Ону 2025 сыл түмүктэрэ көрдөрөллөр. Студеннар Россия таһымыгар, Бүтүн Россиятааҕы, норуоттар икки ардыларынааҕы турнирдарга, научнай-практическай конференцияларга үчүгэй көрдөрүүлэрдээхтэр. Аккредитациялары ааһаллар.
Институт ректора Иннокентий Готовцев быһаарарынан, Россия спорка Министиэристибэтигэр 2036 сылга диэри сайдыы программатын оҥорон, ол иһигэр үбүлээһини ситиһиилээхтик көмүскээтилэр. Үөрэх, наука эйгэтигэр 50 мөл үп-харчы көрүлүннэ. Өрөспүүбүлүкэ биологоияҕа институтун үлэһиттэрин кытта түһэрсиллибит дуогабарга олоҕуран, олохтоох сырьеттан эти-сиини, чуолаан, студеннары, күрэсчиттэри күүстээх эрчиллиилэрин кэнниттэн күүс-уох киллэрии уонна иҥэмтэлээх аһылык хайысхаларынан үлэлэр ыытыллыахтара. Мас тардыһыытыгар саҥа, ураты тренажердар оҥоһулланнар күрэсчиттэр былчыҥнарын сайыннарыыга туһуланыахтара.
Дойду физкультураҕа-спорка үрдүк үөрэхтэрин кыһаларыгар төрүт көрүҥнэри сайыннарыыга этии киллэрэннэр, Бүтүн Россиятааҕы Киин статуһун ыллылар. Онон, федеральнай институттар программнай сайдыыларын стандаартарын оҥорор, олоххо киллэртэрэр кыахтаннылар. А.К. Акимов президиэннээх Аан дойдутааҕы мас тардыһыытын федерацията Чурапчы институтугар Аан дойдутааҕы Академияны аста. Россия мас тардыһыытыгар федерациятын президиэнэ М.Д. Гуляев Академия ректорынан ананна. 2026 сылтан манна тренердэри, судьуйалары уонна мас тардыһыытынан дьарыктанар омук дойдуларын үөрэтии ыытыллыаҕа. Аан дойду төрүт күрэһин Киинэ үөскэтилиннэ.
Ыччаттары, төрөппүттэри сэҥээрдэр бырайыактар бааллар. Холобур, генетическай анализтары ыланнар тыйыс тымныылаах Сахабыт сиригэр күрэсчит функциональнай сайдыытыгар методика оҥоһуллуоҕа уонна үөрэххэ киириигэ сүүмэрдээһин ыытыллыаҕа. Ол курдук, Арктическай улууска олорор оҕолортон ылыллыбыт анализтарынан көрөн, туһааннаах оҕо-ыччат күрэс ханнык көрүҥүнэн дьарыктаныан сөбүгэр үлэлэһиэхтэрэ. Көрүллүблүт федеральнай үп-харчы онно туттуллуоҕа. Өрөспүүбүлүкэ социальнай-экономическай уонна культурнай сайдыытыгар ханнык идэлэр баар буолуохтарын сөбүгэр туһулаан үлэ барыаҕа. Араас идэлэр салаалара арыллыахтара. Институт кэскиллээхтик сайдыытыгар туһуламмыт үөрэхтээһин лабораториялара, кафедралар инбэнтээрдэринэн хааччыллыахтара. Билигин үлэлии турар улахан уонна сиэдэрэй үөрэх корпуһугар эбии тутуу бырайыага оҥоһуллан бүтэн эрэр. Ону таһынан, урут тутуллубут Д.П. Коркин спортивнай саалата, манеһа уонна ытыы тиирэ капитальнай өрөмүөнү ааһыахтара. Ити үөһэ ааттаммыт үлэлэргэ федеральнай үп-харчы көрүлүннэ.
Дойду тыатын сиригэр соҕотох институт 2026-2036 сылларга кэскиллээхтик сайдыытын программата Россия спордун Министиэристибэтинэн (М.В. Дегтярев) өйөбүлү ылан бигэргэннэ. Саха Өрөспүүбүлүкэтин бырабыыталыстыбатын, тустаах министиэристибэлэри, научнай кииннэри кытта бииргэ үлэлээһин дуогабардара түһэрсилиннэ.
Кэлэр сылларга Арктическай улуустары кытта ыкса үлэлэһэн, спортивнай кылаастар, орто үөрэхтэр филиаллара аһыллыахтара. Нерюнгригэ орто үөрэх Киинэ аһыллыаҕа. Чопчу сыаллаах-соруктаах үлэлэр бара тураллар.
Сүрүн болҕомто кадры иитиигэ ууруллар. Быйыл институт преподавателэ С.С. Гуляева докторскай диссертациятын көмүскээтэ. 2030 с. диэри уон кандидат көмүскэниэхтээх. Билигин бары дойду киин куоратарыгар үөрэнэ сылдьаллар.
Спорка студеннар федеральнай Кииннэрэ туруорсуллан тустууга, буулдьанан ытыыга уонна мас тардыһыытыгар үп-харчы көрүлүннэ. Күрэсчиттэр аһылыктара, кэлэр-барар айаннара, экипировкалара толору хааччыллыаҕа.
Үйэ чиэппэриттэн ордук кэм үлэлиир инстиутут ректора Иннокентий Иннокентьевич Готовцев бу күннэргэ государственнай аттестацияны ааспытынан уонна кэллэктиибин отчуоттуур-быыбардыыр мунньаҕар ректорынан хат быыбардаммытынан эдэрдэлиибит! Аймньылаах үлэ саҥа кэрдииһэ саҕаланна. Ситиһиилэри, үрдүк кирбиилэри баҕарабыт!
Баһылай Посельскай
