Манна барыта сэттэ дойдуттан 800-тэн тахса спортсмен күөн көрүстэ, күрэс былдьаста. Бу күрэхтэһиигэ аан дойду чемпиона Петр Петрович Баттахов капитаннаах алта киһи баран становой тягаҕа (тобукка дылы штанганы өрө тардыыга) ситиһиилээхтик кытыннылар.
Бэйэлэрин ыйааһыннарыгар уонна саастарыгар Европа чемпионун үрдүк аатын ыллылар Николай Константинов (75 кг, 60-64 саас), Иван Копырин (75 кг, 45-49 саас), Андреян Харитонов (75 кг, 50-54 саас), в Петр Баттахов (100 кг, 65-69 саас), Макаров Иннокентий (100 кг, 55-59 саас), Петр Наумов (67,5 кг, 70-74 саас). Ону тэҥэ спортсменнар бары аны күһүн ыытыллар аан дойду чемпионатыгар кыттарга көҥүл ыллылар.
Бу ситиһиилэринэн убаастабыллаах ветераннарбыт саха омук киил эттээҕин-сииннээҕин, хойукка дылы чэгиэн-чэбдик сылдьарын өссө төгүл дакаастаатылар уонна эдэр ыччакка үтүө холобуру көрдөрдүлэр, инникитин пауэрлифтинг Саха сиригэр киэҥник сайдарыгар олук уурдулар.
Интэриэһинэйэ диэн, чемпионнар бары мас тардыһыытынан утумнаахтык дьарыктаммыт уонна ити көрүҥ Саха сиринээҕи маастардарынан буолаллар.
