Оонньуулар үрүҥ көмүс призера инна Рыбкина 6 №-нэн бастакы этаапка барда уонна Нина Садовскаяҕа бастакынан аҕалан биэрдэ эрээри, үөрүүбүт уһаабата.
Иккис этаапка сүүрбүт Нина Садовская утарсааччыларыттан лаппа хаалан, алтыһынан кэлэн эстафетаны Оонньуулар үрүҥ көмүс призера Вадим Ширяевка аҕалан, онтон ыла өрүттүбэтибит. 10 км төрдүс буолбут Павел Сергеев бэсиһинэн түмүктээтэ. Дальнай Восток хамаандата бастаата, Кузбаас иккис, Сибиир үһүс бириистээх миэстэлэннилэр. Москвалар кэннилэриттэн тилэх баттаһа биһи оҕолорбут бэһис буоллулар.
Хамаанда тренерэ Виктор Леонидович Васильев санаатын кытта үллэһиннэ: “Нина Садовская баар кыаҕынан сүүрдэ. Утарсааччыллара Россия сүүмэрдэммит хамаандатыгар дьарыктанар кыргыттар улаханнык хааллардылар. Күн-дьыл мэһэйдээбэтэ, хайыһардьыттарга ханнык баҕарар халлаан үчүгэй. Сайын түөрт сбору ааспыппыт, күһүн Сыктывкарга Россия хайыһарын суолугар кыттыбыппыт, Ижевскэйгэ Нина Бүтүн Россиятааҕы күрэхтэһиини кыайбыта. Россия 16-гар диэри саастаахтарыгар эмиэ үчүгэйдик сүүрбүтэ. “Выключатель” даиэн ааттанар бүтэһик дабайыыга эстэн, ситтэрдэ. Тилэх уопсан иһэр утарсааччылара арыый да сэнилээх буолан биэрдилэр. Баҕар, дьарыгар туох эрэ сыыстарыы баар буолуон сөп. Дьиҥинэн, бэлэмнэниибит олус үчүгэй этэ. Үбүлээһин да көрүллүбүтэ. Экипировканан, инбэнтээринэн, хайыһар маастарынан толору хааччыллыбыппыт. Хайыһары маастыыр анал идэлээх үлэһиттэрбит эҥкилэ суох үлэлээтилэр. Тоҕо диэтэххэ, “сприҥҥэ” олус бэркэ кытынныбыт. Бу саҕалааһын эрэ. Иннибитигэр элбэх үлэ күүтэр”.
Бүгүн эстафетаҕа мөлтөх кыттыы буолла. Мэтээл кэлэригэр эрэлбит улахан этэ. Утарсааччыларбыт күүстэрэ бэрт эбит. Ханныгын да иһин, Сибиир, Дальнай Восток, Урал Россия лидердэрэ. Бастыҥнар бары кэлэн кытыннылар.
Сарсын “Доҕордоһуу эстафетата” буолуоҕа, онно араас хамаандалар оҕолоро сэрэбиэй быһыытынан буккаас хамаандаларынан күрэхтэһиэхтэрэ. Хамаандалар аайыттан биирдии спортсмен талыллан кыттыыны ылыахтара. Кыргыттар 4х3 км, уолаттар 4х5 км тус-туһунан стаартыахтара. Дьэ, онно, оҕолорбут миэстэҕэ тиксиэхтэрин, бастыахтарын да сөп.
Онон, мэтээл кэлиэн сөптөөх, бүтэһик, сарсыҥҥы күнү күүтэбит.
Баһылай Посельскай
