суумалаах сэртипикээттэринэн наҕараадаланнылар.
«Азия оҕолоро» VIII спортивнай оонньууларыгар курдаах тустуу көрүҥэр 3-с миэстэни ситиспитин иһин 40 000 солк. суумалаах сэртипикээтинэн Алена Иванова наҕараадаланна. Тириэньэрэ Арассыыйа дьахтар тустуутун көрүҥүн успуорт маастара Герда Данилова – 20 000 солк.
Арассыыйа оҕунан ытыыга успуордун маастарыгар кандидат, Алкивиад Иванов аатынан олимпийскэй эрэллэри бэлэмниир оскуола иитиллээччитэ Айыына Васильева 3-с миэстэни ылбытын иһин 40 000 солк. сэртипикээтинэн наҕараадаланна. Оттон тириэньэрэ, Балдар Балданов -20 000 солк. суумалаах сэртипикээтин тутта.
Нерюнгри уонна Алдан куораттарга кулун тутарга СӨ успуорт кыһыҥҥы көрүҥнэригэр V Спартакиада буолан ааспыта. Бу спартакиадаҕа Дьокуускайтан уонна 19 улуустан 64 спортсмен кыттыбыттара. Олор истэригэр биһиги кыыспыт Жанна Чалбанова Сунтаарбыт улууһун чиэһин көмүскүү, бэйэтин күүһүн-уоҕун, күүстээх санаатын ууран, оҕолорго үс төгүл үскэ 7,31 м ойон, ону таһынан маамыкта быраҕыытыгар үс очкуону ылан боруонса мэтээллэри ылан улууһугар ситиһиини аҕалан үөрпүтэ.
Кини үс төгүл үскэ оҕолорго 3-с миэстэни ситиспитинэн 25000 солк., ону тэҥэ маамыкта быраҕыытыгар 3-с миэстэни ылбытынан 25000 солкуобайдаах сэртипикээттэринэн наҕараадаланна. Тириэньэрдэригэр, СӨ наарта спордун көрүҥэр маастарыгар, наарта көрүҥэр рекордсмен Юлия Ивановаҕа уонна Түбэй орто оскуолатын физкультура учууталыгар, үөрэҕирии туйгунугар, үрдүкү категориялаах учууталга Николай Румянцевка 10 000 солк. суумалаах сэртипикээттэри туттарда.
Сунтаар улууһуттан Арассыыйа таһымыгар тахсыбыт, сборнайга киирбит тарбахха баттанар спортсменнардаахпыт. Олортон биирдэстэрэ, эдэр эрчимнээх, ситиһиилээх Мария Тараярова буолар. Мария оҕунан ытыыга дьарыктаммыта 5-с сылыгар барда. Ол тухары, элбэх араас таһымнаах күрэхтэргэ инники күөҥҥэ сылдьар. Быйыл 2024 сылга Белоруссияҕа “Кубок сильнейших” күрэххэ 1-кы миэстэни, Москваҕа “Первенство России” 1-кы миэстэ, “Кубок АЛРОСА” 1-кы миэстэлэри ылбыта. Маны таһынан, өрөспүүбүлүкэ таһымнаах күрэхтэргэ, Чурапчыга, Горнай улууһугар буолбут күрэхтэһиилэргэ 1 миэстэлэри, Саха сирин үөрэнээччилэрин спартакиадатыгар 1-кы миэстэни, хамаанданан 1 миэстэни ситиспитэ. Бэс ыйыгар Забайкальеҕа, Агинскайга буолбут “Первенство России” улахан күрэххэ 1-кы миэстэни, хамаанданан 2-с миэстэни ситиһэн кэллэ. Забайкальеҕа, Агинскайга буолбут “Первенство России” оҕунан ытыыга улахан күрэххэ 1 миэстэни, хамаанданан 2 миэстэни ситиспитинэн Мария Тараярова 150000 солк. уонна кини тириэньэрэ Балдар Балданов 75000 тыһ. солк. сэртипикээтинэн наҕараадаланнылар.
Алкивиад Иванов аатынан олимпийскай эрэллэри бэлэмниир өрөспүүбүлүкэтээҕи успуорт оскуолатын салайааччыта Павел Павлов үтүө эҕэрдэ тылын этэн туран, наҕараадалары туттарда. Ол курдук, 1 миэстэни уонна хамаанданан 2 миэстэни ситиспитигэр Марияҕа 60 000 суумалаах сэртипикээт туттарда. Тириэньэригэр Балдар Балданов — 20000 солк.
