Өрөспүүбүлүкэ Федерациятын президиэнэ, “Дыгын оонньууларын” сүрүн үбүлээччитэ, “Прогресс” тутуу тэрилтэтин салайааччыта Алексей Пинигин, вице-президиэнэ Михаил Друзьянов, “Дыгын оонньууларын” үс төгүллээх муҥутуур кыайыылааҕа Иннокентий Макаров бочуоттаах ыалдьыттарынан кыттыыны ыллылар.
Д.Ф. Ходулов аатынан норуот театрыгар күрэсчиттэр, тренердэр, спонсордар чиэстэннилэр. Саха дэгит күрэһин түһүлгэлэрэ, “Манчаары оонньууларын” түгэннэрэ улахан экраҥҥа көрдөрүлүннүлэр, уус-уран самодеятельность кыттыылаахтара кэрэ-чуор толорууларынан өрөспүүбүлүкэ таһымнаах тэрээһини киэргэтэн-тупсаран биэрдилэр.
Өрөспүүбүлүкэ улахан күрэхтэһиилэригэр үксүлэригэр бастаталыыр Мэҥэ-Хаҥалас улууһугар кус быһый, ат бөҕө, күүстээх-уохтаах, эргиччи кыахтаахтар урут да бааллара, билигин да бааллар. История быыһын сэгэттэххэ, саха дэгит күрэһин сайдыытыгар кылааттарын киллэрбит “Дыгын оонньууларын” кыттыылаахтара Владимир Шарин, Сергей Кузьмин, Александр Аринкин, Давыд Колесов, Егор Свинобоев уо.д.а. ааттара киэҥник биллэр. Улуус баһылыга Тихонов Дмитрий Иванович көҕүлээһининэн, улуустааҕы саха дэгит күрэһин федерацията 2023 сылтан тэриллэн үлэлиир. Нэһилиэктэр баһылыктара, тэрилтэлэр салайааччылара, урбаанньыттар федерация чилиэннэрэ. “Мегинские автомагистрали” тэрилтэсалайааччыта Артуш Шагинян үбүлээһиҥҥэ көмөлөһөр.
Түмсүүлээх, көдьүүстээх үлэлэр ситиһиилэргэ тиэрдэллэр. Саха Өрөспүүбүлүкэтин дэгит күрэс федерациятын сыанабылынан 2024 сыл түмүгүнэн өрөспүүбүлүкэҕэ “Бастыҥ саха дэгит күрэһин федерацията”, 2025 сыл түмүгүнэн Мэҥэ Хаҥалас улууһун "Бастыҥ спорт федерацията" анал ааттары ылаттаабыттара. Саха Өрөспүүбүлүкэтин дэгит күрэһин хамаанданан бастыыр иһин Кубогар Мэҥэ-Хаҥалас хамаандата икки төгүл үһүс бириистээх миэстэлэри ылаттаабыта. Ыччаттар ортолоругар ыытыллар “Боотурдар оонньууларыгар” эмиэ икки сыл утуу-субуу бастаабыттара. Ааспыт сыл Тааттаҕа ыытыллыбыт “Манчаары оонньууларыгар” Саха дэгит көрүҥнэригэр үһүс миэстэлэнэннэр улуус муҥутуур кыайыылааҕынан тахсарыгар кылааттарын киллэрсибиттэрэ. 2023 с. “Бэргэн оонньууларыгар” кыайбыттара, миэстэлэспиттэрэ. Орто уонна улахан саастаах оҕолорго Арсен Федоров, Владимир Новгородов, Руслан Слепцов, Дамир Попов, Дмитриев Саид, Даниил Слепцов, Спартак Винокуров, Лия Дмитриева, Сайаана Андросова, Алина Федорова, Тома Сыдыкбекова өрөспүүбүлүкэ наҕараадалыыр үктэллэригэр турбуттара. “Игры Дыгынчиков” күрэскэ Айдын Петров бастаабыта. Ыччаттар ортолоругар Саха Өрөспүүбүлүкэтин чемпионатыгар Руслан Слепцов үһүс, Айаана Константинова бастаабыта. Студеннар ортолоругар ыытыллыбыт өрөспүүбүлүкэ түһүлгэтигэр Арсен Федоров, “Өбүгэлэр оонньуулара” фестивальга Геннадий Пак, Владимир Новгородов, Вера Сергеева, Надежда Стручкова улуустарын чиэһин ситиһиилээхтик көмүскээбиттэрэ. Түмсүүлээх буолуу, биир ситимнээх үлэ арылхай көстүүлэрэ.
Бырааһынньыктыы тэриллибит дьоро киэһэҕэ бастыҥнарга туһуламмыт эҕэрдэлэр дуораһыйдылар, өйдөбүнньүк бэлэхтэр туттарылыннылар. Улуус баһылыга Дмитрий Иванович Тихонов, физическэй культура уонна спорт управлениетын начальнига Иннокентий Алексеевич Баишев, ыччаттар олоххо миэстэлэрин булууларыгар иитии, өйөөһүн сыала-соруга турарын, күрэсчиттэр көлөһүннэрин тохпут, тренердэр айымньылаах үлэлэрэ тиллэрин бэлиэтээтилэр, мас тардыһыытын муҥутуур кыайыылааҕар Максим Марковка, “Манчаары оонньууларын” дэгит күрэһигэр хамаанданан боруонса призердарыгар Элеонора Ксенофонтоваҕа, Сахайаана Олесоваҕа, Тома Сыдыкбековаҕа, Захар Винокуровка, Владимир Ксенофонтовка, Геннадий Пакка, Геннадий Васильевка, Айдыын Петровка, физкультура учууталыгар Эдуард Егорович Жирковка махтал суруктары, өйдөбүнньүк бэлэхтэри туттартаатылар.
