Бүгүн тыаллаах, ардахтаах күн турдар, улуус олохтоохторо Бүтүн Арассыыйатааҕы аахсыйаҕа көхтөөхтүк кыттыстылар.
Чурапчы – успуорт туоната буоларынан, бу тэрээһини 5 сыл субуруччу ыытан кэллэ. Ааспыт 2018 сылга 756 киһи анал нуорманы туттарбыта, ол онтон 74 боруонса, 298 үрүҥ көмүс, 240 кыһыл көмүс бэлиэни ылар чиэскэ тиксибиттэрэ.
Бүгүн халлаан туруга куһаҕанын, аахсыйа үлэ күнүгэр түбэспитин үрдүнэн элбэх киһи кэллэ. Кыттааччылар саастарынан арахсан 11 үктэл ирдэбилин тутустулар. Улуус дьокутааттарын мунньаҕын Сэбиэтин бэрэссэдээтэлэ Афанасий Захаров, улуус физическэй култууратын уонна успуордун бырабылыанньатын салайааччы Иван Оконешников, Чурапчы нэһилиэгин баһылыга Владимир Сивцев, илин эҥэрдээҕи “ГТО” киинин салайааччы Василий Давыдов эҕэрдэлээтилэр.
Ааптар: Семен Жендринскэй
