Бу күрэхтэһии кибоксиҥҥа ССРС-тан бастакы аан дойду чөмпүйүөнэ, Октябрьскай нэһилиэгиттэн төрүттээх биир дойдулаахпыт Александр Иванов төрөөбүтэ 50 сылыгар ананна. Барыта 11 паара сытыы киирсиилэри көрдөрдүлэр. Кинилэр истэригэр эдэр да буоллаллар, номнуо элбэх ситиһиилээх, ааттаах-суоллаах спортсменнар бааллар.
Ньурба куоратыгар ыытыллыбыт кикбоксиҥҥа күрэхтэһиигэ өрөспүүбүлүкэ, ДВФО, Бүтүн Арассыыйатааҕы күрэхтэһиилэр, Аан дойду Кубогын кыайыылаахтара уонна призердара кииристилэр. Бастакынан Ярослав Габышев 30 кг ыйааһыҥҥа утарсааччытын, СӨ сүүмэрдэмит хамаандатын чилиэнэ, Намтан сылдьар Ариан Поповы кыайан, улууһугар бастакы очукуотун аҕалла. Күрэхтэһии саамай ааттаах-суоллаах спортсменнара, Арассыыйа уонна норуоттар икки ардыларынааҕы таһымнаах күрэхтэһиилэр кыайыылаахтара уонна призердара Арчылан Семенов (Усуйаана) уонна Тит Винокуров (Ньурба, Малыкай) сытыы киирсиилэрэ кэрэхсэбиллээх буолла. Кыайыылаах тахсыбыт Арчылан Семенов эмиэ Ньурбаттан төрүттээх эбит, дьоно малдьаҕардар. Уопсай түмүккэ 7:4 ахсаанынан Ньурба улууһун хамаандата кыайыылаах таҕыста.
Ярослав Габышев кэнниттэн ньурбалартан Роберт Васильев (33 кг), Владислав Данилов (36 кг), Андрей Ефремов (40 кг), Дьулустан Сысолятин (50 кг), Виктор Ломпоров (57 кг), Юрий Семенов (67 кг) кыайыыны ситистилэр. Атыттар даҕаны интэриэһинэй уонна сытыы киирсиилэри көрдөрдүлэр.
Кыайыылаахтар сыаналаах бириистэринэн уонна кубоктарынан наҕараадаланнылар. Күрэхтэһии бочуоттаах ыалдьыттарынан биир дойдулаахпыт, Александр Иванов 1-кы тренерэ, РФ үтүөлээх тренерэ Артур Пахомов, РФ ыччакка хамаандатын ыстаарсай тренерэ Николай Хромов уонна Александр Иванов төрөппүт кыыһа Динара Скрябина буоллулар.
Николай Хромов:
— Үчүгэй, олус интэриэһинэй турнир. Уолаттар умгусуйан туран киирсэн, син ситиһиилээх уонна үчүгэй тиэхиньики көрдөрдүлэр. Олус кэскиллээх.
Артур Пахомов:
— Ньурбаҕа туох да аһара үчүгэй күрэхтэһии буолла. Биһиги уолбут, иитиллээччибит Александр Иванов төрөөбүтэ 50 сылыгар анаммыт күрэхтэһии үрдүк таһымнаахтык ааста. Ньурба ыччаттарыттан эдэр, кыахтаах, бэйэтин улууһун, Сахатын сирин уонна Арассыыйа аатыттан улахан түһүлгэлэргэ киирсэр байыастары иитэ сатыахтаахпыт. Онон бу күрэхтэһии саамай сөпкө барда. Оҕолор бэйэлэрин саастарыгар бэртээхэй киирсиилэри көрдөрдүлэр.
Динара Скрябина:
— Мин аҕам улахан кыыһабын, өссө балтым Камилла баар. Икки оҕолоохпун, аҕам Александр Егорович билигин тыыннааҕа буоллар, икки бэртээхэй сиэн эһэтэ буолуо этэ. Мин эргиэн эйгэтигэр үлэлиибин, улуустарга маҕаһыыннары арыйабыт. Аҕам төрөөбүтэ 50 сылыгар кини төрөөбүт дойдутугар маннык күрэхтэһии ыытылларынан киэн туттабын. Маннык күрэхтэһиилэр Ньурбаҕа сыл аайы ыытыллалларыгар, өссө элбэх спортсмен кэлэригэр уонна Ньурба спортсменнарыгар салгыы сайдалларыгар , улахан кыайыылары уонна инникитин биһиги өрөспүүбүлүкэбит аатыттан бөдөҥ түһүлгэлэргэ ситиһиилээхтик кытталларыгар баҕарабын.
Күрэхтэһии кылаабынай судьуйата Руслан Саввинов:
— Ньурба улууһун спортсменнарын уонна өрөспүүбүлүкэ 1-кы, 2-с уонна 3-с нүөмэрдэрин матчевай күрэхтэһиилэрин ыыттыбыт. Састаап даҕаны күүстээх. Бу күрэхтэһии тамыһа олох үчүгэй. Улуус салалтатын көмөтүнэн салгыы сайыннаран иһиэххэ наада. Маннык күрэхтэһиилэр улуустарга буолаллара хайаан да наада. Биһиги маны сайыннаран, оҕолору күөдьүтэн, күрэхтэһии оҥорон истэхпитинэ биирдэ сайдар кыахтаахпыт. Онон маннык күрэхтэһиилэр стратегическай суолталаахтар.
Геннадий АНТОНОВ, Газета «Ньурба – Огни Нюрбы»
