Аан дойдутааҕы оҕо-аймах Күнүгэр. Араас түгэннэргэ үгүстүк самнайдаспыт атаспын эҕэрдэлиибин уонна үөрүүтүн кытта тэҥҥэ үллэстэбин!
Убайа Иннокентийдыын, эдьиийинээн Настялыын кыра оҕо эрдэхтэриттэн аҕалара суох хааланнар, остуорас ийэлэригэр иитиллэн улааппыттара. Инньэ гынан, бэйэтэ да сэниэлээх уолчаан хайа да үлэни көрөн турбат, кыайыгас-хотугас, дьиэтигэр-уотугар “туһа киһитэ” этэ. Онуоха эбии, күөл уҥуор спортивнай интэринээт-оскуолаҕа үөрэммитэ таайан, спортсмен бэрдэ, лаптаҕа сүгүн таптарбат аһарыгас, өрөспүүбүлүкэҕэ тиийэ тахсыылаахтык күрэхтэһэр, бэйэтин лаппа кыанар, күүстээх-күдэхтээх, сымса-быһый ыччат буола тыыллыбыта-хабыллыбыта. Уһун переменаларга оскуола аттыгар турар икки квартиралаах, бытархай оҕолордоох Ньукулай, Элизабета Оконешниковтары кытта ыаллыы олорор, эргэ самнархай дьиэлэригэр уһун переменаларга кэлэммит, ийэлэрэ Настаа куппут үүттээх чэйин иһэн, саахырга былааммыт күөрчэхтээх килиэп сиэн “өл” хабарбыт.
Кэлин, Иннокентий Семенович Артемьев Саха АССР үтүөлээх тутааччыта, Бочуот Знага уордьан кавалера, Анастасия Степановна үлэ ветерана, сэрии оҕото. Тапталлаах кыра уоллара, бырааттара субуоталарга буолуталыыр үҥкүүлэргэ саҥа үөдүйэн эрэр “шейк”, “твист” үҥкүүлэри көрүөхтэн эриэккэстик, имигэстик хамсанан толортуура харахпар бу баар. Аныгы олох сайдыытын кытта тэҥҥэ хаамсара. Нэһилиэктэргэ, тыа оскуолаларыгар гастролларбытыгар сценаттан түспэт ырыаһыппыт, үҥкүүһүппүт - Герабыт.
Тохсус-онус кылаастарга волейболга күүстээх, суоһарыылаах охсуулардаах буолан, улахан дьоҥҥо сүүмэрдэммит хамаандаҕа киллэриллэн, уонна остуол тенниһигэр тэйиэккэлэс маҕан кыра мээчик туора ыстанар эрийиилэринэн, сытыы быһыыларынан өрөспүүбүлүкэ “Урожайыгар” чөмпүйүөннээбитэ, Хабаровскайга, Читаҕа Дальнай Востокка, Сибииргэ миэстэлэһэн кэлэрэ. “Чемпион” диэн суруктаах значоктарын иилинэн кэлэрин сөҕө-махтайа көрөрбүт. Спорду өрө туппут кылаас буоламмыт, буолуохтааҕын курдук ылынарбыт. Бастакы спортивнай разрядтаах спортсмен бэрдэ буолбута.
“Ат сүүрэр” алааһыгар буолуталыыр оройуон үөрэнээччилэрин сааскы-күһүҥҥү кросстарыгар, саамай ыарахан уһун дистанцияҕа сүүрэн бастаталыыра. Субуотунньуктарга “одинарка” матассыыкылыгар олороммут арҕаа “Бараада” үрэҕинэн хойуу тыаҕа тиийэрбит. Көхтөөх үлэ “күөстүү оргуйара, көр-нар, ырыа-тойук көҕүлүттэн тутуллара. Герабыт мас эрбээччилэртэн хаалбакка, мас хайытан бачырҕатарын, саһааннаан иһэрбит. Үөрэҕэр үчүгэй. Ыраас кыраһыабай буочарынан алгебра, химия уустук сорудахтарын иҥиннэрбэккэ суоттуур дьоҕурдааҕа. Учууталларын кытта толлубакка хаадьылаһара.
Оскуола кэнниттэн МПМК-ҕа дьиэ тутуутугар үлэлээн 3-4 разрядтаах болуотунньук аатын ылбыта. Тиихэй океаннааҕы Байыаннай-Морской флокка подводнай лодкаҕа үс сыл сулууспалаабыта. Аан дойдуну биир гына тилийэ көтөн сылдьыбыта. Моряктарга иҥэриллэр саамай үрдүкү “Старшина 1-ой статьи” званиелаах, “За дальний поход” бэлиэлэрдээх, хас да мэтээллэрдээх, сулууспа “туйгуна”, 1-кы кылаастаах специалист дьоһун ааттарын ылан эргиллибитэ. Эрилик-Эристиин совхозка уонна эргиэн систиэмэтигэр рабочайынан үлэлээбитэ. Новосибирскайдааҕы Потребкооперация институтун ситиһиилээхтик үөрэнэн ылбыт “Товаровед” идэтинэн баһылаабыта. Чурапчы оройуонун эргиэнин систиэмэтин бочуоттаах сынньалаҥҥа тахсыар диэри эппиэтинэстээхтик, үрдүк көрдөрүүлэрдээх салайбыта.
