Тэрээһиммит иһинэн «Сиинэ паарката угуйар» диэн дьиэ кэргэттэргэ тематическай спорт күрэҕэ ыыттыбыт. Күрэхпит сыалынан буолла оҕолорбут оҕо саастарын дьолунан-үөрүүнэн толоруу, төрөөбүт дойдуга тапталы иҥэрии уонна дьиэ кэргэн айылгыта тупсарыгар, бигэ туруктаах чөл олоҕу пропагандалааһын буолар.
Бырааһынньыкпытын бары оҕолор, төрөппүттэр, иитээччилэр парадтаан киирэн, улууспут Өрөгөй ырыатынан арыйдыбыт.
«Сиинэ паарката угуйар» диэн күрэхпит олус интэриэһинэй оонньуулардаах буолла. Ол курдук мүччүргэннээх сырыылардаах, сындылҕаннаах айаннаах, булугас өйү тургутар түһүмэхтэри дьиэ кэргэттэрбит сытыытык киирсэн, күрэхтэһэн аастылар. Бастакы түһүмэххэ «Сиинэ пааркаҕа айан» диэнҥэ дулҕалаах сиринэн айанҥа «Олонхо кэскилэ» инники кэллэ. Иккис түһүмэххэ «Үрүйэни туорааһынҥа» (ыстаныы) саамай уһуну ыстананнар «Олонхо кэскилэ» кыайда.
Үһүс түһүмэххэ «Сиинэ өрүскэ байдаарканан устуу» эмиэ «Олонхо кэскилэ» инники күөнҥэ түстэ.
Дьэ, дьиэ кэргэттэр Сиинэлэригэр айаннаан кэлэн олохторун оҥостон сирдэрин-уоттарын аһатан-алҕаан, Сиинэ айылҕатын кэрэхсээн, «Бултуубут-отоннуубут» диэн күрэххэ тургутууну аастылар. Аҕалар кус ыта киирдилэр.
Онуоха элбэх куһу «Олонхо кэскиллэрин» аҕалара бултаатылар.
Ийэлэр күөгүлээн күрэхтэстилэр.
Саамай элбэх балыгы «Родничок» ийэлэрэ хаптардылар.
Онтон оҕолор отонноон күрэхтэстилэр, саамай отонньут оҕолорунан «Солнышколар» буоллулар.
Ол кэннэ сынньана таарыйа эстафеталаан күрэхтэстилэр. Манна «Олонхо кэскилэ», «Солнышколар» биэтэккэ тэҥҥэ кэллилэр. Онтон өйү тургутар уонна канат тардыһыытыгар «Родничок» хамаандата тэҥнээхтэрин булбата.
Күрэх түмүгүнэн саамай түргэн эрчимнээх дьиэ кэргэттэрдээх «Олонхо кэскилэ» буолла. Иккис бочуоттаах миэстэни «Родничоктар» ыллылар. «Солнышколар» үһүс миэстэҕэ тигистилэр.
Бу курдук оҕолорбут, төрөппүттэрбит Сиинэ пааркатын кытта билсэн, олус үөрэн-көтөн, сүргэлэрэ көтөҕүллэн тарҕастылар.
Ньургустана АБРАМОВА,
«Родничок» оҕо уһуйаанын старшай иитээччитэ,
Бэрдьигэстээх, Горнай улууhа
