Хапсаҕайдьыттары Үөһээ Бүлүүгэ Павел Уйгуров, Увар Тимофеев профессиональнай таһымҥа күүскэ дьарыктыыллар, Сунтаарга Александр Михайлов эрчийэр. Чурапчыга Айаал Павлов улуус хамаандатын Манчаарыга иккис миэстэҕэ таһаарары ситистэ. Уус Алдаҥҥа хапсаҕай федерациятын Наум Ермолаев эмиэ тахсыылаахтык салайара кэрэхсэбиллээх. Бу күннэргэ сир ахсын хапсаҕайдьыттар бэлэмнэниилэрин үгэнэ. Ааспыт өрөбүлгэ киин куорат хапсаҕайдьыт оҕолоро хамаанданы сүүмэрдиир түһүлгэҕэ түмсэн күрэхтэстилэр.
Күрэхтэһии кыттыылаахтарын Дьокуускай куорат физическэй культураҕа уонна спорка управлениетын начальнига Константин Семенович Бурцев эҕэрдэлээтэ. Кылаабынай судьуйанан көҥүл тустууга уонна хапсаҕай спордун маастара Станислав Егорович Афанасьев үлэлээтэ. Валериан Неустроев хапсыһыылары кэпсээн-ипсээн сэргэхситтэ.
Быйыл ахсынньы 10 күнүгэр буолар Хапсаҕай федерациятын кубогар 2001-2002 сыллардаахха төрөөбүт уолаттар ким ордук бэлэмнээҕин быһаарыстылар. Куорат оскуолаларыгар уонна Олимпийскай эрэл училищеҕа үөрэнэр оҕолор кытыннылар. Көҥүл тустуунан дьарыктанар оҕолору сэргэ, анаан-минээн хапсаҕайынан дьарыктанар оҕолор бааллар. Хапсаҕайдьыт уолаттары “Модун” сопрткомплекска Василий Уйгуров, Станислав Афанасьев курдук тренердэр анаан эрчийэллэр. 3 № спорт оскуола оҕолорун Владислав Витальевич Андреев дьарыктыыр. Ол быыһыгар, күрэхтэһиигэ хапсаҕайынан улаханнык эрчиллибэт 15-с оскуолаттан эмиэ кэлбиттэр. Бэйэлэрин баҕаларынан тустууга тургутунаары, холонон көрөөрү. Бэйэлэригэр эрэллээх, кыахтаах буоланнар кэлбиттэр. Туста сатаатылар гынан баран, дьарык суох аата дьарык суох. «Сиикэйдэр». Хоттортоотулар. Онон, күрэхтэһээччилэр бэлэмнэрин таһыма араас. Хапсаҕай ааттыын халбархай тустуу көрүҥэ.
Хапсаҕайдыыр уолаттар хамсаныылара түргэн, күүс-күдэх өттүнэн сэниэлээхтэр уонна кыайар-хотор мөккүөрдээхтэр. Инньэ гынан, балачча үчүгэй, сэргэх хапсыһыылар буоллулар. Үчүгэйдик тустарынан биллэр Саша Алексеев үс иһигэр кыайан киирбэтэ. Онон ис-иһигэр киирдэххэ, күрэхтэһии күүрээннэх. Уолаттар тэҥ баайыылаахтар. Илиилэригэр «баардаахтар» анньыһан тусталлар, утарсааччыларын үтүрүйэн, түһүлгэттэн таһааран, очконан кыайаллар. Аныгы үйэ оҕолоро төрөлкөйдөр. Ыарахан ыйааһыннаах уолаттар үөһээнэн күдээритиһэн бырахсаллар. Сүнньүнэн, көҥүл тустуунан дьарыктанаааччылар хамсаныылара элбэх, сылбырҕалар, имигэстэр. Албас-ньыма да өттүнэн сатабыллаахтар. Ол да иһин ситиһиилэннилэр, кыайыы үөрүүтүн биллилэр.
Түмүккэ, 50 кг Александр Сыромятников (3 № спортоскуола), 55 кг Ньургун Толбонов (3 № спортоскуола), 62 кг Валера Мандаров (5 № спортоскуола), 70 кг Николай Таллаев (“Модун” СК), 80 кг Андрей Экстор (25-с оскуола), 80 кг үөһэ Никита Хабаров (3 № спортоскуола) кыайыылары ситиһэннэр, ахсынньы 10 күнүгэр буолар Хапсаҕай федерациятын кубогар Дьокуускай куорат чиэһин көмүскүөхтэрэ.
Хапсаҕайдьыттар санаалара күүстээх.
Саха сирин уонна Дальнай Восток чөмпүйүөнэ, олимпийскай эрэл училищетын иитиллээччитэ 100-кэ киилэ ыйааһыннаах Никита Хабаров сөбүлээн оҥорор «прогиб» албаһын туттан эрэллээхтик бастаата, Россияҕа аҕыста тустан мэтээлэ суох гынан баран, хайаан да Россия мэтээлин ылар баҕалаах. 21-с оскуола 10 кылааһыгар үөрэнэр Ньургун Толбонов утарсааччыларын умса тардыталаан, “түргэннээн” кыайталаата, ол иһигэр өрөспүүбүлүкэ күүстээх хапсаҕайдьыта Айаал Белолюбскайга хотторон иһэн “миэлиҥсэни” сатабыллаахтык туттан үөрүүтэ улахан.
Кыайыылаахтар куорат физическэй культураҕа уонна спорка управлениетын өйдөбүнньүк мэтээллэринэн, дипломнарынан, сыаналаах бириистэринэн, өрөспүүбүлүкэ биллиилээх хапсаҕайдьыттара Захар Дьячковскай, Василий Стручков – Абый Бааска, Станислав Афанасьев туруортаабыт анал бириистэринэн наҕараадаланнылар.
Дьокуускай куорат хапсаҕайдьыт уолаттарын хамаандата улахан түһүлгэлэргэ бэлэм.
Баһылай ПОСЕЛЬСКАЙ, Sportyakutia.ru
