1991 сылга СахаВА тэриллиэҕиттэн Саха волейбола саҥалыы тыыннанан, сайдыы суолугар киирбитэ ааспыт өттүгэр спорт министерствота, “Урожай” общество сылга биирдэ ыытар күрэхтэһиилэрин кэтэспэккэ араас тэрээһиннэр ыытыллан барбыттара манна ордук кулууптарынан үлэлээһин ордук көдьүүстээх буолбута.
Кыттааччы ахсаана элбээбитэ, оонньуулар хаачыстыбалара тупсан барбыттара. Ону кэнники республика чемпионаттара, спартакиадалар оонньууларын түмүктэрэ чаҕылхайдык көрдөрөллөр. Биллэн турар, ханнык баҕарар спорт көрүҥэр курдук волейболга эмиэ киһи эдэр сылдьан үрдүк көрдөрүүлэри ситиһэр, эрчимнээхтик оонньуур. Ол иһин сааһыра барбыт спортсменнар бу кэрэ оонньууттан арахсыахтарын баҕарбакка СахаВА иһинэн ветераннар лигаларын тэрийбиттэрэ. Ветераннар бастаан эр дьоннор 35, дьахталлар 30 саастарыттан оонньууллара. Кэлин бириэмэ ааһан истэҕин аайы бастакы саас оннунан хаалан баран, аны 40, 45, 50, 55, 60 саастарыттан группалар тэриллибиттэрэ.
Оонньооччуларга тэҥнээхтэрин кытта киирсэр буоланнар интэриэстэрэ да үрдээбитэ. Ол чэрчитинэн бу сыл кулун тутар 23 күнүгэр республикаҕа аан бастаан 65 саастартан үөһэ саастаахтарга волейбол фаната ааспыт өттүгэр Хаҥалас улууһун волейбол федерациятын салайбыт республика үтүөлээх юриһа Иосиф Колесов бирииһигэр СХТ залатыгар күрэхтэһии ыытылынна.
Иосиф Родионович 1947 сыллаахха Тулагыга күн сирин көрбүтэ. Орто оскуоланы Чурапчы спортивнай оскуолатыгар улуу тустууктары Роман Дмитриевич, Сахааччаны, Владимир Андросовы кытта бииргэ үөрэнэн бүтэрбитэ. Төһө да улахан тустуук буолбатар улахан тустууктарга күүс-көмө буолан, улуу тренергэ дьарыктанан эт-хаан өттүнэн улаханнык ситэн тахсыбыта. Советскай Армияҕа Шерловая гора диэн Читинскэй уобалас сиригэр танковай чааска сулууспалаабыта. Онтон Свердловскай юридическай институтун бүтэрэн баран, Дьокуускай куоракка, Хаҥаласка судьуйанан үлэлээбитэ. Онно үлэлии сылдьан “Хаҥалас” диэн волейбол кулуубун тэрийбитэ, волейбол федерациятын салайан улууска бу оонньууну үрдүк кэрдиискэ таһаарбыта бэйэтэ сааһырбыт оонньооччулар ортолоругар активнайдык кыттар этэ. Үтүө суобастаах профессиональнай грамотнай үлэһит буолан үгүс правительственнай наҕараадаларга тиксибитэ. Биир саамай киэн туттар наҕараадатынан республикаҕа физкультура уонна спорт сайдыытыгар үтүөлэрин иһин знак буолар. Покровскай куорат уонна Хаҥалас улууһун ытык киһитинэн буолар.
Күрэхтэһиигэ мандааты ааспыт кыттааччылары; 4 хамаандаҕа арааран баран оонньуулар ыытылыннар. Сааһырбыт спортсменнар эрдэттэн бэлэмнэммит буоланнар сытыытык, көхтөөхтүк оонньоотулар.
Саастарынан тэҥ оонньуур да такыһымнара тэҥ буолан бары оонньуулар 2:1 түмүктэннилэр. Көрсүбүт хамаандаларын барыларын кыайбыт Н. Кронников капитаннаах киин куорат хамаандата бастаата. В. Кузьмин капитаннаах Амма хамаандата иккис, оонньуу хаачыстыбатынан баһыйтаран П. Гуляев капитаннаах Чурапчы хамаандата үһүс буоллулар. Бастыҥ быһааччынан Михаил Сергеев, бастыҥ туруорааччы Аркадий Пермяков, саамай бастыҥ оонньооччу Петр Гуляев, саамай саастаах аҕам Владимир Габышев анал бириистэринэн бэлиэтэннилэр.
2004 сыллаахтан С.И. Иванов көҕүлээһининэн балаһыанньата бигэргэнэн “СахаВА бочуоттаах маастара” диэн звание олохтонон турар. Манна кандидат сөптөөх таһымҥа оонньуурун таһынан араас тэрээһиннэргэ активнайдык кыттара учуоттанар. Бастакы кавалерынан Кириллин Афанасий Павлович буолан турар. Ол кэннэ барыта 118 киһи бу үрдүк аакка тигистэ. Онтон бу курэхтэһиигэ бары ирдэбиллэргэ сөп түбэһэр буолан, И.Р. Колесов, В.П. Кузьмин, М.С. Сергеев, С.А. Калмыков удостоверение уонна түөскэ кэтэр знак туттарылынна.
Түмүгэр сааһырбыт волейболистар дуоһуйа күрэхтэһэн, тирии мээчиги тиҥиргэччи охсон, бу кэрэ оонньуу бары хамсаныыларын бэйэлэригэр сөп түбэһэрдии оҥорон улаханнык астыннылар. Манна кыттыбыт оонньооччулар үксүлэрэ СахаВА тэриллиитигэр төһүү күүс буолбуттара. Оччолортон даҕаны үөһэттэн дук гыналларын кэтэспэккэ бэйэлэрэ сүбэлэһэн араас күрэхтэһиилэри тэрийэн кэллилэр.
Ветераннар үчүгэй күрэхтэһиини тэрийбитин иһин Иосиф Родионовичка улаханнык махтаннылар өссө биир кэдииһи ыллыбыт диэн улаханнык астыннылар. СахаВА тэргэһиннэригэр норуот күүһэ көмүөл күүһэ диэн этии адьас сөп түбэһэр.
Николай КРОННИКОВ,
күрэхтэһии кылаабынай судьуйата
