Ох саанан уһулуччу бэргэнник ытааччылар уонна сымсатык оноҕостон аһарааччылар тустарынан үһүйээннэр күн бүгүҥҥэ диэри уос номоҕуттан түспэттэр.
Ити үгэһи сөргүтэр сыаллаах Олоҥхо уон сылын бэлэмнээн ыытар Саха Өрөспүүбүлүкэтин национальнай тэрийэр кэмитиэтин бэрэссэдээтэлэ Александр Жирков көҕүлээһининэн былырыын Бүлүү куоракка Олоҥхо ыһыаҕын чэрчитинэн Саха сирин историятыгар аан маҥнайгытын саха оҕун оҥорууга уонна ытыыга бастакы өрөспүүбүлүкэтээҕи күөн күрэс буолбута.
Саха ох саатын төрүт үгэстэри тутуһан оҥорууга үһүс миэстэҕэ Таатта улууһуттан Леонид Васильев, иккискэ – Сунтаартан Кирилл Петров уонна бастакы миэстэҕэ – Уус Алдантан Роман Готовцев тиксибиттэрэ. Онтон «Көкөөнөй уус күөртээбит, Бакаанай уус балталаабыт үс бастаах тэлээн-былаан саардаан ох» өрөспүүбүлүкэтээҕи күрэххэ бэйэлэрэ оҥорбут охторуттан ырааҕы ытыыга үһүс миэстэҕэ – Дьокуускайтан сылдьар Василий Гоголев (136,60 м.), иккискэ – Чурапчыттан Павел Попов (136,80 м.) таҕыстылар. Дьокуускай куораттан Николай Аржаков – Боло Уус оноҕоһо 138,80 миэтирэ ыраах түһэн, кыайыылаах аатын ылбыта.
Саха оҕун оҥорууга уонна ытыыга иккис өрөспүүбүлүкэтээҕи күрэс быйыл Алдан куоракка XII өрөспүүбүлүкэтээҕи Олоҥхо Ыһыаҕын чэрчитинэн бэс ыйын 30 күнүгэр ыытыллыаҕа.
Бу күҥҥэ маҥнай сарсыарда 10 чаастан Тимир уустарын түһүлгэтигэр саха ох саатын төрүт үгэстэри тутуһан оҥорууга быыстапка ыытыллыаҕа. Ол кэннэ күнүс 2 чааска Кыһыҥҥы спорт көрүҥнэригэр бэлэмниир киинин биатлон күрэҕэ ыытыллар сиригэр оҕунан ытыы күөн күрэһэ саҕаланыаҕа.
Күрэс балаһыанньатынан кыттааччылар охторо тииттэн, хатыҥтан оҥоһуллубут буолуохтаахтар. Ох саа оҥоһуутугар ынах муоһа туһаныллыан сөп. Уус хас даҕаны оҕу күрэскэ туруоруон сөп. Оҥоһуктар бары быыстапкаҕа көрдөрүллүөхтээхтэр.
Оҕунан ытыыга 18-тан аҕа саастаах эр дьон уонна 17-гэр диэри саастаах уолаттар кыттыахтарын сөп. Күрэскэ уус бэйэтэ кыттар эбэтэр оҥорбут оҕун атын спорсмеҥҥа биэрэн кытыннарыан сөп. Кыттааччылар сахалыы таҥастаах буолуохтаахтар.
Күрэс икки көрүҥүнэн ыытыллыаҕа. 1. “Байанай бэлэҕэ” сыалы ытыы күрэһэ Саха Өрөспүүбүлүкэтин оҕунан ытыыга федерациятын 2017 сыллааҕы быраабылатынан барыаҕа. Оноҕос анал төбөлөөх буолуохтаах. Күрэскэ 18-тан аҕа саастаах эр дьон уонна 17-гэр диэри саастаах уолаттар кыттыахтарын сөп; 2. Ырааҕы ытыы күрэһигэр кыттар уус эбэтэр спорсмент 3 төгүл ытар. 3 төгүллээн ытыыттан түмүккэ ордук ырааҕы көппүт оноҕос ааҕыллар. Оноҕос төбөтө тимир уонна сытыы буолуохтаах. Күрэскэ эр дьон эрэ кытталлар.
Саха ох саатын төрүт үгэстэри тутуһан оҥорууга түмүк I, II, III миэстэлэринэн тахсыаҕа. Оттон ох саанан ытыы күрэһин түмүгэ кыттааччылар саастарынан I, II, III миэстэлэринэн быһаарыллыаҕа.
Ытыктабыллаах эр дьон, спорду сэҥээрээччилэр! Эһигини саха ох саатын оҥорууга уонна оҕунан ырааҕы ытыы күрэстэригэр көхтөөхтүк кыттарга ыҥырабыт. Сайаапкалары Алдан оройуонун спорка кэмитиэтигэр, эбэтэр тэрийэр хамыыһыйаҕа электроннай почтанан ыытыаххытын сөп (Этот адрес электронной почты защищён от спам-ботов. У вас должен быть включен JavaScript для просмотра., Егор Егорович Кириллов, төл. нүөмэрэ 89141009531, Роман Ильич Готовцев, төл. нүөмэрэ 89246611986) уонна Саха Өрөспүүбүлүкэтин спордун министиэристибэтигэр (Этот адрес электронной почты защищён от спам-ботов. У вас должен быть включен JavaScript для просмотра.) биэриэххитин сөп.
Кыттааччылар уонна судьуйалар паспорт, пенсия страховкатын свидетельствотын (СНИЛС) уонна ИНН копиятын тиксэриэхтээхтэр. Хас биирдии кыттааччы күрэс кэмигэр үөскүөн сөптөөх оһолго страховкалаах буолуохтаах. Страховката суох спортсменнар күрэскэ киирэллэрэ бобуллар.
Кыттааччы айанын, аһылыгын уонна хонугун төлөбүрүн ыытар тэрилтэ хааччыйар. Маны таһынан хонукка (700-1000 солк.), аһылыкка (350 солк.) бэс ыйын 25 күнүгэр диэри сайаапкалары хомуйабыт.
Тэрийэр хамыыһыйа
