ССРС уолаттарын үрүҥ көмүс призера, ыччаттарга уонна улахан дьоҥҥо РСФСР чөмпүйүөнэ, ЦСКА хамаандатыгар тустан ССРС чөмпүйүөнэ, Болгарияҕа норуоттар икки ардыларынааҕы турнир кыайыылааҕа, Варшавскай дуогабар доҕордуу армияларын үрүҥ көмүс призера, Саха АССР үс төгүллээх чөмпүйүөнэ, уо.д.а улахан түһүлгэлэр кыайыылааҕа, призера, 1964 с. РСФСР чемпионатыгар төрдүс миэстэлэммит, 82 саастаах Петр Попов болҕомто киинигэр турда.
Саха Өрөспүүбүлүкэтин сүүмэрдэммит хамаандаларын бэлэмниир Киин дириэктэрэ Михаил Пахомов көрсүһүүнү аһар киирии тылыгар, Петр Егорович Попов бүгүҥҥү тустууктарбыт курдук эдэр-эмэн саастарыгар көҥүл тустуу сайдарыгар үгүс көлөһүнүн тохпут, кылаатын киллэрбит бөҕөс буоларын, бэйэтин уопутуттан үллэстэ, олоххо бэйэни булунарга, үлэлииргэ сүбэ-ама биэрэ кэлбитин билиһиннэрдэ.
Көрсүһүүнү көҕүлээн тэрийбит, улуу тренер Д.П. Коркин иитиллээччитэ, ССРС спордун маастара, өрсөпүүбүлүкэ спорка албан аатын Музейын дириэктэрэ Михаил Друзьянов Олимпийскай чөмпүйүөн Павел Пинигини кытта бииргэ үөрэммитин, эрчиллибитин, албан аатырбыт бөҕөс оҕо сааһыгар биллибэккэ гынан баран, Киевтээҕи физкультурнай институкка тыыллан-хабыллан тахсыбытын, Олимпиадаҕа тиийэ тустуу бары чыпчаалларын эрдээхтик дабайбытын; бу көрсүһүүнү спорт миниистирэ Леонид Спиридоновтыын уонна Михаил Пахомовтыын ыытарга сүбэлэспиттэрин, үгэскэ кубулутуллуохтааҕын; Дьокуускайга 1964 сыллаахха “Спартак” стадионугар буолан ааспыт Россия чемпионатын 100-кэ кыттыылаахтарыттан, аҕыйах буолан хаалбыттарын, олор истэригэр Владимир Данилов, Николай Спиридонов, көрсүһүүгэ кыайан кэлбэтэхтэрин, историческай түгэн буоларын бэлиэтээтэ.
Ол 61 сыл аннараа өттүгэр “Кыым” хаһыакка тахсыбыт хаартыскалардаах балаһаны көрдөрө-көрдөрө, Алквиад Иванов, Петр Алексеев, Альберт Захаров, Эдуард Гегеев чөмпүйүөннээбиттэрин, Николай Гоголев, Алексей Ермолаев, Владимир Данилов үрүҥ көмүс, Николай Алексеев боруонса мэтээллэри ылбыттарын, саха бөҕөстөрүн ити үрдүк көрдөрүүлэрэ хатылана илигин, куоһарыллыахтааҕын; Сунтаар Элгээйититтэн төрүттээх-уустаах Петр Попов туһунан; 2028 с. Д.П. Коркин 100 сыла бэлиэтэнэрин уонна АХШ Лос-Анджелес куоратыгар Олимпийскай оонньуулар буолалларын, бүгүҥҥү бөҕөстөр, тренердэр Саха сиригэр Олимпийскай мэтээли аҕалар соругу толоруохтаахтарын; физкультурнай-спортивнай Сэбиэт тэриллэн эрэрин билиһиннэрдэ.
Бэйэтин кэмин күүстээх бөҕөһө Петр Егорович Попов олоҕун тустууга анаабытын, тренер Н.Н. Волков салалтатынан хайдах дьарыктаммытын, туох сүрүн ситиһиилэрдэммитин, 1964 с. Россия чемионатын түгэннэриттэн, армияҕа сулууспалыы сылдьан ыҥырыллан, 70 кг ССРС чөмпүйүөннэрин Нугзар Журулины, Юрий Гусовы кытта тустубутун билиһиннэрдэ. Воронеж бөҕөһө Головинныын хапсыһарыгар баһыйан иһэн, аһары үлүһүйэн, киирэн биэрэн хотторбутун, кыһыылаахтык төрдүс миэстэлэммитин кэпсээтэ. Эдэр бөҕөстөр ортолоругар кыахтаах уолаттар баалларын, кыайалларыгар эрэнэрин, ситиһиини баҕаран алгыһын анаата.
Көрсүһүү 1964 сыллааҕы Россия чемпионатын значоктарын Россия-2025 чемпионатыгар кыттыыны ыла бараары сылдьар сүүмэрдэммит хамаанда тустууктарыгар туттартааһынынан түмүктэннэ.
Баһылай Посельскай
