Бу бэлиэ түгэҥҥэ успуорду таптааччылар Алкивиад Иванов аатынан олимпийскай эрэллэри бэлэмниир оҕо спортивнай республиканскай оскуола манеһыгар муһуннулар. Физкультурник күнүнэн Арассыыйаҕа, улууска, республикаҕа, Арассыыйа тас дойдуларыгар ситиһиилээх спортсменнары таһаарбыт тириэньэрдэргэ, спортивнай оскуола үлэһиттэригэр, успуорт инструктордарыгар, бэтэрээн спортсменнарга улуус дьаһалтатын, успуорт отделын грамоталара, махтал суруктара туттарылыннылар. Ол таһынан олорон эрэ волейболга кыайыылаах Арассыыйа дьахталларын сүүмэрдэммит хамаандатын чилиэнин Алена Дмитриеваны чиэстээһин буолла.
Сунтаарга физкультурник күнүгэр биир умнуллубат түгэнинэн ааспыт ыйга Нидерландыга буолбут олорон эрэ волейболга кыайыылаах Арассыыйа дьахталларын сүүмэрдэммит хамаандатын чилиэнин Алена Дмитриеваны чиэстээһин буолла.
Алена бу үрдүк ситиһиитэ судургутук, чэпчэкитик кэлбэтэҕин бары билэбит. Кыыспыт олох эдэр сааһыгар ыарахан ыарыыны кыайан, олоххо дьулуурун көрдөрбүтэ. Санаата модунунан бары ыччакка холобур буолар. Үрдүк үөрэҕи бүтэрэн үлэһит буолан идэтинэн үлэлии сылдьыбыта. Ол быыһыгар олохтоох араадьыйаҕа диктор быһыытынан күн ахсын кини эфиргэ тахсар чааһын ыччат да эмэн да дьон кини наҕыл, истиҥ куолаһын истээри араадьыйаны манаһар кэмнэрбит баара. Ол кэннэ Бүлүү улууһун хаһыатыгар үлэлии сырыттаҕына доруобуйаларынан хааччахтаах дьоҥҥо бастакы спартакиада буолбутугар Сунтаартан хамаандаҕа киирэн, өрөспүүбүлүкэ спартакиадатыгар кыттыбыта. Манна Москваттан кэлэ сылдьар тириэньэр бэлиэтии көрөн Арассыыйа сүүмэрдэммит хамаандатыгар ыҥырбыта. Онон кыыспыт аны Арассыыйа хамаандатыгар киирэн күрэхтэһиилэргэ кыттар буолбута.
Алена дьаныардаахтык эрчиллэн, дьарыктанан маннык үрдук ситиһиигэ тахсыбытыгар бастакы тириэньэригэр Афанасий Жараевка истиҥник махтанар. Афанасий Жараев улууска адаптивнай успуорт тириэньэрэ.
Ааптар: Яина ВЛАСЬЕВА, газета "Сунтаар сонуннара"
