Культурнай уонна спортивнай баай ис хоһоонноох программалар болҕомто киинигэр турдулар. Культура уонна сынньалаҥ пааркатын иннигэр баар Комсомольскай болуоссакка татардар дэриэбинэлэрэ дьэндэйдэ. Киин куорат олохтоохторунан уонна ыалдьыттарынан туолбут бааһынньыктыы симэнэн киэркэйбит болуоссакка федеральнай таһымнаах 25-ис Сабантуй үөрүүлээх быһыыга-майгыга аһылынна. Эҕэрдэлэр дуораһыйдылар.
Россия, Саха сирэ, Татарстан Өрөспүүбүлүкэлэрин госуlарственнай былаахтарын сэргэ Сабантуй былааҕа күөрэччи көтөҕүлүннүлэр!
Саха Өрөспүүбүлүкэтин Аҕа Баһылыга Айсен Николаев элбэх омук олорор уонна айар-тутар Сахабыт сиригэр, саха уонна татаар норуоттарын истиҥ, бырааттыы сыһыаннара өрдөөҥҥүттэн баарын, история саҥа кэрчик кэмигэр өйөһөн, биир өйүнэн-санаанан үлэлиирбитин, доҕордоһуунан күүстээхпитин, модун Россияны бигэ эрэллээхтик сайыннарарбытын, доҕордоһуубут үйэлэргэ салҕанарын бэлиэтээтэ. Татарстан Өрөспүүбүлүкэтин Президенэ Рустам Михтиханов Сабантуй бырааһынньыга тыһыынчанан сыллардааҕыта сааскы хонуу үлэлэр кэмнэригэр төрүттэммитин, татаардар Саха сирин, дьонун-сэргэтин ылынан, сөбүлээн олороллорун, айымньылаахтык уонна таһаарыылаахтык үлэлииллэрин, үүнэллэрин-сайдалларын, биир сомоҕо буолан Ийэ дойдубутугар кыайыылары уһансарбытын туһунан эттэ, махталын биллэрдэ. Омскай уобалас бырабыыталыстыбатын бэрэссэдээтэлин солбуйааччы Иван Колесник икки норуоттар доҕордоһууларын биһириирин биллэрдэ, ыалдьыттыы кэлэллэригэр ыҥырда.
Татарстан норуота түмсүүлээҕин, ил-эйэ аргыстааҕын итэҕэтиилээхтик көрдөрөр уус-уран самодеятельность маастардарын ырыалара-үҥкүүлэрэ көҕүллэриттэн тутулуннулар, ҮЛЭ уонна ДОҔОРДОҺУУ түмэр күүстэрин, кыахтарын арылхай көстүүлэринэн буолла, тыһыынчанан көрөөччүлэрин биһирэбиллэрин ылан, дохсун ытыс тыаһынан доҕуһуолланна! Атыы-тутуу дьаарбаҥката тэрилиннэ, татаардар төрүт тотоойу, минньигэс астара, ыалдьытымсах сыһыаннара үтүө-кэрэ, умнуллубат өйү-санааны үөскэттэ.
Н.Н. Тарскай аатынан “Туймаада” стадиоҥҥа саха мас тардыһыытын уонна татаардар “корэш” курдаһан тустууларын түһүлгэлэригэр күүстээх көрүҥнээх бөҕөстөр хапсыһыылара болҕомтону тарта. Муҥутуур абсолютнай кыайыылаахтарга мас тардыһыытыгар “Рысь-3 пикап” квадроцикл, “корэшка” Татарстан Президенэ туруорбут “Лада Гранта” массыына сүрүн бириистэр туруорулуннулар. Онон, интэриэс, сэҥээрии улахан буолла.
“Корэш” биһи хапсаҕайбытыгар, көҥүл тустууга маарыннаабат дьикти, ураты быраабылалардаах. Бөҕөстөр киһи тарбахтара киирэрэ гына синньигэс бииллэригэр бааллыбыт курдарыттан ыгыта тутуһан, эпсэри тардыһан, өрө көтөҕөн таһааран, “прогиб” албас курдукка маарыннатан, тас уорҕаларынан бырахсаллар. Утарсааччыгын оннук быраҕан санныларын хаптаҕайдарыгар түһэриигэ ыраас кыайыы бэриллэр. Ойоҕолото түһэриигэ - биир баал, төбөҥ кэтэҕинэн көбүөргэ тирэнэн быраҕыыга – икки баал бэриллэр. Бөҕөстөр иккиэн илиилэринэн тайаннахтарына баал бэриллибэт. Халыҥ ааттаах-суоллаах, маастардар бааллар. Биһигиттэн, көҥүл тустууну, хапсаҕайы, дзюдону, самбоны баһылаабыттар уонна классическай тустуунан дьарыктанааччылар холоннулар. Балачча сатабыллаахтарын көрдөрдүлэр.
