айылҕалыын, кыыллыын-сүөллүүн уһуктуу, сэргэхсийии буолла. Өрүстэр, үрэхтэр эстэллэрэ чугаһаан, суол алдьанарын баттаһа, субуота-өрөбүл күннэргэ үгүс күрэхтэһиилэр тохтоло суох буолуталыыллар. Куоратынан-тыанан сырыы-айан хойдубут кэмэ.
Спартакиаданы “Эллэй Боотурдар” баһылыыллар
Саха Өрөспүүбүлүкэтин физическэй культураҕа уонна спорка үлэһиттэрин профсойууһун VII Спартакиадатын программатын чэрчитинэн, аҕыс бөлөхтөргө арахсан, быйылгы сыл устата барыта спорт 13 көрүҥнэригэр күрэхтэһэллэр. Бу иннинэ волейболга уонна буулдьанан ытыыга эр дьоҥҥо Нам Олимпийскай эрэл спортоскуолата, “Триумф”, маассабай спорт Управлениета, дьахталларга Нам спортоскуолата, “Дохсун”, маассабай спорт Управлениета миэстэлэспиттэрэ.
Ааспыт өрөбүл күннэригэр араас физкультурнай-спортивнай тэрилтэртэн турар холбоһуктаах аҕыс сүүмэрдэммит хамаандалар дуобаччыттара утарыта оонньоотулар. Хамаандаларга гроссмейстердар, аан дойдутааҕы кылаастаах спорт маастардара үлэлиир тэрилтэлэрин чиэһин көмүскээтилэр. Хардарыта хотуһуулардаах, 10-нуу мүнүүтэлээх сытыы, эрийсиилээх оонньууларга, түмүккэ, аан дойдутааҕы кылаастаах спорт маастара Василий Прокопьев, Россия спордун маастара Вячеслав Варламов уонна чэпчэки атлетика ветерана Клавдия Шелковникова дуобаччыттардаах Намнааҕы Олимпийскай эрэл оҕо спорт оскуолатын “Түмэн” хамнаадата 15 кыайыы очколаах бастаата. Физическэй культура уонна маассабай спорт Управлениета коэффициенинэн иккис, спорт Министиэристибэтин хамаандата үһүс бириистээх миэстэлэргэ тигистилэр.
Остуол тенниһигэр “Эллэй Боотур” бастаата, “Триумф” иккис, “Дохсун” үһүс буоллулар.
Түөрт көрүҥ түмүгүнэн Нам (Сунтаар, Аллараа Бэстээх) бастакы, “Триумф” (спорка республика сүүмэрдэммит хамаандатын бэлэмниир Киин, ОЭУ) иккис, “Дохсун” (спорка солбугу бэлэмниир Киин, кииннэммит бухгалтерия, Чурапчы Олимпийскай эрэл спортивнай оскуола-интернат) профсойуустарын хамаандалара үһүс иһэллэр.
Бу нэдиэлэ бүтүүтэ хайыһарга күрэхтэһиилэр.
Дуобакка Карпов турнира
Көҥүл тустууга сахалартан оҕолорго ССРС бастакы чөмпүйүөнэ, дуобат тумара толоонугар олоҕун анаабыт, дуобат-саахымат Киинин дириэктэрэ Вячеслав Павлович Карпов кэриэһигэр “нуучча дуобатыгар” өрөспүүбүлүкэ иккис турнира үрдүк тэрээһиннээхтик ыытылынна. Дуобаты таптааччылары сэргэ, Вячеслав Павлович Карпов чугас доҕотторо, үөлээннээхтэрэ, биир дойдулаахтара, дьиэ-кэргэнэ үөрүүлээх түгэн таһымын үрдэттилэр. Турнир үс бөлөҕүнэн тэрилиннэ. Дуобаччыттар ортолоругар спорт маастардара, өрөспүүбүлүкэ чөмпүйүөннэрэ бааллар. Анал байыаннай дьайыыттан кэлбит байыастар эмиэ кытыннылар. Уһун сылларга нэмнэрин билсэр буоланнар, иэмэх талахтыы эристилэр.
Ветеран-эр дьоҥҥо Иван Новгородов (Чурапчы) бастаата, Василий Куприянов (Мэҥэ-Хаҥалас) иккис, Иван Щукин (Таатта) үһүс буолуталаатылар. Ветеран-дьахталларга Анастасия Собакина (Чурапчы) бастаата, Мария Бырдыннырова (Дьокуускай) иккис, Лариса Никифорова (Амма) үһүс бириистээх миэстэлэри ылаттаатылар.
Турнир үһүс бөлөҕөр дуобат уонна тустуу ветераннара түмсэн, туспа оонньоотулар. Степан Контоев, Осип Михайлов, Роман Оконешников уо.д.а. курдук бэйэлэрин кэмнэрин күүстээх бөҕөстөрө бааллар.
Утарсааччыларын хотуталааннар, Чурапчыттан көҥүл тустуу уонна хапсаҕай маастара Адам Таныков бастаата, РСФСР, итиэннэ, ССРС “Спартагын” чөмпүйүөнэ Афанасий Захаров иккис, Мэҥэ-Хаҥаластан Николай Платонов бириистээх миэстэлэргэ тигистилэр.
