Геннадий Васильевич уонна Олег Геннадьевич Гребневтэр сырдык кэриэстэригэр, 2002-2004 сс.т. уонна 2005-2007 сс төрөөбүт уолаттарга көҥүл тустууга өрөспүүбүлүкэтээҕи турнир көбүөрэ, кулун тутар 16-17 күннэригэр «Якутцемент» ПХ АУо бирииһигэр, Покровскайга V –c төгүлүн тэлгэннэ. Турнир кылаабынай судьуйатынан Г.Д.Дмитриев, сэкирэтээринэн И.А.Алексеев үлэлээтилэр. Быйылгы сылтан бу турнир саамай сүрүн спонсорынан Мамедов Алиш Забид Оглы управляющай дириэктэрдээх «Якутцемент» ПХ АУо буолла.
- Аҕам Геннадий Васильевич уонна убайым Олег Геннадьевич норуот дьонноро этилэр. Кинилэр оройуоммутугар тустуу, уопсайынан спорт сайдыытын туһугар олус ыалдьаллара. Өссө убайым Олег баар эрдэҕинэ бу күрэхтэһии кыра уонна улаатан эрэр уолаттарга ыытылларыгар сыал-сорук туруоруммуппут. Тоҕо диэтэххэ, бу манна кыттыбыт оҕолор улаатан иһиэхтэрэ, ситиһиилээх буолуохтара. Ол да курдук буолар, сүрүн бирииһи матассыыкылы ылбыт уолаттар Алеша Копылов, Ваня Оконешников бэйэлэрин саастыылаахтарын ортолоругар Аан дойду чөмпүйүөннэрэ, онтон биир дойдулаахпыт Данил Иванов быйыл Россияҕа бастыыр иһин күрэхтэһиигэ 92 кг үһүс миэстэни ылбыта, боруонса мэтээли түөһүгэр кэппитэ.Турнирбыт сыллата кыаҕын ыллар ылан иһэр, ол курдук ыраах хоту улуустартан Өймөкөөнтөн, Аллайыахаттан, Муоматтан, Усуйаанаттан тиийэ кэллилэр. Күрэхтэһиибит бастакы күнүгэр СӨ көҥүл тустууга уолаттарга ыстаарсай тириэнньэрэ П.С.Иванов кэлэн кыттыыны ылбыта. Биһиги дьиэ кэргэн турнир сүрүн спонсорыгар А.З.Мамедовка, Покровскай к. мэригэр П.П.Гермогеновка, спорт дыбарыаһын дириэктэригэр О.И.Ивановка олус улаханнык махтанабыт,- диэн өйөбүл буолбут дьонугар махталын уонна үтүө санаатын тиэртэ турнир сүрүн тэрийээччитэ Сергей Гребнев.
Покровскай куорат спортка дыбарыаһыгар икки сабыс-саҥа көбүөргэ кырачаан тустууктартан саҕалаан, улаатан эрэр уолаттарга тиийэ тустан күөрчэхтии ытыллаллар. Көбүөр кытыытыгар олорон тириэнньэрдэр бөҕөстөрүгэр сүбэ-ама быыстала суох биэрэллэр. Мин, Дьокуускай к. 3-с №-дээх Оҕо спортивнай оскуолатын тириэнньэрин, норуоттар икки ардыларынааҕы кылаастаах РФ спордун маастарын, Россия чөмпүйүөнүн уонна призерун, Москва куорат уонна элбэх норуоттар икки ардыларынааҕы күрэхтэһиилэр кыайыылаахтарын Н.Г.Яковлевы көрүстүм: - Быйылгы турнирга 13 оҕону аҕаллым, онтон биир уолум бастаата, үс уолум үһүс уонна түөрт оҕом үһүс бириистээх миэстэҕэ тигистилэр. Дьокуускай куоракка, 3-с №-дээх Оҕо спортивнай оскуолаҕа уопсайа 100-тэн тахса оҕо эрчиллиигэ сылдьар. Сарсыарда аҕыс аҥаартан уонна күнүс үс чаастан дьарыктыыбыт. Мин алын сүһүөх кылаас оҕолоругар И.С.Кочкинныын тириэнньэринэн үлэлиибин. Оҕолор тустууларын тириэнньэр хараҕынан сыныйан олорон көрөбүн, бу Хаҥалас улууһугар элбэх тустуохтара дии саныыр оҕолорум бааллар. Оҕо ситиһиилээх киһи буоларыгар төрөппүт уонна тириэнньэр бииргэ үлэлиир буоллахтарына түмүк баар буолар. Биһиги тустуу мындырдарыгар эрэ үөрэппэппит иитиини эмиэ биэрэбит,- диэтэ оҕо тустууктар ситэн-сириэдийэн тахсыыларыгар саамай баай уопутун иҥэрэ сылдьар Николай Григорьевич.
