Мээндигигэ волейболга хамаанданан бастыыр иһин күүрээннээх күрэхтэһии буолла.  Барыта эр дьон 6 хамаандата, дьахталларга 5 хамаанда кэлэн күөн көрүстүлэр

Мээндиги нэһилиэгэр бастакы баһылык Николай Илларионов төрөөбүтэ 60 сылыгар анаммыт волейболга күрэхтэһии быйыл 26- с төгүүн ыытыллар. Күрэхтэһии үөрүүлээх аһыллыытыгар Амма улууһугар ыытыллыбыт Саха сирин норуоттарын VII  спортивнай Оонньуларыгар ситиһиилээхтик кыттыбыт ыччаттарбытын чиэстээһин ыытылынна.  Икки күннээх тыңааһыннаах оонньуу түмүгүнэн Амма-1   хамаандата кыайыы өрөгөйүн билэн көһө сылдьар кубогы илдьэ барда. Иккис миэстэни  Абаҕа нэһилиэгин  күүстээх хамаандата ылыан ылла, үһүскэ Амма-2 ДЮСШ хамаандата тахсан мэтээллэринэн, грамоталарынан наҕараадаланнылар.

Эр дьоҥҥо «Бастың оонньооччу» анал ааты Покровкаттан Анатолий Макаров ылан  күрэхтэһии сүрүн бирииһин Илларионовтар дьиэ кэргэн туруорбут икки миэстэлээх эрэһиинэ оңочотунан наҕараадаланан үөрүү өрөгөйүн биллэ. Онтон дьахталларга «Бастыҥ оонньооччу» аатын Амматтан Туяра Емельянова буолан Илларионовтар дьиэ кэргэн туруобут сүрүн бириистэринэн,  кухоннай комбайынынан наҕараадаланна.

Киэһэтин олохтоох библиотекарь Матрена Захарова «Ахтан, санаан ааһыаҕын» диэн Николай Егорович Илларионов чугас дьоно кэргэнэ Мария Афанасьевна, оҕолоро, бииргэ төрөөбүттэрэ, чугас до5отторо кыттыылаах ахтыы киэһэтин бэрт иһирэхтик ыытта. Күрэхтэһии кыттыылаахтара «Доҕордоһуу биэчэрэ» диэн уоттаах-күөстээх дискотекаҕа сылдьан,  күнүһүн күрэх быыһыгар Амма өрүскэ сөтүөлээн дуоһуйа сынньанан тарҕастылар.

Бастакы баһылыкпыт Николай Егорович Илларионов тэрийбит «Мээндиги кубога» ыччаты чөл олоххо, спортка, биир сомоҕо буолууга өссө да угуйа, ыҥыра туруоҕа диэн бигэ эрэллээхпит.

Альбина Филиппова, «Амма олоҕо»

Поделиться:

Комментарии

#Новости