Састаап күүстээх буолла: сэттэ гроссмейстердар, биэс международнай маастардар, 21 спорт маастардара, онтон атыттара бары маастарга кандидаттар уонна бастакы разрядтаахтар оонньоотулар. Барыта 142 кыттааччы 81 уонна 61 оонньооччулардаах икки бөлөҕүнэн араарылыннылар. Турнир түмүгүнэн тренердэр ким-хайдах оонньообутунан көрөн ырытыылары оҥороллор, өрөспүүбүлүкэ дуобатын федерациятыгар отчуоттууллар, онон, эппиэтинэс улахан.
Кытаанах, тыҥааһыннаах киирсиилэр буоллулар. Бүтэһик партияларга диэри ким бастыыра, миэстэлэһэрэ биллибэт балаһыанньалара бүрүүкээн турдулар. Бүтүн Россиятааҕы категориялаах судьуйа Гаврил Петрович Винокуров сүрүн судьуйа быһыытынан үлэлээн, күрэхтэһии туох да мөккүөрэ, айдаана суох, сүрдээх бэрээдэктээхтик ааста.
Турнир түмүгүнэн, Гаврил Колесов бу да сырыыга саамай күүстээх дуобаччытын бигэргэттэ уонна Романовтар дьиэ-кэргэн туруорбут сүрүн бириистэринэн – убаһанан - биһирэннэ. Николай Никаноров иккис, Василий Кычкин үһүс миэстэлэннилэр. Николай Гуляев, Николай Гермогенов, Герман Стручков туһааннааҕынан төрдүс-бэһис-алтыс буолуталаатылар.
Иккис улахан бирииһи иккис бөлөххө, ветеран эр дьоҥҥо бастаабыт өрөспүүбүлүкэбит бастакы гроссмейстера Александр Азаров 25 тыһ. солкуобайдаах сертификаты тутта. Илья Васильев - иккис, Савва Аргунов үһүс бириистээх миэстэлэргэ тигистилэр. Геннадий Гурьев, Николай Саввинов төрдүс-бэһис үчүгэй көрдөрүүлэннилэр.
Хайа да кэмнээҕэр элбэх, өрөспүүбүлүкэҕэ биллэр дуобаччыт дьахталлар кэлэн оонньоотулар, баар кыахтарынан тургутустулар. Дьахталларга Наталья Шестакова, Ньургуйаана Азарова, Матрена Ноговицына, ветеран дьахталларга Чурапчыттан Анастасия Собакина бастаата, Дьокуускайтан Мария Бырдыннырова - иккис, Хаҥаластан Татьяна Андреева үһүс буолуталаатылар.
Кыргыттарга аан дойду таһымнаах дуобаччыттар, Ангелина Скрябина бастаата, Тунаара Федорова - иккис, Сандаара Апросимова үһүс миэстэлэри ылаттаатылар. Аан дойду чөмпүйүөҥкэтин Алена Большакованы үс иһигэр киллэрбэтилэр. Уолаттарга Чурапчыттан “буруолуу сылдьар” саҥа спорт маастара Архаан Титов, аан дойду икки төгүллээх чөмпүйүөнэ Анатоий Протодьяконов инники күөҥҥэ таҕыстылар. Саха Өрөспүүбүлүкэтин Ил Дархана Егор Афанасьевич Борисовы кытта дуобаттыан баҕа санаатын биллэрэ сылдьыбыт Айаал Бушуев үһүс миэстэлэнэн үөрдэ-көттө.
Турнир бу күннэргэ саҕаланар "64-х нуучча дуобатын" Россия чемпионатыгар бэлэмнэнии быһыытынан ааста. Саха сирин чиэһин көмүскүүргэ аан дойду уон биир төгүллээх чөмпүйүөнэ Гаврил Колесов, аан дойду түөрт төгүллээх чөмпүйүөнэ Николай Стручков, өрөспүүбүлүкэ чөмпүйүөнэрэ Николай Гермогенов, Матрена Ноговицына уонна Сунтаартан эдэр кэскиллээх дуобаччыт, ХИФУ студенката Ньургуйаана Уарова, Марина Старостина сүүмэрдэммит хамаандаҕа киллэрилиннилэр. Гаврил Петрович Винокуров бу Россия чемпионатыгар судьуйанан ыҥырылынна. Чемпионат кэмигэр буолар Россия дуобакка федерациятын президенин быыбардааһын конференциятыгар Гаврил Колесов, Николай Стручков, Матрена Ноговицына куоластыыр бырааптаах делегаттарынан кыттыахтара.
Ити курдук, сүрдээх интэриэһинэй, үчүгэй күрэхтэһии буолла, дуобаччыттар сүргэлэрэ сүрдээҕин өрө көтөҕүллэн өрөбүл күннэрин атаардылар.
Баһылай Посельскай
