Н.С.Захаров-Сахаачча аатынан Амматааҕы оҕо спордун оскуолатын иитиллээччилэрэ Ваня Павлов уонна Артем Винокуров Еврейскэй автономнай уокурук Биробиджан куоратыгар ыытыллыбыт Бүтүн Арассыыйатааҕы аһаҕас турнирга чөмпүйүөн үрдүк аатын сүктүлэр.
Амма 1N-дээх орто оскуолатын 3б кылааһын үөрэнээччитэ Ваня Павлов 35 киилэҕэ уонна 6б кылааһын үөрэнээччитэ Артем Винокуров 48 киилэ ыйааһыннарга ыам ыйын бастакы күннэригэр Еврейскэй автономнай уокурук Биробиджан куоратыгар ыытыллыбыт Бүтүн Арассыыйатааҕы аһаҕас турнирга чөмпүйүөн үрдүк аатын ыллылар.
Манна Арассыыйа элбэх уокуруктарыттан 283 бөҕөс күөн көрүстүлэр. Аһаҕас турнирга Саха сириттэн Уус Алдантан, Хаҥаластан, Мэҥэ Хаҥаластан күүстээх тустууктар эмиэ ситиһиилээхтик киирсэннэр Саха сирин дьоһуннаахтык ааттаттылар.
"Амматтан алта эдэр бөҕөс кыттыбытыттан икки уолбут улахан күрэхтэһиигэ өрөгөй үөрүүтүн биллилэр. Атыттарга бу турнир эһиил буолуохтаах Уһук Илин уокуругар бастыыр иһин күрэхтэһиигэ тургутуу, уопут, тирэх уонна инникигэ эрэл курдук буолла. Көмө буолбут төрөппүттэрбитигэр, куруук көмөлөһөр спонсорбытыгар Людмила Еремеевна Куприяноваҕа төрөппүттэр уонна оҕо спордун оскуолатын салалтатын, тренердэр ааттарыттан барҕа махталбытын тириэрдэбит.
Билигин былааммыт элбэх. Салгыы олимпийскай чөмпүйүөн Павел Пинигин бирииһигэр ыытыллыахтаах норуоттар икки ардыларынааҕы турнирга бэлэмнэнэбит. Бу күрэхтэһиигэ Амматтан элбэх оҕо киирсиэҕэ, онон үчүгэй тустууну көрдөрүөхпүт диэн бигэ эрэллээхпит. Сотору дьарыктар, лааҕыр үлэтэ күүтүллэр. Атырдьах ыйыгар Дагестаҥҥа дьарыкпытын былаанныыбыт", - диэн санаатын үллэстэр тренер Степан Скрябин.
