Сэтинньи 1-5 күннэригэр Московскай уобалас Долгопруднай куоратыгар пауэрлифтиҥҥа XXIV Аан дойду чемпионатыгар биир дойдулаахпыт, Таатта нэһилиэгин пауэрлифтиҥҥа тренера Николай Иннокентьевич Матаннанов 65-70 саастаах ветераннарга аан дойду кыайыылаҕа буолла.
Бу чемпионакка путевканы быйыл саас Хабаровскайга ыытыллыбыт норуоттар икки ардыларынааҕы турнирга ылбыта. Билэрбит курдук, биһиги ветераннарбыт Сергей Никифоров (Эдьигээн) жимҥа, Антон Адамов (Хаҥалас) тягаҕа, Петр Баттахов (Ньурба) тягаҕа аан дойду кыайыылаҕа буолбуттара. Онтон Николай Иннокентьевич троеборьеҕа (жим, становай тяга, присед) сахалартан бастакы аан дойду чемпиона буолла.
Николай Иннокентьевич Матаннанов 1952 сыллаахха Дэбдиргэҕэ элбэх оҕолоох дьиэ кэргэҥҥэ күн сирин көрбүтэ. Оҕо сылдьан көҥүл тустуунан дьарыктаммыта. Улууска, республикаҕа миэстэлэспитэ. 1971 сыллаахха Ытык Күөл орто оскуолатын бүтэрбитэ. Оскуола кэнниттэн армияҕа сулууспалаабыта. Онно сылдьан көҥүл тустууга Дальнай Восток чемпионатыгар кыттыбыта. Армияттан кэлэн баран Уолбаҕа физкультура учууталынан үлэлээбитэ. Ол кэнниттэн Өлүөхүмэтээҕи тыа хаһаайыстыбатын техникумугар үөрэммитэ. Көҥүл тустууга орто үөрэхтэр ССРС чемпионатыгар, Казахскай ССР, Саха АССР чемпионаттарыгар кыттыбыта уонна ССРС спордун маастарыгар кандидат буолбута. Үөрэҕин бүтэрэн баран Ытык Күөл орто оскуолатыгар физкультура учууталынан үлэлээбитэ. Үлэлии сылдьан, Хабаровскайдааҕы государственнай физкультура институтун бүтэрбитэ. 1992-1998 сс. мас тардыһыытыгар общественнай тренерынан үлэлээбитэ. Элбэх маастары, спорт маастарыгар кандидаты ииппитэ. Мас тардыһыытыгар хамаанданан Саха сиригэр кыайбыттара. Республикатааҕы категориялаах судья буолбута. 1998-2001 сс. Дьокуускайдааҕы коммерческай колледжка физкультура преподавателинэн үлэлээбитэ. 2001 с. Таатта нэһилиэгэр КСК директорынан, 2002 с. пауэрлифтиҥҥа тренерынан күн бүгүҥҥэ диэри таһаарыылаахтык үлэлиир. Биир Российскай Федерация спордун маастарын, түөрт спорт маастарыгар кандидаты иитэн таһаарда. Ону тэҥэ «Взаимодоверие» кредитнэй тэрилтэ салайааччыта. Кэргэнинээнэх Любовь Николаевналыын үс оҕону иитэн таһаарбыттара, элбэх сиэн тапталлаах эһээтэ.
Гражданскай килбиэн, Саха Республикатыгар физическай культураҕа уонна спорка үтүөлэрин иһин элбэх бэлиэлэринэн, грамоталарынан наҕараадаламмыта. Быйыл Николай Иннокентьевич 65 сааһа. Эдэр дьоҥҥо, үүнэр көлүөнэҕэ холобур буолар спортсмен, тренер. Бэйэтигэр уонна чугас дьонугар доруобуйаны, дьолу-соргуну баҕарабыт.
Тааттатааҕы спорткомитет пресс-киинэ
