Күрэҕи Лена Бочкарева, Николай Горохов көҕүлээн ыыттылар. Иккиэн эдэр салайааччылар. Биэс хоһуун сылгыһыт кытынна.
Эбээн-Бытантайга табаны, саха ынаҕын иитиини тэҥэ сылгыны бэрт саталлаахтык көрөллөр-харайаллар. Утумнаан иитии сайдар, эдэрдэр бу эйгэҕэ ылсалларыттан киһи үөрэр эрэ.
Сылгыһыттар күнү- түүнү, ардаҕы-куйааһы, хоту сир хойуу бырдаҕын билиммэккэ бэлэмнэнэн, аттарын баайан, уһуйан сүрдээх тыҥааһыннаах киирсии буолла. Көрөөччүлэр «ыалдьар» ыһыылара-хаһыылара биир кэм оргуйан олордо, кыралыын-улаханныын, эдэрдиин-эмэнниин долгуйа кэтэһии ипподром хонуутун толордо.
Ат сүүрдүүтэ ханна да бэркэ биһирэнэр успуорт көрүҥэ буоларын маннык күрэхтэр туоһулууллар. Маны тэҥэ ханнык ат кыайарын сабаҕалааһын, сүүрүк сылгылары ырытыы, астына — дуоһуйа көрүүнү кытта былыр былыргыттан кэлбит үгэһи тутуһан уксуу да баар буолла. Быйыл саҥа аттар, эдэр сүүрдээччилэр киирбиттэрэ сабаҕалааччыны салыннарда, уксааччыны мунаахсытта, долгуйа кэтэһии, эрэнии көрөөччүнү күөйэ тутта.
«Хоһуун сылгыһыт» күрэххэ таба салаатын кытта тэҥинэн тутан дьарыктанар эр бэртэрэ кыттыбыттара көрөөччү сүргэтин көтөхтө, сөхпүт — хайҕаабыт да үгүс буолла.
Ааптар: Яна РОЖИНА.
Хаартыска: Марианна СЛЕПЦОВА.