Мэҥэ-Хаҥалас улууһун Саха дэгит күрэһин федерациятын бэрэссэдээтэлэ Вячеслав Иннокентьевич Санников, бэрэссэдээтэли солбуйааччы Афанасий Павлович Максимов “Бастыҥ федерация” аатын ылбытарыттан өрө көтөҕүллэннэр, үлэлэрин далааһынын кэҥэппиттэрин, “тутум эргиирэ” өрөспүүбүлүкэ таһымнаах фестивалы тэрээһиннээхтик ыыппыттарын, 171 киһи кыттыбытын, бу кулун тутарга оҕолорго өрөспүүбүлүкэ чемпионатын ыытарга бэлэмнэнэллэрин, нэһилиэктэргэ үлэ көхтөөхтүк барарын иһитиннэрдэ, итиэннэ, күрэхтэһиилэри тэрийэр, үбүлүүр Мэҥэ нэһилиэгин баһылыга Ньургун Владимирович Габышевка, “Талер” спорт маҕаһыыннаах урбаанньыт Дмитрий Исакович Катакиновка, Чурапчы физкультураҕа уонна спорка институтун тренеригэр Денис Васильевич Заболоцкайга, В.П. Уваров аатынан Олимпийскай эрэл оҕо спортоскуолатын методиһыгар Анна Иннокентьевна Охлопковаҕа, суоппар Андрей Васильевич Ивановка, Павловскай орто оскуолатын тренеригэр Иван Владимирович Колосовка, М.П. Габышев аатынан Балыктаах орто оскуолатын тренеригэр Александра Алексеевна Семеноваҕа, Ф.К. Попов аатынан Баатара орто оскуолатын тренеригэр Анатолий Ефремович Сосиҥҥа, Майа спортоскуолатын тренеригэр Лариса Иннокентьевна Семеноваҕа, “Түмэл” общественнай түмсүү салайааччыта Мария Дмитриевна Лукинаҕа махтал суруктары, өйдөбүнньүк бэлэхтэри туттардылар.
II-с Наахара нэһилиэгин баһылыга Петр Петрович Никитин, Мэҥэ нэһилиэгин баһылыга Ньургун Владимирович Габышев; спорт көҕүлээччитэ, улууска “Байанай” күрэҕин төрүттээччи Дмитрий Николаевич Сидоров; куоракка “Мэҥэ” түмсүү салайааччыта Федор Федорович Белолюбскай; Чурапчы институтун тренерэ Денис Васильевич Заболоцкай; Павловскай орто оскуолатын 10 кылааһын үөрэнээччитэ, “Бэргэн оонньуулара-2023” кыайыылааҕа, 2024 с. үрүҥ көмүс призера Владимир Новгородов харда тылары эттилэр.
Чуолаан, дэгит күрэс сүрүн тренерэ Темир Абдыкалыевич Сыдыкбеков элбэх үлэ ыытыллар буолан, көрдөрүүлэр сыллата үрдээн иһэллэрин, ол курдук, 2022 с. ахсыс миэстэлэммиттэрин, 2023 с. иккис, 2024, 2025 сс. бастакы миэстэлэри ылаттаабыттарын, Алексей Никифоров кэриэһигэр өрөспүүбүлүкэ хамаанданан күрэхтэһиитигэр Денис Колесов, Арсен Федоров, Николай Сивцев, Василий Ильин, Константин Иванов, Арсен Колосов, Даниил Слепцов, Иван Устинов, Павел Гуляев, Анатолий Никитин, Дьулус Олесов, Петр Белолюбскай бастаабыттарын, үбүлээһиҥҥэ, футболкаларыгар тиийэ, көмөлөһөр куоракка “Мэҥэ” түмсүү салайааччытыгар Петр Петрович Белолюбскайга махтанарын, салгыы өйүүрүгэр, көмөлөһөрүгэр эрэлин биллэрдэ. Дэгит күрэскэ ситиһиилэрдээх оҕолорго, физкультура учууталыгар Александрия Егоровна Андросоваҕа, дириэктэри иитэр үлэҕэ солбуйааччы Екатерина Николаевна Поповаҕа махтал суруктары, өйдөбүнньүк бэлэхтэри туттартаата.
“Дыгын оонньууларын” сүрүн үбүлээччитэ, “Прогресс” тутуу тэрилтэтин генеральнай дириэктэрэ Алексей Семенович Пинигин болҕомтону үүнэр көлүөнэни иитиигэ туһаайда, ыччаттарбыт эттэрэ-сииннэрэ чиргэл, тэтиэнэх, өй-санаа өттүнэн сайдыылаах буолан тахсалларыгар хайысхалаах үлэ сүрүн сыалын-соругун кэпсээтэ. Уус-Алдан Бороҕонугар “Дыгын оонньууларын” сэттэ төгүллээх кыайыылааҕа Иван Белолюбскай бирииһигэр “Дыгын оонньууларыгар” 2-с сүүмэрдиир күрэхтэһии ыытыллан, бастакы, иккис, үһүс миэстэлэри ылаттаабыттар, туһааннааҕынан, 300, 200, 100 тыһ. солк. туттарыллыахтаахтарын, үһүс түһүмэх муус устарга Чурапчыга “Дыгын оонньууларын” үс төгүллээх кыайыылааҕа И.Ф. Макаров бирииһигэр буолуохтааҕын, үстүү путевкалар оонньоноллорун, үлэ инники былааннарын билиһиннэрдэ.
Саха дэгит күрэһин федерациялара улуустарга тэриллиилэрин ситиһиҥ, Мэҥэлэр уопуттарын батыһыҥ!
Баһылай Посельскай