Бу кэнниттэн Сербияҕа көҥүл тустууга ыытыллыбыт 21 саастарыгар диэри биирдиилээн бастыыр иһин Европа чөмпүйэнээтигэр кыһыл көмүс мэтээл хаһаайынын, 57 киилэ ыйааһыҥҥа Европа чөмпүйүөнүн, өрөгөйдөөх түгэни бэлэхтээбит, Арассыыйа успуордун маастара, дойдубут сүүмэрдэммит хамаандатын сүрүн састаабын чилиэнэ, биир дойдулаахпыт Лев Павловы чиэстээһин үөрүүлээх түгэнэ буолла. Көҥүл тустууга норуоттар икки ардыларынааҕы кылаастаах успуорт маастара, Чечня Өрөспүүбүлүкэтин, Грознай куоратыгар ыытыллыбыт көҥүл тустууга Арассыыйа чемпионатыгар бастакы миэстэни ылбытын иһин 150.000 солк., Одинцово куоракка ыытыллыбыт эр дьоҥҥо Арассыыйа чемпионатыгар 2-с миэстэ ылбытын иһин 225.000 солк. суумалаах уонна Сербияҕа көҥүл тустууга ыытыллыбыт 21 саастарыгар диэри биирдиилээн бастыыр иһин Европа чөмпүйэнээтигэр кыһыл көмүс мэтээл иһин 500.000 солк. суумалаах сэртипикээттэрин Сунтаар улууһун Аҕа баһылыга Анатолий Григорьев туттарда. Анатолий Васильевич эҕэрдэ тылыгар “Уолбут тустуутун бүтүн өрөспүүбүлүкэ көрдө, киниэхэ ыалдьан долгуйда. Европа чөмпүйүөнэ үрдүк ааты ылыы биһиги улууспутугар өтөрүнэн буолбатах улахан ситиһии. Кыайыы чэпчэкитик кэлбэтэҕэ биллэр» диэбитин саалаҕа олорооччу Лев кырачаан сүгүрүйээччитэ «оннук» диэн чиҥэтэн биэрэн успуорт бырааһынньыгын ордук киэргэттэ.
Эдэр тустуукпут ситиһиитигэр улахан оруолу төрөппүттэрэ Майя, Семен Павловтар ылалларын баһылык тоһоҕолоон эттэ уонна Павловтар дьиэ кэргэҥҥэ истиҥ махталын биллэрдэ. Ону сэргэ, тириэньэрэ Николай Данилов сыралаах үлэтин түмүгэ буоларын бэлиэтээн туран, киниэхэ иитиллээччитэ Чечня Өрөспүүбүлүкэтин, Грознай куоратыгар ыытыллыбыт көҥүл тустууга Арассыыйа чемпионатыгар бастакы миэстэни ылбытын иһин 75000 солк. суумалаах, Одинцово куоракка ыытыллыбыт эр дьоҥҥо Арассыыйа чемпионатыгар 2-с миэстэ иһин 75000 солк. суумалаах уонна Сербияҕа буолбут көҥүл тустууга Европа чөмпүйэнээтигэр кыһыл көмүс мэтээл иһин 250000 сэртипикээттэринэн наҕараадаланна.
А.И. Иванов аатынан олимпийскэй эрэллэри бэлэмниир успуорт оскуола салайааччыта Павел Павлов 70 000 тыһ.солк Лев Павловка, онтон тириэньэригэр 60 000 тыһ. солк. сэртипикээтин туттарда.
Сунтаар нэһилиэгин баһылыга Эдуард Филиппов эҕэрдэ истиҥин этэн туран Лев Павловка 50000 солк. уонна ситиһиилээх спортсменарга харчынан бириэмийэни туттартаата. Сунтаар улууһун нэһилиэктэрин баһылыктара, тэрилтэлэрин салайааччылара эҕэрдэлэрин, бэлэхтэрин тиэртилэр.
Бу күн үһүс түһүмэҕэр Лев Павлов бастакы тириэньэрэ, төрөппүт аҕата, көҥүл тустууга Арассыыйа успуордун маастара, Сунтаар улууһугар успуорт уонна физическай култуура салайааччытынан таһаарыылаахтык үлэлээбит Семен Павловы дуоһунаһыттан атаарар долгутуулаах түгэнэ буолла. Сунтаар улууһун успуорка уонна физическай култуураҕа салалтатын салайааччытынан эдэрдии эрчимнээх Дьулустаан Егоров ананна.
Дьэ, бу курдук, төрөөбүт улуустарын дорҕоонноохтук ааттата сылдьар ыччаттарбытын чиэстээһин өрө көтөҕүллүүлээхтик ааста.
Алена Иванова,
