Үлэҕэ уонна Оборуонаҕа бэлэм буолууну (ГТО) нормативтарын туттарыыны улууспут спортка уонна физическэй култуураҕа управлениета (салайааччы Ю.Ю.Никифоров) 2015 сыл сэтинньи ыйыттан саҕалаабыта. Спорт салаатыгар солбуйааччынан Роман Дмитриевич Протодьяконов ананан, бу хайысханы былааннаахтык уонна тэрээһиннээхтик ыытан киирэн барбыта. Бастаан утаа оскуола үөрэнээччилэрэ уонна бүддьүөт тэрилтэлэрин үлэһиттэрэ, ол иһигэр улуус дьаһалтатын отделларын салайааччылара бастакынан нормативтары туттарбыттара.
Бүгүҥҥү күн, бу хайысха сыалын-соругун кылгастык Р.Д. Протодьяконов бу курдук эттэ:
- Үлэҕэ уонна Оборуонаҕа бэлэм буолуу (ГТО) нормативтарын туттарыы улахан дьоҥҥо 18 сааһыттан тутуллар. Хас биэс сыл ахсын сааһынан араастаһан туттараллар. Манна нуормалара тус-туһунан буолар уонна саастара улаатан истэҕин аайы норматив чэпчээн иһэр. ГТО туттарыы киһиэхэ бэйэтигэр сааһыгар эт-хаан өттүнэн төһө сөп түбэһэрин, тус туругун көрдөрөр. Холобура, ханнык эрэ көрүҥҥэ кыайан туттарбат буоллаҕына, киһи туһааннаах былчыҥнарын үлэлэтэн, сайыннаран эбии эрчиллэн-дьарыктанан хос туттарар. ГТО нормативтарын туттаран, киһи бэйэтин сааһыгар чэгиэн туругун бэрэбиэркэнэр түһүмэҕэ буолар, -диир Роман Дмитриевич.
Улуус спортка уонна физическэй култуураҕа управлениетын салайааччытын солбуйааччы Р.Д. Протодьяконов, адаптивнай спорт көрүҥнэригэр сүрүннүүр исписэлиис В.Н. Прокопьев уонна Өктөм орто оскуолатын физкультураҕа учуутала Н.В. Филиппов бэлэмнээн, тэрийэн ыыттылар. Манна миэстэттэн ырааҕы ыстаныыга, имигэс буолууга, спортивнай ыскамыайкаттан тайанан анньыныыга, перекладинаҕа тардыныыга, олорон эрэ көхсүнү көтөҕүүгэ итини сэргэ, скандинавскай хаалыктаах хаамыыга о.д.а көрүҥнэргэ ГТО нуормаларын 20-чэ киһи кэлэн көхтөөхтүк туттардылар.
Төхтүр нэһилиэгэр олоххо көхтөөх, ону таһынан спортка ситиһиилээх дьон аҕыйаҕа суохтар, олортон биирдэстэринэн үлэ уонна спорт бэтэрээнэ, 100 км уһуннаах сиргэ сүүрүүгэ Европа чөмпүйэнээтин кыттыылааҕа, марафоҥҥа Уһук Илиҥҥи эрэгийиэн үрүҥ көмүс призера, өрөспүүбүлүкэ өрүү миэстэлэһэр спорт бэтэрээнэ Николай Семенович Ильин буолар. Николай Семенович нэһилиэгин дьонун түмүүгэ сыралаахтык үлэлэһэн, бүгүн дьоннор көхтөөхтүк кэлбиттэр.
- Бүгүн ГТО нуорматын туттарыым диэн, бу спорду хаалларан баран бэйэм сааспар ис турукпун уонна этим-хааным туругун бэрбиэркэлэнэр санааттан кэллим. Бочуоттаах сынньалаҥҥа олорор дьон, хас биирдиилэрэ биэс сыл буола-буола туруктарын билэллэригэр, доруобуйаларын көрүнэллэригэр наада. Биһиги нэһилиэкпитигэр быйыл олус үчүгэй спорт саалата үлэҕэ киириэхтээх. Оччоҕуна дьон-сэргэ онно сылдьан доруобуйаларын тупсарынан, эрчиллэн-хамсанан, ГТО нормативтарын туттарыыга өссө көхтөөхтүк кыттыахтара. Төхтүргэ биллиилээх сүүрүк Владимир Кузьмин олорор. Кини курдук дьону холобур оҥостон, дьон саалаҕа сылдьыахтара. Бу тутар нормативтара саастарыгар сөптөөх, ханнык баҕарар киһи баҕардаҕына туттарар. Бүгүн кытта сылдьар нэһилиэгим дьоно, имигэстэрин, кыаналларын көрдөрдүлэр, - диэн сүргэтэ көтөҕүллэн туран кэпсээтэ.
Спорт саалаҕа көхтөөхтүк кэлбит аҕам саастаах Төхтүр олохтоохторо бэйэлэрин саастарыгар сөп түбэһэр, Үлэҕэ уонна Оборуонаҕа бэлэм буолуу (ГТО) нормативтарын бу күн «Көмүскэ» туттаран, харахтара уоттанан үөрэн-көтөн тарҕастылар.
Уйбаан УЙГУУРАП.
ааптар хаартыскаҕа түһэриитэ.
