Норуот сомоҕолоһуутун күнүгэр Өлөөн эбэҕэ сылын аайы үгэс буолбут “Муус күрэҕэ – 2019” ыытылынна. 4-түү киһилээх хамаандалар 1,5 чаас бириэмэҕэ муус ылыытыгар күрэхтэстилэр.

Бу күрэҕи Өлөөн нэһилиэгин дьаһалтата, кыра кыамталаах суудуналарга судаарыстыбаннай иниспиэксийэ Өлөөннөөҕү учаастага,  Аҕалар түмсүүлэрэ уонна “Биир ньыгыл Россия Эдэр гвардията” уопсастыбаннай тэрилтэ Саха сиринээҕи салаатын Өлөөн оройуонугар түмсүүтэ тэрийдилэр.

Күн-дьыл туран биэрэн, хаара, тыала-кууһа суох күн үүнэн, кыттааччылар туох да харгыһы көрсүбэтилэр. Кыттааччыларга уонна көрөөччүлэргэ анаан тэрийээччилэр итии  чэйдээх, иттэр анал зона тэрийэн үлэлэппиттэрэ олус көмөлөөх буолла.

– Бу сылын аайы ыытар тэрээһиммит сүрүн сыала-соруга – чөл олоҕу өрө тутуу, тыыл, үлэ бэтэрээннэригэр көмөлөһүү, үүнэр эдэр көлүөнэ ыччаты төрөөбүт дойдуга бэриниилээх буолууга уһуйуу, үлэҕэ сөптөөх сыһыаны иитии буолар.

Быйылгы күрэхпитигэр 5 хамаанда күөн көрүстэ. Бары да уопуттаах, сатабыллаах, сылын аайы кэриэтэ кыттар уолаттартан турар хамаандалар бары тэҥ соҕус ахсааннах мууһу ыллылар. Судьуйалар хамыыһыйалара ымпыгар-чымпыгар диэри ааҕан-суоттаан таһаарбыттарын түмүгэр кыайыылаахтар быһаарылыннылар. Ол курдук, эдэр эрчимнээх, хоһуун уолаттардаах Спиридонов С.С. салайар айылҕа харыстабылын судаарыстыбаннай иниспиэксийэтин хамаандата кыайыылааҕынан тахсан көһөрүллэ сылдьар Кубогынан уонна харчынан бириэмийэлэннэ. II уонна III миэстэлэри “Строители” тутааччылар хамаандалара уонна Өлөөннөөҕү ОДьХ хамаандата  ылары ситистилэр.

Ылыллыбыт муус, этиллибитин курдук, ытыктабыллаах кырдьаҕастарбытыгар тиэрдиллэр. Онно массыыналарынан көмөлөспүт тэрилтэлэргэ, муус тиэйиитигэр үлэлэспит оскуола үрдүкү кылааһын оҕолоругар, тэрээһиммитигэр көмө буолбут депутаттарбытыгар  махталбытын биллэрэбит,  диэн санаатын үллэстэр Өлөөн нэһилиэгин дьаһалтатын баһылыгын э.т. Христофор Павлович Васильев.

IMG 20191104 1304491IMG 20191104 1304491IMG 20191104 1304491IMG 20191104 1304491IMG 20191104 1304491IMG 20191104 1304491

 Дмитрий СКОРОХОДКИН, Ulus.media

 Ааптар хаартыскаҕа түһэриитэ.

Поделиться:

Добавить комментарий

#Новости