Дьэ икки күннээх, күүстээх күрэхтэһиигэ чөмпүйүөн үрдүк аатын ылар иһин киирсиигэ, турнир саамай кыра 28 кг ыйааһыннаах тустууктарга, Уус Алдантан Олег Княжев кинини утары Дьокуускай куораттан, 3-с №-дээх Оҕо спортивнай оскуолатыттан Эрчим Жирков тахсаллар. Тустуу саҕаланар, 16 бөҕөс тустубут ыйааһыныгар тэҥ хапсыһыыга Олег атахтаан, бурҕалдьылыы кэтэн быраҕан «мельницалаан», салгыы кыптыыйдааһын диэн албаһы «турецкай ножницаны» оҥоро сатаата. Аҥаардастыы бааллары хомуйан Олег Княжев бастаата. Онтон иккис буолбут Эрчим хотторуу хомолтотуттан кыһыйан, уһуйааччытын иннигэр ньилбэгэр умса түһэн олорон хараҕын уутун сотунна...
Кыра саастаах уолаттарга иккис ыйааһын 30 кг, манна сэттэ үүнэн иһэр тустуук күөн көрсөн ааспыта. Бастыыр иһин тустууга Дьокуускайтан Юра Винокуров уонна Хаҥаластан Ярик Осипов киирэллэр. Биһиги киһибит Ярик бэрт ньымсатык утарсааччытын икки атаҕар киирэн, сиһигэр көһөн наадалаах бааллары ылла. Салгыы, атаҕын кыаһылаан «кириэс» диэн албаһынан икки баалга эргиттэ. Туран тустууга, утарсааччытын илиитигэр эриллэн “вертушкалаан” ыраас тиэхинньиичэскэй кыайыыны ситистэ, биир дойдулаахтарыгар бастакы кыһыл көмүс мэтээли аҕалла.
32 кг ыйааһыннаах кыра боотурдар Уус Алдантан Тимур Портнягин, кинини утары муннуктан биһиги уолбут, эрэлбит Дьулус Петров дьулусханнык түһүлгэҕэ киирэллэр. Уолаттар кэтэсиһэн-манасыһан турбаттар, тустан тилигирэтиһэн иһэллэр. Ол да буоллар, судьуйалар арыый көҕө суохтарга сэрэтии биэрэн кымньыылаан иһэллэр. Утарсааччыбыт ыксыыр, ыгыллар, көрөөччүлэр да оҕолор да сүбэлээн ыһыы-хаһыы бөҕөнү түһэрэллэр, тустуу сытыырхайар. Иккис түһүмэххэ, биһиги уолбут Дьулус утарсааччытын икки атахха киирэн түҥнэри көтөн түөрт баалга түһэрдэ. Салгыы тустууга, икки өттүттэн утары –таары албас арааһын оҥороннор тэҥ тустууга Дьулус тулуй, кыай диэннэр уолбут дьоһуннаах кыайыыны ситистэ, чөмпүйүөннээтэ.
35 кг ыйааһыннаахтарга Намтан Айысхан Охлопков, кинини утары хаҥыл Хаҥаластан Арсен Кондратьев түһүлгэҕэ тахсаллар. Бу хапсыһыыга тэҥ тустууга баһыйан, 16 бөҕөс тустубут ыйааһыныгар чөмпүйүөн аатын биир дойдулаахпыт Арсен Кондратьев ылла!
38 кг манна 11 бөҕөс тустубута, финалга Дима Баишев Намтан уонна кинини утары Ытык Хаҥаластан Арсен Кононов тахсар. Дьэ ким кыайар?! ыалдьааччылар хаһыы-ыһыы, уолаттар иккиэн да кыайыыга дьулуурдара, баҕалара олус. Бу киирсиигэ дьолуота таайан, дьарыга үчүгэй буолан Арсен кыайда, ыйааһыныгар бастаата.
42 кг ыйааһыннаах уолаттарга, уон ордугуна алта үүнэн иһэр бөҕөс күөн көрсүбүтэ. Манна, Мэҥэ Хаҥаластан Витя Робкин, кинини утары Намтан Айтал Ширяев киирэр. Бу түгэҥҥэ Айтал атахха киллэттэрэн баран, утары хамсанан түһүлгэҕэ ыраастык түһэрэн кыайыылаах буолла. Хаҥаластар бу ыйааһыҥҥа миэстэлэспэтибит.
50 кг диэри ыйааһыннаах бөҕөстөргө үһүс миэстэни биһиги уолбут Руслан Петров ылары ситистэ. Чөмпүйүөн үрдүк аатын ылар иһин тустууга биһиги улууспутуттан Алеша Петров киирэр, кинини утары Чурапчы чулуута Арсен Халгаев тахсар. Кыра саастаахтар түһүлгэлэригэр 50 кг ыйааһыннаахтарга толуу көрүҥнээх тоҕус уол тустубута. Манна, Арсен Халгаев кыайан кыһыл көмүс мэтээли Чурапчыга илдьэ барда.
