Компакт-спортинг ытыы көрүҥэр I улууспут аһаҕас турнира Орто Дойду саанан ытыы кулуубун сиригэр-уотугар, «Орто Дойду» туристическай комплекс дириэктэрэ, Спортинг федерациятын бэрэссэдээтэлэ П.Н. Андреев көҕүлээһининэн, тэрээһининэн улуус спорка уонна физическэй культураҕа управлениетын салайааччыта Ю.Ю. Никифоровтыын сүрүннээн ыам ыйын 4 күнүгэр ыыттылар.
Бу бэргэннэр күрэхтэһиилэрэ быйыл от ыйыгар Аммаҕа ыытыллыахтаах, VII Саха сирин норуоттарын спортивнай оонньууларыгар сүүмэрдиир түһүмэх быһыытынан буолла. Турнир саҕаланыытыгар кыттааччыларга, сахалартан спортиҥҥа Россия спордун маастардарыттан биир бастакылара, Россия чөмпүйүөнэ, өрөспүүбүлүкэ элбэх төгүллээх кыайыылааҕа, эстрада ырыаһыта Игорь Егоров маастар-кылаас көрдөрдө, дьоһуннаах сүбэлэри биэрдэ.
Төһө да күүһүрэн ылар сытыы тыаллаах күн буоллар бэргэн ытааччылар сыалларын ситистилэр. Биэс араас хайысхаттан көтөн тахсар тэриэлкэлэри, биэс тус-туһунан сиргэ туран ытыалаан тиҥиргэттилэр. Бэргэттэр тэриэлкэни күүппүлүү ытан күннээтилэр. Инники сылларга спорт бу көрүҥэр биһиги улууспут хамаандата ситиһиилээхтик кытталлара. Ол курдук, 2014 сыллаахха Нам улууһугар ыытыллыбыт Саха сирин норуоттарын спортивнай оонньууларыгар үһүс миэстэ, Бүлүүгэ баран төрдүс миэстэ буолары ситиспиттэрэ. 2002 сылтан спортинг федерациятын бэрэссэдээтэлинэн Петр Андреев үлэлиир:
- Улууспутугар бастакытын ыытыллар компакт-спортинг турнирыгар барыта 28 киһи, орто баайыы ытааччылар кытта сылдьаллар. Кинилэр үс бөлөҕүнэн эр дьон, дьахталлар уонна уолаттар диэн арахсан ыттылар. Манна «Якутцемент» ПХ АУо үлэһиттэрэ толору хамаанданан кэлэн кытыннылар. Аммаҕа ыытыллыахтаах VII Саха сирин норуоттарын спортивнай оонньууларыгар ситиһиилээхтик кыттарга спортинг федерациятын бэрэсидьиэнэ, “Сахатранснефтегаз” тэрилтэ генеральнай дириэктэрэ И.К. Макаров спорт бу көрүҥэр улахан үлэни ыыта сылдьар.
Соҕотох кэрэ аҥаар Татьяна Скрябина бастаан сыыһыах курдук буолан иһэн, ытар нэмин билэн спорт бу көрүҥэр булка курдук сыстаҕаһын көрдөрдө, бэркэ сууһартаата. Улууспутугар ытыы спордун өрө тутан кэлбит киһибитинэн С.Н. Андреев буолар. Сергей Николаевич турнир туһунан санаатын бу курдук үллэһиннэ:
- Манна кытта сылдьар дьон бука бары булка, ытыыга дьоҕурдаах дьон. Маннык күрэхтэһии улуус хамаандатын сүүмэрдииргэ олус наадалаах дии саныыбын. Спортинг көрүҥэ сыллата сайдар, таһымнара улаатан иһэр. Сахалар ытыыга Аан дойдуга да биллэн эрэллэр. Билигин эдэр ыччаты иитэн таһаарыахтаахпыт. Ол инниттэн, Өктөмтөн төрүттээх ытыыга тириэньэр Аркадий Андреев Казань куоракка оҕолорун эрчийэ-ыттара сылдьар. Кини дьарыктыыр оҕолоро “Азия оҕолоро” норуоттар икки ардыларынааҕы спортивнай оонньууларга миэстэлэһэн тураллар. Биир иитиллээччитэ 2018 сыллаахха Россия спордун маастарын нуорматын толорбута. Онон, бу күрэхтэһии туох баар сыалын-соругун ситтин диэн баҕа санаалаахпын.
Тэрийээччи Петр Николаевич Андреев күүс-көмө улахан өйөбүл буолбут дьоҥҥо улахан махтал-баһыыба тылларын этэр. Чуолаан Ил Түмэн дьокутааттарыгар Д.А. Семеновка, «Якутцемент» ПХ АУо генеральнай дириэктэригэр А.З Мамедовка, булт уонна балык тэрилин атыылыыр маҕаһыыннар дириэктэрдэригэр А.Д. Степановка («Рысь» маҕаһыын), А.С. Бодроваҕа (“Фарт” маҕаһыын) уонна Г.А. Харитоновка (“Охотник” маҕаһыын) ис сүрэҕиттэн махтанар. Ити курдук үтүө санаалаах дьон улууспут VII Саха сирин норуоттарын спортивнай оонньууларыгар ситиһиилээхтик кытталларыгар бигэ тирэҕинэн буоллулар. Кыра да улахан да тэрээһин бэрт үгүс түбүктэн-сыраттан тахсар. Улууспутугар спорт федерациялара хардарыта көмөлөсүһэн үлэлииллэригэр үтүө холобуру хапсаҕай тустуу федерациятын бэрэссэдээтэлэ, NHZ Group Нөмүгүтээҕи килиэп собуотун генеральнай дириэктэрэ В.А. Нестеров көрдөрөр.
Ити курдук бастакы улууспут аһаҕас турнирын кыттыылаахтара тэлээрэр тэриэлкэ сыалы ытааччылар эрчиллэн-эриллэн, кыраҕы харахтаах бэргэн ытааччылар бэртэрэ буола, булчут дьон сорсуннаахтара буолан, спортсмен үтүөлэрэ дэтэн улуустарын аатын өрө тутуохтара турдаҕа.
Кыайыылаахтар уонна миэстэлэспиттэр
Эр дьоҥҥо
1-кы миэстэ - Михаил Михайлов (Покровскай)
2-с миэстэ – Николай Андреев (Өктөм)
3-с миэстэ – Владислав Ковалев (Мохсоҕоллоох)
Дьахталларга
1-кы миэстэ – Татьяна Скрябина (Нөмүгү)
Уолаттарга
1-кы миэстэ – Артем Алексеев (Өктөм)
2-с миэстэ – Айан Андреев (Өктөм)
3- с миэстэ – Григорий Осипов (Нөмүгү)
Хамаанданан
1-кы миэстэ - Анатолий Антонов, Дмитрий Парфенов, Кузьма Острелин (Нөмүгү)
2-с миэстэ – Николай Андреев, Владислав Никифоров, Юрий Никифоров (Орто Дойду хам.)
Абсолютнай чөмпүйүөн
Алта бастыҥ көрдөрүүлээх бэргэн ытааччылар киирсиилэрин түмүгэр бастыҥ ытааччы уонна абсолютнай чөмпүйүөн үрдүк аатын Николай Андреев ылыан ылла.
Уйбаан УЙГУУРАП,
ааптар хаартыскаҕа түһэриитэ
