Үүммүт саҥа 2024 сыл тохсунньу ый 5 күнүгэр Дьаархан нэһилиэгин "Дьулуур" успуорт манеһыгар 2008 - 2012 сыл төрүөх оҕолорго, Сунтаар улууһугар аан бастакытын Саха төрүт оҕунан ытыыга "Байанай бэлэҕэ" республиканскай күөн күрэс быраабылатынан ыытылынна.
Бу бүтүн Саха сиригэр уонна Сунтаар улууһугар бэрт күүстээхтик тэнийэн эрэр көрүҥҥэ биһиги оскуолабыт оҕолоро тэҥҥэ хардыылаһан күрэстэспиттэрэ олус хайҕаллаах. Саха төрүт оҕунан ытыыта биир сэдэх, умсугутуулаах, инникилээх успуорт көрүҥэ буолар онон бу көрүҥү сэҥээрээччилэр кэккэлэрэ күнтэн күн элбии турара киһини үөрдэр.
Күрэспит аһыллыытыгар, бу күөн күрэһи тэрийээччи - Саха Өрөспүүбүлүкэтин Саха төрүт оҕунан ытыы Федерациятын бэрэссэдээтэлэ Виктор Анатольевич Бурцев саҥа үүммүт сылынан эҕэрдэлээтэ, күрэстэһээччилэргэ ситиһиини баҕаран туран - ким күүстээх дьарыктаах, дьулуурдаах ол кыайдын диэн баҕа санаатын эттэ.
Эҕэрдэ тылынан Ньургуйаана Дьулустановна Петрова - Сунтаар улууһун оҕунан ытыы тренерэ оҕолорго кыайыыны хотууну, күүстээх дьарыгы баҕарда.
Күрэхтэһиигэ кэлбит Бордоҥ, Сунтаар, Уһун күөл, Маар күөл уонна олохтоох Дьаархан оҕолоро бары сахалыы сайгыччы таҥнан сылдьаллара көрүөххэ астык.
Барыта 22 оҕо күөн көрүстүлэр. Кыргыттарга 7 кыыс кыттыбытыттан:
1 м. Айгыына Павлова Дьаархан. 35 очукуолаах.
2 м. Саина Семенова Сунтаар. 15 очукуолаах.
3 м. Айыына Семенова Дьаархан. 13 очукуоланан кыайыы өрөгөйүн биллилэр.
Уолаттарга 15 уол кыттыбытыттан:
Оҕолорго Сунтаар улууһун биир биллэр, киэн туттар дэгиттэр спортсмена Потапов Владимир Маар күөл - 50 очукуолаах эрэллээхтик 1 м ылла.
2 м. Сидоров Павел Бордоҥ. 35 очукуолаах.
3 м. Николаев Талбан Дьаархан. 30 очукуолаах ыланнар Ох сааннан ытыыга бастакы сүрэхтэниилэрин олус үчүгэйдик аастылар.
Кыттааччы оҕолор көрдөрүүлэрэ куһаҕана суох диэн Виктор Бурцев бэлиэтээн эттэ уонна бастаабыт Айгыынаҕа, Володяҕа бирииһин - харчылаах кэмбиэр туттартаата.
Сунтаар улууһугар ыытыллыбыт аан бастакы күрэспит сыалын ситтэ, элбэх оҕону успуорт биир ураты кэрэ, умсугутуулаах, инникилээх көрүҥэр сыһыарда.
Оҕолору наҕараадалааһын кэнниттэн тутатына улахан дьоҥҥо Абсолютнай күрэс буолла. Бу көрүҥҥэ бэйэтигэр, оҕугар уонна оноҕосторугар эрэллээх күөн күрэстэһээри аат ааттаан кэлбит 13 бэргэн ытааччы суруйтаран кытынна. Кыттааччылар сэрэбиэй быһыытынан киирэн ыттылар. Быраабылата судургу, өйдөнүмтүө. Аан бастаан куобаҕы ыталлар, таппыт куһу ытарга ааһар ону таптаҕына тииҥи табан кыайыылаах быһаарыллыахтаах. Сыыспыт туораан иһэр. Бастакы түһүмэххэ куобахха 5 ытааччы сыыйылынна, иккис түһүмэххэ куска 6 ытааччы туораата. Финалга - Ньургуйаана Петрова уонна Павел Кырелов тахсаннар тииҥи ытыалаатылар. Финал диэн финал олус долгутуулаах, күүрээннээх түгэн буолла. Бүтэһиккэ тииҥин таба ытан Сунтаар улууһун оҕунан ытыы тренерэ Ньургуйаана Петрова тахсан кыайыы өрөгөйүн биллэ уонна кыһыл көмүс мэтээли сэргэ харчыннан бириис тутта.
Бу оҕунан ытыы күрэҕин көрө кэлбит дьон куттарын туттаран инники өттүгэр оҕунан ытыахтарын баҕаралларын биллэрдилэр, олус астынан тарҕастылар.
Саха Өрөспүүбүлүкэтин Саха төрүт оҕунан ытыы федерациятын бэрэссэдээтэлигэр Виктор Бурцевка, бу күрэһи бэйэтэ көҕүлээн, сүрүннээн, анал суруктаах мэтээл оҥотторон, харчыннан бириистээн ону ааһан "Байанай бэлэҕэ" мишень толору комплегын бэлэхтээбитин иһин, бары кыттааччылар уонна көрөөччүлэр ааттарыттан барҕа махталбын тиэрдэбин.
Ону сэргэ музыкальнай нүөмэринэн, аппаратураннан хааччыйбыт "Одун" НАК директора В.В.Васильевка, күрэс үөрүүлээх аһыллыытын иилээн - саҕалаан ыыппыт төрөппүт А.А.Марковаҕа эмиэ туспа махтал буоллун.
Өссө төгүл ситиһиилээх оҕолорбутун эҕэрдэлиибит, киэн туттабыт. Инникитин өссө күүстээх утумнаах дьарыктары, биир санаалаах, дьулуурдаах киэҥ кэккэни баҕарабыт.
Күрэс комментатора, Дьаархан орто оскуолатын физкультураҕа учуутала Павел Кырелов.
Дьаархан. Тохсунньу ый 5 күнэ. Дьаархан.