Көҥүл тустууга уонна дуобакка аан дойду чөмпүйүөннэрэ уолаттардаах Степан Степанович Контоев анал бирииһинэн биһирэннэ.
Тустуу уонна кикбоксинг маастардарын икки ардыларыгар тэриллибит күрэхтэһии сэргэхситиини үөскэттэ. Түөрт дуоскаҕа утарыта олорон көрсүбүттэригэр, аан дойду чөмпүйүөнэ, тренер Герман Контоев хапытааннаах, Алексей Захаров, Константин Конощук, Игорь Тарасов, Ньургун Чоросов састааптаах тустуу маастардарын хамаандата 5:0 кыйыыны ситистэ.
Бөҕөс уонна дуобаччыт Вячеслав Карпов дуобакка турнира сыллата ыытыллыаҕа.
Атах оонньуутугар экспериментальнай турнир
Спорт сахалыы көрүҥнэрин аан дойду киэҥ эйгэтигэр таһаарбыт, педагогическай наука доктора, профессор, Саха Өрөспүүбүлүкэтин үтүөлээх үлэһитэ, тренерэ Валерий Пантелеймонович Кочнев кэриэһигэр атах оонньуутун турнира эксперимен быһыытынан, уратытык ыытылынна. Күрэхтэһээччилэр ойоллоругар туостар икки ардыларын уларытан, ыраатыннаран истилэр.
Инньэ гынан, ыраах-ыраах тэлгэнэн ууруллубут туостары эккирэтэннэр, атах оонньооччулар көрдөрүүлэрэ да үрдүк буолла. Сэттэлии ойууларга Горнай аатыттан кыттар Чурапчы маастара Кай Адамов кылыыга 30 м 39 см, ыстаҥаҕа 30 м 04 см түһүтэлээн бастаталаата. Ити көрүҥнэргэ Мэҥэ-Хаҥаластан Игорь Скрябин, Сергей Захаров кылыыга, Игорь Скрябин уонна Уус-Алдантан Ньургун Сокольников иккис-үһүс буолуталаатылар. Тааттаттан куобах рекордсмена Андрей Васильев сөбүлүүр көрүҥэр бу да сырыыга бастаата – 26 м 79 см куобахтаан чөмпүйүөннээтэ. Куобахха иккис миэстэни Кэбээйи дэгиттэр маастара Яков Дмитриев, үһүс миэстэни Кай Адамов ылаттаатылар.
Үс көрүҥ түмүгүнэн, троеборьеҕа, Кай Адамов 85 м 87 см көрдөрүүлээх абсолютнай чөмпүйүөнүнэн буолла. Мэҥэ-Хаҥастан Сергей Захаров иккис, Уус-Алдантан Ньургун Сокольников үһүс бастыҥ көрдөрүүлэннилэр. Дьахталларга Валерия Олесова, Анна Лыткина (Мэҥэ-Хаҥалас), Ангелина Иванова (Нам); ыччаттарга Артем Пермяков (Хаҥалас), Владлен Сергеев (Нам) пьедестал үктэллэригэр турдулар.
Кытаанахха Алексей Ермолаев турнира
Чурапчы Кытаанаҕар сахаттан ыччаттарга бастакы ССРС чөмпүйүөнэ, норуоттар икки ардыларынааҕы кылаастаах спорт маастара Алексей Ермолаев кэриэһигэр биир дойдулаахтара, саҥардыыҥҥыта киллэриллибит толору хааччыллыылаах таас оскуола спортсаалатыгар (дир. В.М. Яковлев) оҕолорго улуус 2-ис аһаҕас турниры тэрийэн ыыттылар. Уон нэһилиэк 140-ча уолаттара туһуннулар.
Кытаанах сириттэн-уотуттан улуу тренер Д.П. Коркинтан саҕалаан, Афанасий Захаров, Сергей Скрябин, Егор Пономарев, Семен Окоемов, Николай Местников, Гаврил Захаров, Василий Гоголев, Вячеслав Карпов, Прокопий Шестаков курдук биллиилээх бөҕөстөр, хайыһар үтүөлээх тренерэ Иван Николаевич Попов үөскээбит сирдэрэ-уоттара. Өрөспүүбүлүкэҕэ тарбахха баттанар хайыһар манежтаахтар. Хайыһарга аан дойду ветераннарын чөмпүйүөнэ 83 саастаах Николай Захаров күн-бүгүнүгэр диэри Россия хайыһарын суолларыттан мэтээллэри аҕалтыыр. Энтузиаст-тренер Николай Федорович Смирников эрчийэр оҕолоро буулдьанан ытыыга Россияҕа тиийэ бастыыллар.
Нэһилиэк баһылыга Егор Николаевич Потапов бөһүөлэк спортсаалатыгар сыһыары тустуу саалатын салҕааһынын туттаран эрэрин иһитиннэрэн олохтоохтору үөртэ.
Уһуйаан оҕолоругар Артур Демьянов, 28 кг саҕалаан, 16 ыйааһыннарга кыайыылаахтар уонна призердар Алексей Ермолаев мөссүөннээх өйдөбүнньүк мэтээллэргэ, бириистэргэ тигистилэр, сүүйүүлээх лотерея оонньонон, оҕолор дьиэлэригэр үөрэ-көтө тарҕастылар.
Баһылай Посельскай
