Сахалыы күөн-күрэс илии-атах оонньууларыгар кыттыыны ылар улуустар хамаандалара уонна биирдиилээн көрүҥнэргэ кыттар бөҕөстөр-быһыйдар, культурнай-спортивнай делегациялар өрүһүнэн метеордарынан, ракеталарынан кэлитэлээннэр, олор истэригэр Мэҥэ-Хаҥаластар, Таатталар, Бүлүүлэр, Горнайдар, Намнар, Хаҥаластар, Уус-Майалар, Томполор, Өймөкөөннөр, Дьааҥылар, Абыйдар, Муомалар, Нерюнгрилэр, Дьокуускайдар түһэр миэстэлэрин булаттаан эрэллэр. Уус-Алданнар уо.д.а. улуустар хамаандалара Дьокуускайдааҕы речпортан эмиэ хоҥуннулар диэн регистрациялыыр мандатнай хамыыһыйа биллэрэр.
Бырааһынньыктыы киэркэйэн симэммит 386 саастаах кырдьаҕас Өлүөхүмэ куорат уулуссаларынан сахалыы таҥастаах, сэлээппэлээх, хатан сылдьалларын туһулуур суруктаах-бичиктээх спортивнай формалаах дьон дьоһуннук туттан хаамсаллара куораты өссө тупсараллар. Добун ыһыах тыына билиннэ!
Икки күн устата тилэри “Саха” араадьыйатын уонна телевидениетин үлэлиир бөлөхтөрө быһа биэриилэргэ холбонорго бэлэмнэнэллэр.
Илии-атах оонньууларын түһүлгэлэригэр ким хоторун-хотторорун быһаарар дьүүллүүр сүбэ биир сүрүн тэрийээччитэ Өлүөхүмэ улууһун физическэй культураҕа уонна спорка Управлениетын начальнига Гаврил Аркадьевич Сивцев уонна күрэхтэһиилэр сүрүн судьуйата Иван Иванович Горохов күрэхтэһиилэр буолар сирдэрин көрдүлэр-иһиттилэр, түмсэн муньахтаатылар, маастар-кылаастары, семинардары ыыттылар. Атах оонньуутун судьуйата Николай Корнилов, мас тардыһыытыгар Валерий Чалбанов, оҕунан ытыыга Борис Олесов, хапсаҕайга Вячеслав Данилов, хабылыкка-хаамыскаҕа Надежда Белолюбскайа, “Эр Бэрдигэр” уонна “Үрүҥ Уолаҥҥа” Иван Горохов, ат сүүрүүтүгэр Сергей Чердонов иһитиннэриилэри оҥордулар. Судьуйаларга сертификаттар, спортивнай формалар туттарылыннылар.
Былырыын ыытыллыахтаах Олоҥхо ыһыаҕа пандемиянан быйыл көһөрүллэн, тэрээһин-бэлэмнэнии үлэлэр бүтэннэр, күрэхтэһиилэр буолар сирдэрэ бэлэмнэр. Былырыын 150 олорор олбохтоох, сценалаах, тырыбыналаах, судьуйаларга аналлаах ураһалардаах ипподром, хабылыкка-хаамыскаҕа аналлаах балассаакка спор ивнай дьаһаллары ыытарга уоланнары уонна боотурдары күүтэллэр. Саха Өрөспүүбүлүкэтин Баһылай Манчаары аатынан спорт национальнай көрүҥнэригэр киинин отделларын специалистара биирдиилээн көрүҥнэргэ эппиэттээх судьуйаларынан үлэлиэхтэрэ. Олохтоох хаһаайыттартан 32 физкультура учууталлара, тренердэр, спорт энтузиастара көмөлөһүөхтэрэ.
Күрэхтэһиилэр икки сиринэн биир тэҥҥэ барыахтара, ол курдук, ипподромҥа атах оонньуута, оҕунан ытыы көрүҥнэрэ “Байанай бэлэҕэ”, “Далла мэндэйии” уонна ат сүүрүүтэ буолуохтара, Аанньаах хочотугар баар Киин түһүлгэҕэ мас тардыһыыта, хапсаҕай иккилии ыйааһыннарга уонна күүстээхтэр оонньуулара “Эр Бэрдэ” былыргы сахалыы көрүҥнэргэ сыарҕа соһуутугар, Өлүөхүмэ таастарыгар, ыарахан тааһы быраҕыыга, бэрэмэдэйдээх сүүрүүгэ, таас көтөҕүүтүгэр күрэстэһиилэр ким күүстээҕин быһаарсыахтара.
Сахабыт сирин кус-быһыйдара, дуулаҕа күүстээхтэрэ кэлбиттэрэ иһиллэр. Кинилэр ортолоругар мас тардыһыыга аан дойду чөмпүйүөнэ Томпотттон Сергей Фролкин, Намнааҕы Олоҥхо оонньууларын муҥутуур кыайыылааҕа Евгений Иванов, хабылык-хаамыска маастардара Бүлүүттэн Гаврил Иванов, Андрей Захаров, оҕунан ытыыга өрөспүүбүлүкэ чөмпүйүөнэ Николай Васильев, Олоҥхо оонньуутун кыайыылааҕа Томпоттон Петр Андросов, олохтоохтор кыайыыга суоттанар эрэллэрэ мас тардыһыытын чөмпүйүөннэрэ 68 кг Александр Пшенников, ыарахан ыйааһыҥа Евгений Попов ыһыах дьонун болҕомтотунан туһаныахтара.
Атах оонньуутун, хапсаҕай, мас тардыһыытын муһутуур кыайыылаахтарын сахалыы мүһэлэр, 40 тыһ.солк бириистэр, миэстэҕэ тиксибиттэри 30-20 тыһ.солк бириистэр; Олоҥхо ыһыаҕын сүрүн оонньуулара “Эр Бэрдин” кыайыылааҕын 240 тыһ.солк., иккис миэстэлэммиккэ 180 тыһ.солк анал бириистэр күүтэллэр.
Олоҥха ыһыаҕар 2009 сыллаахха Бороҕоҥҥо аан бастаан киллэриллибит күүстээхтэр “Эр Бэрдэ” күрэстэригэр “Майаҕатта Бэрт Хара” аатынан ыытыллыбыт оонньууларыгар Иван Белолюбскай бастаабыта, 2010 с. Бэрдьигэстээххэ ”Эр Бэрдигэр” Николай Саввинов, 2011 с. Мииринэйгэ Иван Белолюбскай, 2012 с. Ньурбаҕа Рустам Ксенофонтов, 2013 с. Майаҕа Иван Белолюбскай, 2014 с. Хаҥаласка Рустам Ксенофонтов, 2015 с. Чурапчыга Степан Алексеев аатынан ыытыллыбыт “Тоҕус Томтор” оонньууларыгар Иван Белолюбскай, 2016 с. Дьааҥыга, 2017 с.Бүлүүгэ, 2018 Алдаҥҥа Рустам Ксенофонтов, 2019 с. Намҥа Евгений Иванов “Эр Бэрдин” муҥутуур кыайыылаахтарынан буолуталаабыттара.
Быйыл Аанньаах хочотугар буолар оонньууларга, дьэ ким кыайар!
Боотурдар, уоланнар, кытаатыҥ!
Баһылай Посельскай
Бэс ыйын 25 күнэ, 2021 сыл,
Өлүөхүмэ
