Күрэхтэһии кыттыылаахтарын өрөспүүбүлүкэ Федерациятын толорооччу дириэктэрэ, сүрүн судьуйа Максим Оегостуров, XX үйэ чулуу атаҕын оонньооччута, быһыйа, рекордсмена, дэгиттэр күүстээҕэ, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Бочуоттаах тутааччы Иван Горохов, Чурапчы Хоптоҕотун нэһилиэгин баһылыга Алексей Бурцев, Өрөспүүбүлүкэ үтүөлээх тренерэ Борис Ильин, биир дойдулаахтара спорт маастардара Михаил Петров, Петр Илларионов, Д.Д. Эверстов дьиэ-кэргэнэ, бииргэ төрөөбүттэрэ, оҕолоро, сиэннэрэ эҕэрдэлээтилэр. Бэйэтин кэмин уһулуччулаах куобахчытын, олоҕун былаһын тухары кэрээбэт кэрэ кэпсээннэрдээх, ханна да сырыттар чуҥкуйар диэни билбэт, көрдьүөстэнэрин сөбүлүүр Дмитрий Эверстов туһунан үтүө тылларынан ахтан-санаан аастылар.
Кылыыга, ыстаҥаҕа, куобахха 63 кыттааччы сэттэлии ойууларга илин-кэлин түһүстүлэр. Күннэригэр сылдьар Саха сирин күүстээх маастардара күрэхтэһиини сытыырҕаттылар, киэргэттилэр. Сүһүөхтэрин үрдүгэр сылдьааччылар 38-лар.
Дьахталларга Мэҥэ-Хаҥаластан Анна Лыткина, Хаҥаластан Валерия Олесова, 1 № ДЮСШ-н Алсу Ахмерова; 15-16 саастаахтарга кыргыттарга Намтан Анастасия Тимофеева, 1 № ДЮСШ-н Анастасия Жиркова, Моника Тилабаева; уолаттарга Дьокуускайтан Валентин Васильев, Мэҥэ-Хаҥаластан Михаил Шарин, Владислав Яковлев; эр дьоҥҥо Мэҥэ-Хаҥаластан Игорь Скрябин, Намтан Владислав Попов, Уус-Алдантан Иван Пестряков кыайыылары ситистилэр инники күөҥҥэ сырыттылар.
Тэрийээччилэр болҕомтону ветераннарга уураннар, хаһааҥҥытааҕар даҕаны элбэх - 25 ветераннар кытынна. Сүүрэ-көтө, эдэр-эмэн саастарын санатан кылыйа, ойо-тэбэ сылдьар аҕам саастаахтар сөҕүүнү-махтайыыны үөскэттилэр.
30 үөһэ саастаах ветеран-дьахталларга Тулагыттан Любовь Унарова, Үөһээ-Бүлүүттэн Валентина Иванова, Дьокуускайтан Марина Федоренко; 35-н үөһэ саастаах ветераннарга Ньурбаттан Виталий Васильев, Хаҥаластан Николай Латышев, Намтан Максим Софронов;
45-н үөһэ саастаахтарга Горнайтан Егор Захаров, Намтан Иоган Михайлов, Чурапчыттан Дмитрий Макаров; 55-н үөһэ саастаахтарга Үөһээ-Бүлүүттэн Василий Санников, Чурапчыттан Илья Дыдаев, Афанасий Дорофеев; 65-н үөһэ саастаах ветераннарга Сунтаартан Владимир Алексеев, бастаатылар Чурапчыттан Андрей Турантаев, Ксенофон Оконешников, туһааннааҕынан, бастакы, иккис, үһүс миэстэлэри ылаттаатылар. 
Мас тардыһыытыгар аан дойду, Россия чөмпүйүөҥкэтэ Марина Федоренко куобахха рекорд олохтоото. Спорт ветераннара Федот Соловьев, Марк Харлампьев “Сахаада-спорт” маастарын нуорматын толорбуттарынан түөскэ иилиллэр бэлиэни, дастабырыанньаны туттулар.
Баһылай Посельскай
