Дойдуга Тыйаатыр сылын чэрчитинэн, Үөһээ Бүлүүгэ Олоҥхо ыһыаҕар бэлэмнэнии хаамыытынан, сэтинньи 15 күнүгэр О.Д. Федорова аатынан киин библиотека уораҕайыгар «Кэрэхсэбиллээх көрсүһүүлэр» диэн саҥа бырайыак саҕаланна.
Бу бырайыак иһинэн олох бары эйгэтигэр талба талааннаах, эргиччи дьоҕурдаах улууспут дьоһун дьонун кытта көрсүһүүлэр Олоҥхо ыһыаҕар диэри тиһигин быспакка ыытыллыахтара. «Кэрэхсэбиллээх көрсүһүүлэр» бастакы ыалдьытынан Боотулуутааҕы норуот тыйаатырын сүрүн артыыһа, уус тыллаах олоҥхоһут, оһуохайдьыт, хоһоонньут, ырыа айааччы, ырыаһыт, уруһуйдьут, алгысчыт Василий Лукич Васильев буолла.
Баһылай Луукуһу истээри дьон бөҕө муһунна. Кини бэйэтэ айбыт «Халбас харата хапсаҕай» диэн тойук-номоҕун иһитиннэрдэ. Үөһээ бүлүүлэр өрөспүүбүлүкэҕэ хапсаҕайы спорт көрүнүн быһыытынан өрө тутарбытынан, элбэх чулуу хапсаҕайдьыттарбытынан биллэбит. Ол да иһин буолуо тойук-номох дьон-сэргэ биһирэбилин ылыаҕын ылла. Ону таһынан Баһылай Луукус хас да ырыа ыллаата, айылҕа көстүүлэрин, араас харамайдарын маска түһэрбит кыракый оҥоһуктарын-миниатюраларын атыы-быыстапката тэриллиннэ, олох туһунан бэйэтин философиятын билиһиннэрдэ.
Көрсүһүү олус истиҥ быһыыга ааста. Дьон сүрдээҕин астынна, Баһылай Луукус талаанын сөхтө-махтайда уонна бибилэтиэкэлэр бу саҥа саҕалаабыт бырайыактарын биһирээтэ.