Үгэскэ кубулуйбут эстэпиэтэҕэ 2014 сыллаахтан киллэриллибит фитнес-аэробика саҥа сүүрээнигэр улуус бары нэһилиэктэрин ыччаттара көхтөөхтүк кытталлар.
Мэҥэ Хаҥаласка фитнес-аэробика күрэхтэһиитэ буолла. Бу сырыыга 28 нэһилиэк кыргыттара уонна уолаттара күөн көрсүстүлэр. Эрчимнээх эдэр сааһы уруйдуур успуорт бырааһынньыгар кыттааччылар ох курдук оҥостон кэлбиттэрэ параадтан билиннэ. Өрөспүүбүлүкэтээҕи фитнес-аэробика федерациятын дириэктэрэ, бу көрүҥҥэ өрөспүүбүлүкэ кылаабынай судьуйата Лилия Дмитриева дьүүллүүр сүбэ бэрэссэдээтэлинэн үлэлээтэ: «Фитнес-аэробика көрүҥүн сыллата сайыннаран иһэргитинэн махталбын этэбин. Өссө да маннык көхтөөхтүк кыттыҥ, эрчимҥитин, тэтимҥитин күүһүрдэн иһиҥ!», ‒ диэн баҕа санаатын тиэртэ.
Кыттааччылары улуус баһылыгын социальнай боппуруостарга солбуйааччы, олимпиец-спортсмен Леонид Спиридонов, «Майа сэлиэнньэтэ» МТ баһылыга Дмитрий Тихонов уонна улуустааҕы фитнес-аэробика федерациятын бэрэссэдээтэлэ Дария Назарова эҕэрдэлээтилэр.
Нэһилиэктэргэ үс бөлөҕүнэн уонна Майа сэлиэнньэтин тэрилтэлэринэн арахсан бииртэн биир хатыламмат чаҕылхай нүөмэрдэри көрдөрдүлэр. Ыччаттар биир тэҥник хайдах хамсаналларын, имигэстэрин, тэтимнэрин, күүстэрин, кыахтарын Дьокуускай куораттан анаан-минээн кэлбит сэттэ киһи дьүүллээтэ. Хамаандалар бука бары дьэрэкээн көстүүмнэри тиктэрэн, сылтан сыл аайы уобарастара тупсан иһэр.
Күрэхтэһии түмүгүнэн кыра нэһилиэктэргэ, ол эбэтэр үһүс бөлөххө Матта бастакы, Томтор иккис, Моорук үһүс буоллулар. Орто ахсааннаах нэһилиэктэргэ, иккис бөлөххө Чүүйэ, Сыымах, Мэлдьэхси хамаандалара миэстэлэстилэр. Улахан нэһилиэктэргэ бастакы бөлөххө хорообуттар иннилэрин биэрбэтилэр, харалар иккис, павловскайдар үһүс буоллулар. Майа тэрилтэлэригэр В.П. Ларионов аатынан оскуола бөлөҕүн ыччаттара кыайдылар, И.Г. Тимофеев аатынан Майатааҕы лиссиэй хамаандата иккис уонна улуустааҕы киин балыыһа үһүс миэстэҕэ тигистилэр.
Виктория БЕЛОЛЮБСКАЯ, Газета «Эркээйи экспресс»
