Манна, билигин, ыччат урукку сыллары кытары холоотоххо, тустуунан yлyhyйэн туран дьарыктанар буолбут. Ону, кэнники сылларга, Мииринэйгэ буолбатах улахан тустуу кyрэhэ туоhулаата. Бу кyрэхтэhии, yс саха чулуу тустууктарыгар – профессор Николай Гоголевка, профессор Алкивиад Ивановка, профессор Николай Алексеевка ананна. Санатан эттэххэ, бу ааттаабыт дьонум, Арссыыйа чемпионнара этилэр. Кyрэхтэhии киириитин туома да дьоhуннук нарыламмыт. Кылыhахтаах куоластаах Федор Петровтан алгыстаах тойуктаах, киирэ спордугар Арассыыйа yрдyнэн биэнсийэлээхтэргэ хаста да бастаабыт – 84 саастаах Сэмэн Макаровтан кэс тыллаах, умунуллубат кэрэ-бэлиэ тэрээhин буолла. Кyрэхтэhиини иилээн, айымньылаахтык тэрийбит МПТИ(ХИФУ) дириэктэрэ А.Гольдман, Мииринэй оройуонун тустуутун федерациятын бэрэссэдээтэлэ, талааннаах тренер уонна ыччаты уhуйаачы, - Андрей Иннокентьев, тустуу энтузиастара – Юрий Константинов, Ян Петров, Василий Корякин, манна ахсаабат кылааттарын бэлиэтиэм этэ.
Айхалтан, Удачнайтан, Светлэйтэн, Сyлдьyкээртэн 52 тустуук кэлбитэ да yгyhy кэрэhэлиир. Бачча элбэх киhини тyмэр уустук. Тустуу спордун Мииринэйгэ, дьон-норуот кэрэхсиирин, таптыырын билэбин. Дьэ арай оройуоммут, куораппыт саламталарын уонна спорт управлениетын интэриэстэрэ, арыый да бэттэх кэлэрин, уларыйарын, тупсарын кyyтэбин. Тустуу спордун тренерэ Андрей Иннокентьев(Ньурба уола) миэхэ бэрт сэргэх сонуну иhитиннэрдэ. Быйыл, Мииринэй икки эдэр тустууктара – 22 саастаах Ларион Андреев(70 киилэ) уонна 23 саастаах Андрей Шишин(97 киилэ) Арассыыйа спордун маастардарынан буоллулар. Бу – Мииринэй курдук тустуу дьэ сайдан эрэр оччугуй куоратын холугар дьоhуннаах ситиhии!
Оттон бу буолбут кyрэхтэhии, миэхэ бэрт кэрэ-бэлиэ санаалары халларда. Бастатан туран, бары да тустууктар, бэйэлэрин тургутунууларын чааhыгар ирдэбилгэ, эрчиллиилэригэр кyyhyрбyттэр. Тустууга, бары кыттааччылар, классическай албас ньымаларын сэргэ, ис кyyhy таба туттууну баhылаабыттар. Тустуу кyрэхтэhиилэригэр, ыччаттар маннык хатаннык, бэйэни харыстаммаккка, харса суохтук тусталларын харахтаабатах ырааппыт. Тустууктар оротолоругар, бэрт сэргэх тиэхиньикэлээх уолаттар баар буолбуттар. Кyрэхтэhии тyмyгyнэн, 57 киилэ ыйааhыннаахтарга, Э.Токтосунов(МРТК) бастаата.
61 киилэ ыйааhыннаахтарга О.Бояркин(МПТИ) кыайда. 70 киилэлэхтэргэ, Сyлдьyкээртэн кииннээх-ханнаах Ларион Андреев кyннээтэ. Ларион, Улан-Удэ куоракка, Бyрээтийэ тустуутун биллиилээх оскуолатыгар эрчиллэн, бэркэ диэн сайдыбыт, тупсубут. Албастара хабараана, тyргэнэ – бэртээхэй ыччат тахсан эрэр.
86 киилэлээхтэргэ А.Абрамов(Сyлдьyкээр) бастаата. Александр Абрамов тустуутун ньымата, хайдах эрэ убайдыы-бырааттыы Белоглазовтары санатар. Тиэхиньикэтэ да yчyгэй, кyyс-сэниэ да баар ахан. Дьулуур да баар ыччата. Арай, уол элбэхтик тустуон, тренердэр киниэхэ ирдэбиллэрэ ураты буолуон наада эбит. 97 киилэлэхтэргэ Айаан Винокуров (МПТИ) кыайда. 97 киилээхтэртэн yеhээ, Ньургун Семенов(Светлэй) утарсааччыларын тулуталаабата.
Бастаан утаа, бытаан курдук, Ньургун Семенов (Yеhээ-Бyлyy уола) дьэ киирсиигэ бэйэтин уорун-кылынын махтайдыбыт. Сyyсчэ киилэ ыйааhыннаах уол диэтэххэ тyргэнэ, сылбыр5ата салыннарда. Удачнай уонна Айхал киппэ, «рестлэрдыы» моhуоннаах быыппастыгас былчыннаахтарын «уордайбыт хахайдыы хабырдык кум-хам тутулаата».
Онтон, хапса5айга кyрэхтэhиигэ эмиэ олус диэн эрийсиилээх киирсиhии буолан ааста. Манна, МПТИ бэhис куурсун устудьуона, шахта идэтигэр yерэнэр Айаан Винокуров(Уус-Алдан уола), киниттэн быдан чэпчэки ыйааhыннаах Л.Андреевы бэркэ эриhэн, сыралаhан туран кыайда. А.Винокуров тустар ньыматын Ньургун Чукровка майгыннаттым. Арыый сымсата уонна ыйааhынын мантан инньэ улаатыннарбата буоллар, утарсааччыларыгар кытаанах эр хоhуун буолуо эбит. Кыайыылаахха, А.Винокуровка, олохтоох «Ураанхай» спорт тyмсyyтэ туруорбут бирииhэ (Уу харчынан уон тыhыынча солк.), «АЛРОСАттан» кубок тигистэ. Кyрэхтэhии балачча «ыалдьааччылаах» буолан, элбэх ыhыылаах-хаhыылаах ааста. Онон, бэрт yчyгэй тустууттан олохтоохтор астынныбыт.
Станислав Алексеев. Мииринэй куорат.
