Тустуук бырааттыылар биир дойдулаахтара Үөһээ-Дьааҥылар турнир бириистэрин туруортаатылар. Ыраах диэбэккэ, Дьааҥыттан элбэх киһи, ол иһигэр, нэһилиэктэр баһылыктара Верхоянскай куораттан Михаил Садовников, Элгэстэн Святослав Слепцов, Табалаахтан Анна Рожина, улуус депутаттарын бэрэссэдээтэлэ Екатерина Ноговицына, улуус баһылыга Владислав Иванов бэйэтинэн кэлэн, хапсаҕайдьыт уолаттарыгар астына-дуоһуйа “ыарыйдылар”. Хоту сир хоһуун ыччаттара Егор Находкин 57 кг бастакы миэстэни, Дьулустаан Попов 95 кг үсүһү ылаттааннар ыраахтан кэлбит биир дойдулаахтарын үөртүлэр, сүргэлэрин көтөхтүлэр.
Дьааҥы бөҕө-быһый дьонун туһунан, Ноговицыннар турнирдарын көтүппэккэ кэлэн көрөр, улуу тренер Д.П. Коркин иитиллээччитэ, үтүөлээх тренер Петр Васильевич Портнягин тэрийбит спорка албан аат Музейыгар баар суруктан-бичиктэн, баай экспонаттартан бэрт үгүһү билиэххэ сөп.
Валентин, Трофим, Иван, Павел, Михаил, Моисей, Василий сэттэ бииргэ төрөөбүт бырааттыылар бары тустуунан дьарыктанан улааппыттара. Улуустарын, бүтүн Сахаларын сирин соргулаахтык ааттаппыттара. Учуутал уонна алгысчыт аҕалара Василий Павлович уолаттарын бэйэтин кытта батыһыннара сылдьан айылҕаҕа “буһарара-хатарара”, сир-дойду, күүстээх дьон тустарынан бараммат кэпсээннэри иҥэрэн улаатыннартаабыта. Ытык аҕаларын үөрэҕин оҕо эрдэхтэриттэн дириҥник иҥэриммит уолаттар спорка, норуот хаһаайыстыбатын араас салааларыгар холобурга сылдьар туруу үлэһиттэр.
Элбэх биллиилээх бөҕөстөрү таһаартаабыт турнир аан бастаан 1998 сыллаахха тэриллибитэ. Өрөспүүбүлүкэ хапсаҕай Федерациятын толорооччу дириэктэрэ Алексей Егорович Мостахов көҕүлээһининэн, тустууну олохторун аргыһа оҥостуммут сэттэ дьоһун уолаттардаах ытыктанар аҕа Василий Павлович Ноговицын 75 сааһыгар анаммыта. Уон сэттэ турнирдар күүрээннээх хапсыһыыларын барыларын Александр Васильевич Васильев-Көрдүгэн күн бүгүнүгэр диэри кэпсээн-ипсээн, түһүлгэни улаханнык сэргэхситэр.
Хапсаҕай эриэккэс албастара хото туттулуннулар. Сытыы бырахсыылар буоллулар.
Сылбырҕа, түргэн хамсаныылаахтар кыайыылары ситистилэр.
57 кг: Егор Находкин (Дьааҥы), Олимпий Васильев (Үөһээ-Бүлүү), Иван Степанов (Уус-Алдан); 65 кг Айсен Поскачин (Кэбээйи), Юрий Сыромятников (Томпо), Гаврил Илларионов (Үөһээ-Бүлүү); 75 кг Рустам Прокопьев (Үөһээ-Бүлүү), Ньургун Андреев (Мииринэй), Семен Владимиров (Таатта); 85 кг Константин Власов (Мэҥэ-Ханалас), Олег Чернов (Томпо), Анатолий Сивцев (Чурапчы); 95 кг Николай Николаев (Бүлүү), Сергей Семенов (Нам), Дьулустаан Попов (Дьааҥы); 95 кг үөһээ Андрей Аронов (Мииринэй), Иван Алексеев (Бүлүү), Увар Тимофеев (Үөһээ-Бүлүү, туһааннааҕынан, бастакы-иккис-үһүс миэстэлэри ылаттаатылар, өйдөбүнньүк мэтээллэри, дипломнары сэргэ 30-20-10 тыһ.солк. уонна сыаналаах бириистэринэн наҕараадаланнылар.
Аан Дарҕан аатын 75 кг Кэбээйи Мукучутун хапсаҕайга оскуолатын иитиллээччитэ, Чурапчы институтун IV куурсугар үөрэнэр Иван Семенов ылла.
75 кг үөһээ саамай ыарахан ыйааһыннаахтарга Ньурба аатыттан тустубут М.К. Аммосов аатынан Хотугу-Илиҥҥи федеральнай университет спорка институтун II куурсугар үөрэнэр Муома ыччата, өрөспүүбүлүкэ көҥүл тустууга уонна хапсаҕайга чөмпүйүөнэ, Саха сирин көҥүл тустууга сүүмэрдэммит хамаанатын чилиэнэ, икки тустуу маастара Никита Хабаров Увар Тимофеев, Николай Николаев, Андрей Аронов, Степан Гаврильев, Платон Саввинов курдук күүстээх маастардары кэннигэр хааллартаан, Аан Дарҕан аатын ылары ситистэ:
- “Бу турнирга оҕо эрдэхпиттэн миэстэлэһиэхпин баҕарар этим. Төрүппэр күстээх дьон, аймахтар бааллар. Олимпийскай эрэл училищетыгар үс-түөрт сыл үөрэммитим. Тренерим Алексей Сергеевич Некрасов, куруутун аттыбар баар, көмөлөһөр. Күүс-уох өттүнэн күүскэ үлэлэтэн, эбилинним. Онон, тренербэр махталлаахпын. Сотору Россия Кубогар, онтон Ярыгин турнирыгар кыттыахтаахпын. Россия тустууктарын маастарыстыбаларынан кыайаллар. Күүскэ эрчиллэн эбиллиэм, икки-үс сылынан үчүгэй буолуом дии саныыбын. Дойдубар сылдьыбатаҕым икки сыл буолла. Саҥа Дьылга дьоммор тиийэр баҕалаахпын.
Турниртан турнирга саҥаттан саҥа ааттар тахсаллар. Эдэрдэр кимиэллээхтик киирэллэрэ саха тустуута кэскиллээҕин кэрэһэлииллэр.
Баһылай Посельскай