Татарстан аатырбыт бөҕөһө, “корэшка” аан дойду үс төгүллээх чөмпүйүөнэ, Россия спордун үтүөлээх маастара Радик Салахов күрэхтэһии саҕаланыан иннинэ санаатын кытта улгумнук үллэһиннэ: “Суруйтарбыт бөҕөстөртөн сылыктаатахха, хамаандабытыгар уонна кэлбит ыалдьыттарга үчүгэй тустууктар бааллар. “Радик Салахов диэммин, “корэшка” аан дойду үс төгүллээх чөмпүйүөнэбин, үтүөлээх маастарбын. Төрөөбүт сирбэр-дойдубар, федеральнай да сабантуйдарга кыайыылардаахпын. Испииһэги көрдөхпүнэ, бэйэлэрин тустууларын көрүҥнэригэр, “корэш” да тустууга “международниктар”, спорт маастардара бааллар. Саамай үрдүк ситиһиилэрдээхтэрэ, арааһа, мин быһыылаахпын. Ол эрээри, сүрүн бириискэ “фавориппын” дэммэппин, ким күүстээҕин көбүөр көрдөрүөҕэ. Быраабылатын өттүнэн көҥүл тустуу уонна хапсаҕай “корэштан” улахан уратылардаахтар. Онон, аан бастаан холонор дьоҥҥо ыарахан буолуо. Түргэнник үөрэммиттэр утарсыыны оҥороннор үчүгэйдик тустуохтара. Хапсаҕайынан туста иликпин, истибитим, биһи көрүҥмүтүттэн олох атын. Хапсыһыылар эчэйиитэ суох аастынар, барыларыгар ситиһиини баҕарабын!”.
Радик Салахов абсолютнай бастыыр иһин ыйааһыннаахтарга чахчы кыахтааҕын итэҕэттэ, утарсааччыларын кыраһыабай быраҕыыларынан кылгас кэм иһигэр ыраастык хотуталаата. Муҥутуур кыайыылаах үрдүк аатын ылла. Хоту сир маанылаах тыыннаах табатын мөҕүһүннэрбитинэн көтөҕөн ылан модун санныгар сүгэн кэбистэ! Итиэннэ, Татарстан Президенэ туруорбут “Лада Гранта” массыынатын бэлэх тутта! Иккис миэстэҕэ Тюмень маастара Салават Абдуллин, бириистээх үһүс миэстэлэргэ саха бөҕөстөрө Никита Софронов уонна Гаврил Петров тигистилэр.
Итинтэн атын ыйааһыннар кыайыылаахтарынан уолаттарга Тешаев Мухамедали (Саха), Осипов Элдьар (Саха), Бурцев Уйгун (Саха); эр дьоҥҥо Гайнеев Дмитрий (Саха), Хакимов Артур (Татарстан), Петров Айаан (Саха), Пулодов Саймухтор (Саха) бастаатылар.
Күрэхтэһии үгэнигэр “хапсаҕайга” норуоттар икки ардыларынааҕы федерация президенэ Вячеслав Нестеров уонна “корэш” тустууга норуоттар икки ардыларынааҕы федерация президенэ Рамиль Нагуманов бииргэ үлэлээһин Сөбүлэһиитигэр илии баттастылар.
Күүтүллүбүтүн курдук, 85 кг диэри ыһыылаах-хаһыылаах мас тардыһыы киирсиилэригэр Сахабыт сирин күүстээх мадьынылара түһүлгэҕэ утарыта киирэн, иккилиитэ хотторбуттар туораан истилэр. Аан дойду чөмпүйүөннэрэ, норуоттар икки ардыларынааҕы кылаастаах спорт маастардара Егор Атласов (Уус-Алдан), Владимир Никитин (Амма) бириистээх үһүс миэстэлэннилэр.
Муҥутуур кыайыылааҕы быһаарар финалга түһүлгэҕэ аан дойду түөрт төгүллээх чөмпүйүөнэ, Россия спордун үтүөлээх маастара Павел Черноградскай (Уус-Алдан) уонна аан дойду чөмпүйүөнэ, норуоттар икки ардыларынааҕы кылаастаах спорт маастара, “Дыгын оонньууларын” абсолютнай чөмпүйүөнэ “Таас Боотур” Дьулустаан Ноговицын (Горнай) утарыта таҕыстылар. Абытайдаах киирсии 2:1 ахсаанынан Дьулустаан Ноговицын туһатыгар түмүктэннэ.
“Пикап-3 Рысь” квадроцикл хаһаайынын дьоһун аатын ылла: “Бары киирсиилэрим ыараханнык аастылар. Ол иһин кыайыым өссө минньийэргэ дылы буолла. Айылҕаҕа сылдьарбын, бултуурбун-алтыырбын сөбүлүүбүн. Иллэрээ сыл квадроцикл ылан турабын. Онон билэбин, хайа да уулаах-хаардаах, бадарааннаах сиргэ иҥнибэт, үчүгэй, киһи хайгыыр техниката. Санаабыт сиргэр тиэрдэр. Били, бу кыһын эрчиллии кэмигэр атахпын эчэтэммин, “Дыгын оонньууларыгар” кыттыбат буоллум диэммин, тохтообутум. Ол да буоллар, эпэрээссийэм балтараа ый ааспытын кэнниттэн спортсаалаҕа кыралаан тимиринэн дьарыктаныыбын саҕалаабытым. Атаҕым уйар этэ, ыарыыта сыыйа мүлүрүйбүтэ. Сүүрэрбэр эрэ “баарын” биллэрэрэ. Маска олорон көрбүтүм, үчүгэй курдук этэ. Ол иһин, Манчаары оонньууларыгар кыттар сыаллаах-соруктаах эрчиллэбин. “Дыгыны” көтүтэбин, эчэйиим оһор кэмэ уһун үһү. Ый анараа өттүгэр “Сабантуй” күрэхтэһиитэ буоларын истэммин, бэлэмнэммитим. “Стартовай” курдук кииристим. Кыайыыбын биир дойдулаахтарбар, чугас дьоммор аныыбын!”.
Үһүс миэстэлэргэ тиксибиттэр бары өйдөбүнньүк мэтээллэринэн, дипломнарнан, харчынан бириэмийэлэринэн наҕараадаланнылар. “Сабантуй” бырааһынньыга үтүө өйдөбүлү хаалларда.
Баһылай Посельскай
