Россия чемпионката Эрилик Күндайаана кыыл моһуоннаах мишеннэри тус бэйэтинэн сакаастаан, күрэхтэһиини бэйэтинэн көҕүлээн тэрийбитэ хайҕаллааҕын Саха сирин төрүт ох саанан ытыы федерацията бэлиэтиир.
“Бүгүҥҥү сүрэхтэнии күрэхтэһиигэ республикаттан 20-чэ спортсмен кыттыыны ыла кэлбитэ, мин санаабар элбэх. Кинилэргэ улуустааҕы спорт управлениетын аатыттан махтанарбытын биллэрэбит. Күрэхтэһиини көрдөххө олус интэриэһинэй эбит”, – диир улуустааҕы спорт управлениетын салайааччыта Павел Иванов.
Саха сирин төрүт ох саанан ытыы федерациятын толорооччу директора Иванна Белолюбская күрэхтэһии былаһын устата тус бэйэтэ сылдьыбытынан, кыттыыны ылбыт спортсменнар айылҕаҕа көҥүл тыынан, дуоһуйууну ыланнар махтанан барбыттар. Иванна Ивановна этэринэн, ох саанан ытааччылар өссө да салгыы ытар долгуҥҥа толору киирбит туруктаахтар, дьүһүннээхтэр эбит. Холобура, Чурапчы охчуттара ытар баҕаттан баар үлэни “кыратык күүтэ түс” диэт кэлэ турбуттарын билиммиттэрэ.
Кыыллар макеттарын хас миэтирэттэн ыталлара суругунан суруллубатаҕа, түҥ былыр өбүгэлэрбит бултуулларын санатар. “Хас миэтирэттэн ытарбыт туочунайдык суруллан чэпчэтиллибитэ буоллар, оноҕос тэбэр күүһүн, туһаайыытын уларытар кыахтаныахпыт этэ” диэн күрэхтэһээччилэр этэн аһарбыттара. Дьахталларга кыайыыны Намтан Катарина Колесова, иккиһи-үсүһү Чурапчыттан Наталья Ефимова, Эльвира Ефимова ылбыттар. Эр дьоҥҥо элбэх очукуолаах Петр Калачев бастакы, иккис Чурапчыттан Владислав Колесов уонна үһүс – Намтан Афанасий Дьячковскай.
“Билигин дьоҥҥо барыларыгар күһүҥҥү тиэтэллээх күннэр буолалларын этэн тураммын, 20-тан тахса ох саанан ытааччы кэлбитэ үөрдэр. “Сайдарбыт, эбиллэрбит туһугар биир да күрэхтэһиини көтүтүө суохтаахпыт” диэн өйдөөх-санаалаах күрэхтэһээччилэр биһиэхэ үгүстэр. Холобурга аҕалабыт, махтанабыт Мэҥэ Хаҥалас ыалыгар Петровтарга. Оҕо, ийэ, аҕа тэҥинэн күрэхтэһэрэ хас көрүҥ аайы баар буолбат.
Намҥа оҕунан ытыы федерацията, улуустааҕы спорт управлениета ох саанан ытааччылары өрүү өйүүрүн уруккуттан кэтээн көрөбүт. Бу да сырыыга спорт управлениета өйүүрэ кэрэхсэннэ.
Эрилик Күндайаанаҕа өссө төгүл, федерация аатыттан махтал тыллары тиэрдэбит. Тэрээһиннээх күрэхтэһии буолан ааста. Көҕүлээччи, тэрийээччи баҕа санаатын иһиттибит. Төрүт ох саанан 3D ытыы көрүҥэ сыллата ыытыллар күрэхтэһиигэ кубулуйуоҕа диэн эрэннэрэбит. Инникитин 3D көрүҥ Саха сиригэр сайда туруоҕа, киэҥ араҥаҕа тахсыаҕа диэн төрүт ох саанан ытыы федерацията итэҕэйэр. Бу этиини бары күрэхтэһээччилэр эппиттэринэн чопчуланан бигэргэнэр”, – диэн күрэхтэһии туһунан сиһилии кэпсиир толорооччу директор Белолюбская.
Харысхан Попов, "Энсиэли"
