Ол да быһыытынан спорка саамай сүрүн, киэн туттар көрүҥмүт буолар. Бэйэлэрин кэмнэригэр Күөх Ньурба аатын араас таһымнаах күрэхтэһиилэргэ ааттаппыт бүдүрүйбэт бөҕөстөрбүт, аатырбыт хапсаҕайдьыттарбыт М.Васильевы, Ю.Андреевы, И.Павловы, В.Константиновы, В.Алексеевы, П.Алексеевы, В.Ефремовы, А.Афанасьевы саха чулуу бөҕөстөрүн ахсааннарыгар киирэллэринэн киэн туттабыт.
Бу күннэргэ республика хапсаҕайдьыттара Ньурба көбүөрүгэр Саха сирин 3-с төгүллээх абсолютнай кыайыылааҕа В.Ефремов бирииһигэр күөн көрүстүлэр. Ыраах Муома, Мэҥэ Хаҥалас, Бүлүү бөлөх улуустарыттан уонна Дьокуускай куораттан барыта 100-тэн тахса спортсмен, ол иһигэр 11 хапсаҕай маастардара кэлэн аат былдьастылар.
Сунтаар хамаандатын А.Львов, бүлүүлэри В.Соловьев, үөһээ бүлүүлэри И.Мордовской курдук улахан ааттаах-суоллаах хапсаҕайдьыттар баһылаан илдьэ кэлэн ытыннарбыттара күрэхтэһии таһымын үрдэттэ.
Улахан дьону сэргэ оҕолор эмиэ кэлэн күрэхтэстилэр. Ол курдук 45 кг. уонна 70 кг үөһээ ыйааһыннаахтарга бары бириистээх миэстэлэри Ньурба ыччаттара ыллылар. Сүрдээх тыҥааһыннаах киирсиилэр түмүктэринэн, сунтаардар 3 чемпионнаннылар. Ол курдук, 50 кг. Ян Дьячковскай, 55 кг. Рафаэль Алексеев, 62 кг. Станислав Семенов буоллулар. Онтон 70 кг. диэри ыйааһыннаахтарга Максим Иванов 2м. таҕыста. Үөһээ бүлүүлэр 55 уонна 62 кг призерданнылар. Түмүккэ ньурбалар эмиэ 3 ыйааһыҥҥа кыайыылаах таҕыстылар.
Эр дьоҥҥо Ньурба хамаандатыттан 55кг Иванов Нюргун, 90кг. үөһээ ыйааһыннаахтарга Степан Тобонов, бэтэрээннэргэ 60 кг диэри Нюргустан Чарканов, 70 кг үөһээ Андрей Степанов, 80 кг үөһээ Василий Афанасьев кыайыылаахтарынан буоллулар. Онтон бүлүүлэртэн 70 кг. үөһээ Дмитрий Ушницкай, 80 кг. Афанасий Матвеев, 90 кг. Николай Николаев, бэтэрээннэргэ 80 кг. Николай Сыромятников кыайдылар. Бу сырыыга Үөһээ Бүлүү хамаандата 4 призерданна. Онтон Муома хоһууна Юрий Донской 55 кг диэри ыйааһыннаахтарга 3 м. ылан үөрүүтэ үксээтэ.
Күрэхтэһии абсолютнай кыайыылааҕын быһаарар хапсыһыыга 18 эр бэрдэ киирсибититтэн 6-та аатырбыт маастардар. Бэрт сүрдээх өрө күүрүүлээх, ыһыылаах-хаһыылаах халбас харата күрэх түмүгүнэн бу күн муҥутуур кыайыылааҕынан Бүлүү күүстээҕэ Афанасий Матвеев ааттанна. Онтон бэтэрээннэр ортолоругар абсолютнай кыайыылааҕынан буолла – В.Афанасьев.
Спорт, үөрүү, доҕордоһуу күнүнэн «Эдэр, кэскиллээх хапсаҕайдьыт» анал ааты Сунтаар ыччата Ян Дьячковскай сүктэ. «Кылбар хапсаҕайдьыт» Бүлүү бөҕөһө Дмитрий Ущницкай, Үөһээ Бүлүү хапсаҕайдьыта Сэмэн Тимофеев «Кылбар тэбии», Ньурба ньургуна Андрей Степанов «Кылбар киирсиилэрин иһин» бэлиэлэри ылан сыаналаах бэлэхтэринэн наҕараадаланнылар.
Иван Гаврильев, күрэх кылаабынай судьуйата, «Саамай тыҥааһыннаах, эт-хаан, сылба, сымса, сыты, умнуллубат киирсиини бэтэрээннэргэ абсолютнай кыайыылааҕы быһаарар хапсыһыыга Илья Мордовской уонна Боппо Попов (Сунтаар) көрдөрдүлэр. Бу күөн көрсүүгэ Ылдьаа утарылаһааччытын бэгэччэгиттэн тутан ылаат эрийэ кууһан бырахпыта кырасыабайдык көһүннэ» диэн сөҕөн кэпсээтэ.
Хапсаҕайдьыттар аны ахсынньы 8-12 күннэригэр ыытыллахтаах Республика хапсаҕайга Федерациятын кубогар кыттарга бэлэмнэниэхтэрэ.
Лариса Андреева, Ньурба.
