187 общественнай тэрилтэлэр улуус сайдыытыгар күүс-көмө буолаллар. Ол иһигэр Сунтаардааҕы остуол оонньууларын федерацията.
Федерация сэтинньи 11 күнүн Саха Республикатын үрдүнэн «ХАБЫЛЫК КҮНЭ» диэн ааттаан-суоллаан өбүгэбит оонньуутун тула түмсүөҕүҥ диэн ыҥырыы таһаарбыта. Бу күн элбэх киһи түмэ тардылынна. Отчуоттарынан көрдөххө, барыта 3953 киһи өбүгэ оонньуутун өрө тутта. Өссө да элбэх киһи оонньообут буолуохтаах дии саныыбыт…
Улуус иһигэр уһуйааннарга, оскуолаларга, түөлбэлэргэ араас күрэхтэһиилэр ыытылыннылар. Ол курдук, Сунтаарга – 1567, Кутанаҕа – 285, Бордоҥҥо – 284, Элгээйигэ -219, Маар Күөлгэ – 123, Тойбохойго – 79, Аллыҥаҕа – 71, Түбэйгэ – 35, Устьеҕа – 19 киһи кыттыыны ылла.
Сунтаар улууһун иһинэн нэһилиэктэргэ – 284 кыттааччылаах Бордоҥ нэһилиэгэ (Егорова Н.М.), оскуолаларга – 601 кыттааччылаах В.Г.Павлов аатынан Сунтаардааҕы начальнай оскуола (Назаров А.С.), уһуйааннарга – 116 кыттааччылаах «Чебурашка» оҕо сайдар киинэ (Егорова А.П.) бастаатылар.
Республика үрдүнэн Дьокуускай куорат, Ньурбаттан Акана, Ньурбачаан, Үөһээ Бүлүүттэн Далыр, Нам, Маҥаас, Хоро, Уус Алдантан Найахы, Баатаҕай, Чурапчыттан Мугудай нэһилиэктэрэ кыттыыны ыллылар. Манна Ньурба улууһун Акана нэһилиэгэ кыайыы өрөгөйүн биллэ. Нэһилиэнньэ 43% бырыһыана бу күн хабылык хаба оонньообут. Иккис – Сунтаар улууһуттан Бордоҥ (35%), үһүс – Кутана (31%) буоллулар.
Көхтөөхтүк кыттар уонна дьону бу спорт көрүҥэр көҕүлүүр бары иитээччилэргэ, учууталларга, түөлбэ салайаачыларыгар, нэһилиэк баһылыктарыгар барҕа махталбытын тириэрдэбит. Өбүгэбит оонньууларын сэргиир, оонньуон баҕарар киһи ахсаана сыл аайы эбиллэн иһэрэ биһигини олус үөрдэр.
Саха оонньуута - ХАБЫЛЫК тустаах күннэнэн САХА СИРИН бастыҥ оонньуута буоллун!
Мария ВАСИЛЬЕВА,
Сунтаар улууһун остуол оонньууларын Федерациятын салайааччыта.