Биир кылааска үөрэммит кыыспытынаан Дьячковская Милалыын билсиһэллэригэр, төһө да биир кылааска үөрэннэрбит, сурук таһааччы этим. Оччолорго таптал оннук сэмэй, килбик буолара. Ол “сырам-өҥөм” халтайга хаалбатаҕыттан үөрэбин. Билигин Герасим Степанович уонна Людмила Дмитриевна Платоновтар уон оҕолоро бары норуот хаһаайыстыбатын араас салааларын тутаах үлэһиттэрэ, сүүрбэччэ сиэннэрдээхтэр, мурун бүөтэ хос сиэннэр улааталлар. “Күннэрэ-ыйдара”, күннээҕи олохторо-түбүктэрэ, сонуннара хас биирдии оҕолоруттан, сиэннэриттэн саҕаланар. Ыал сүрүн “баайа-дуола” - оҕо буоларын Платоновтар арылхайдык көрдөрөллөр. Оҕолор, сиэннэр кыттыһаннар, улахан дьиэлэрин аттыгар, ийэлээх аҕаларыгар быйыл саха бэртээхэй балаҕанын бэлэхтээтилэр. Аныгы моһуонунан киллэриллибит үйэ сиэдэрэй тутуута, тэлэгэһэ киэргэлэ буолан кылбайар. Дэлэй, тотоойу, минньигэс астаах ыаллар күндү-мааны ыалдьыттарын итии чэйинэн, арыылаах алаадьынан көрсөргө бэлэмнэр. Бу санаатахха, Герасим Степанович оҕо-аймах аан дойдутааҕы күнүгэр төрөөбүт буолан, дьиэ-кэргэн оҕо куттаах эбит диэххэ сөп.
Эйэлээх-эккэлээх, түмсүүлээх ыал ийэтэ-эбээтэ Людмила Дмитриевнаҕа Герой-ийэ үрдүк аата иҥэриллэн кылааспыт киэн туттуулара. Саха Өрөспүүбүлүкэтин “Любовь и верность”, “Семейная доблесть” бэлиэлэринэн наҕараадаламмыттара, Ил Дархан, Бырабыыталыстыба, спорт физическэй культураҕа уонна спорка Министиэристибэтин Бочуотунай Грамоталарынан, Махтал суруктарынан, сыаналаах бэлэхтэринэн наҕараадаламмыттара. С.А. Новгородов аатынан Чурапчы орто оскуолатын Бочуотун кинигэтигэр киллэриллибиттэрэ.
Пенсияҕа тахсан баран Герасим Степанович сытыы өйүн-санаатын, эдэрчии эрчимин бүтүннүүтүн общественнай үлэҕэ анаата. Улуус спорка Ветераннарын сэбиэтин бэрэссэдээтэлин, улуус үлэҕэ ветераннарын пленумун уонна Кырдьаҕастарын сэбиэтин, “Маарыкчаан” Потребобщество сэбиэтин чилиэннэрин, Чурапчы нэһилиэгин депутатын, Байыаннай”-Морской Флот общественнай тэрилтэтин бэрэссэдээтэлин быһыытынан түбүгэ, дьарыга элбэх. Күрэхтэһиилэр, дьаһаллар, түмсүүлэр көҕүлээччилэрэ, сүрүн боппуруостары туруорсааччылара, олоххо киллэрсээччилэрэ. 2017 сылтан Россия суруналыыстарын Сойууһун чилиэнэ. Спорт, ол иһигэр, остуол тенниһэ, волейбол, ат сүүрдүүтүн, бырааттыы Доҕордуураптар, “Чурапчы – спорт туоната”, Морфлокка сулууспа, эргиэн үлэтин, бииргэ үөрэммит оҕолорун тустарынан, уо.д.а. 15 кинигэлэр, спорт хаартысканан Быыстапкатын ааптардара. Өссө биир саҥа айымньыта күн сирин көрдө, “Чурапчы улууһун бочуоттаах гражданнара” кинигэтэ бу күннэргэ сүрэхтэниэҕэ.
Бар-дьонун туһугар түбүктээх үлэтэ билиниини, сөптөөх сыанабылы ылаллар. Бастыҥ тэрийээччи буоларын көрдөрөр Саха Өрөспүүбүлүкэтин Ветераннарын сэбиэтин Кубогынан, улуустааҕы “Саҥа олох” хаһыат И.С. Окоемов, спорду сырдатыыга А.К. Софронов ааттарынан суруналыыстарга бэриллэр бириэмийэлэр, улуус “Үрдэл” бириэмийэтин “Бастыҥ дьиэ-кэргэн – 2022” номинация лауреаттара. Чурапчы улууһун уонна Чурапчы нжһилиэгин бочуоттаах олохтоохторо дьоһун ааттардаах.
Куһунан, балыгынан маанылыы турар мичик аллайар Байанайдаах. Эдэр-эмэн кэмнэриттэн илдьэ сылдьар тэрийэр, салайар, түмэр дьоҕура өссө тупсан, сайдан иһэр. Дьиэ-кэргэнин, чугас аймах-дьонун хааччыйарын таһынан, тыанан-куоратынан оскуолатааҕы доҕотторун кытта күндүлүүр үтүө киһибит Герабыт буоллаҕа.
Эдэр-оҕо саастарыттан кылааспыт, оскуолабыт, нэһилиэгин, үлэлиир тэрилтэтин, оройуонун олоҕор-дьаһаҕар, үлэтигэр-хамнаһыгар, спордун сайыннарыыга олус көхтөөх, мэлдьитин инники күөҥҥэ сылдьар, уопсай дьыалаларга хамсатыылаах этиилэри оҥортуур, үлэ-олох сүрүн үөһүгэр сылдьар, улахан дьиэ-кэргэн тулхадыйбат тулааһынын, ыал аҕа баһылыгын Герасим Степанович Платоновы үбүлүөйдээх 75 сааһын томточчу туолбутунан итиитик-истиҥник эҕэрдэлиибит, улууһун, нэһилиэгин, бар-дьонун тустарыгар айар аартыгын арыллан истин, чэгиэн-чэбдик буол диэн баҕа санаа бастыҥын аныыбыт, киэн туттабыт!
Баһылай Посельскай
