Ол чэрчитинэн, Саха Өрөспүүбүлүкэтин спорка Музейын дириэктэрэ Михаил Друзьянов, Уус-Алдан улууһун баһылыгын социальнай боппуруостарга солбуйааччыта Анатолий Сторожев, улуус түмсүүтүн бэрэссэдээтэлэ Егор Неустроев Н.Н. Тарскай көмүллэ сытар сирин тиийэн көрдүлэр, хайдах туруктааҕын билистилэр.
Биллэрин курдук, физическэй культура уонна спорт уһулуччулаах салайааччыта Николай Николаевич Тарскай күөгэйэр күнүгэр сылдьан 1962 с. Москваҕа оһолго түбэһэн өлбүтэ. Дьокуускайга аҕалыллан көмүллүбүтэ. 1963 с. Москваҕа оҥоһуллубут бюст-памятник аҕалыллан туруоруллубута.
Үйэ аҥарыттан ордук балачча уһун кэм устата күрүөлэммэккэ турар памятник көрүүгэ-истиигэ наадыйара харахха быраҕыллар, кыратык иҥнэри барбыт, мраморнай билиитэтэ сир ньуурун кытта тэҥнэспит. Көннөрүллэригэр уолдьаспыт. Бырабыыталыстыбаҕа Н.Н. Тарскай көмүллэ сытар сирин сөргөхсүтэр сыаллаах-соруктаах кэпсэтиилэр буолуохтара. Ахсынньы ый бүтүүтүгэр Н.Н. Тарскай үбүлүөйдээх сылын түмүктүүр тэрээһиннэр ыытыллыахтара.
Онон, балаҕан ыйын 20 күнэ Сахабыт сирин физическэй культуратын уонна спорка олоҕор үйэтитиигэ аналлаах биир бэлиэ түгэн быһыытынан суолталанна.
Sportyakutia.ru