Орто саастаах 2002-2004 сыллаах төрүөх уолаттар тустуулара 38 кг ыйааһыннаах бөҕөстөртөн саҕаламмыта. Бу ыйааһыҥҥа 13 бөҕөс күрэхтэһиини саҕалаабыта, сиидэлэнэн – сиидэлэнэн бэртэр бастакы миэстэни быһаарса тахсаллар. Нам улууһун ааттааҕа Семен Охлопков, биһиги уолбутун Петя Адамовы утары киирэр. Атахтаан, онтон да атын албастарынан охтортоон, олимпийскай чөмпүйүөн Павел Пинигин бирииһин икки төгүллээх кыайыылааҕа, кэскиллээх тустуукпут Петя Адамов эрэллээхтик кыайда уонна бастаата.
42 кг ыйааһыннаах уолаттарга тоҕус тустуук уолаттар кэлбиттэр этэ. Манна букатын кыра эрдэхтэриттэн, Хачыкааттан саҕалаан эрбии биитин курдук, эрийсэр уолаттарбыт Кирилл Дорожкин уонна Родион Васильев чөмпүйүөн үрдүк аатын ылар киирсиигэ тахсаллар. Икки өттүттэн бэрт сэрэхтээхтик тустаннар, бу сырыыга Кирилл Дорожкин кыайда, кыһыл көмүс мэтээли иилиннэ. Уолаттар аҕалара Алексей Дорожкин уонна Николай Васильев туйах хатарааччыларын диэкки сымнаҕастык көрөн турдулар.
46 кг ыйааһыннаах бөҕөстөргө Покровскай уола, билигин Уус Алдан Оҕо спортивнай оскуолатыгар салгыы эрчиллэ сылдьар уолбут үһүс миэстэ буолла. Бастыыр иһин тустууга ыраах уонна тымныы Өймөкөөнтөн Григорий Стручков, кинини утары Дьокуускай куораттан, 3-с №-дээх Оҕо спортивнай оскуолатыттан Сергей Собакин күөх муннуктан тахсар. Тустууну көрдөөн тустар, араас албастары оҥорор өрөспүүбүлүкэ чөмпүйүөнэ “турецкай ножницаны” кыптыыйдааһыны оҥорон, утарсааччытын саннын икки лаппаакытын түһүлгэҕэ сыһыаран Сергей Собакин ыраас кыайыыны ситистэ.
50 кг ыйааһын, финалга Красноярскай кыраайтан сылдьар, Дьэһиэй сахата Вася Осогостох Уус Алдантан, кинини утары Хаҥаластан Будимир Афанасьев киирэр. Сытыы киирсиигэ, биир түгэҥҥэ Вася 5 баалга быраҕан кыраһыабай тустууну көрдөрдө. Икки өттүттэн бэрт сытыы хамсаныылардаах тустуу буолла уонна баалынан чорбойон Вася Осогостох чөмпүйүөннээтэ, кыһыл көмүс мэтээли Уус Алдаҥҥа илдьэ барда.
54 кг .Бу ыйааһыҥҥа финалга иккиэн Хаҥалас улууһуттан төрүттээх уолаттар, Уус Алдан Оҕо спортивнай оскуолатын иитиллээччитэ Дима Яковлев уонна Алеша Пахомов тахсаллар. Бу сырыыга Дима Яковлев кыайыылаах үрдүк аатын ылла.
69 кг ыйааһыннаах уолаттарга аҕыс уол тустубуттара, финалга Дьокуускай куорат 3-с уонна 5-с №-дээх спортивнай оскуолаларын иитиллээччилэрэ Айсен Жирков уонна Валера Мандаров күөн көрүстүлэр. Бу уолаттар албастары олус бэркэ оҥороллор эбит. Бу сырыыга Валера Мандаров кыайда, ыйааһыныгар бастаата.
Саамай улахан ыйааһыннаах уолаттарга, түөрт Хаҥалас тустууга оскуолатын иитиллээччилэрэ тустубуттара. Манна туох да мөккүөрэ, улахан утарсыыта суох Данил Иванов бастаата.
Г.В. уонна О.Г.Гребневтэр спортивнай олохторун үйэтитэр турнир сүрүн бирииһин, «Минскэй» матассыыкылы С.Г.Гребнев бииргэ төрөөбүт убайдарын дьиэ кэргэттэрин кытта сүбэлэһэн баран, олус долгутуулаах түгэҥҥэ, «Көҥүл тустууга Аан дойду чөмпүйүөнэ буолаар» диэн баҕа санаатын тиэрдэн туран, Улахан Аантан төрүттээх, Уус Алдан улууһун Оҕо спортивнай оскуолатын иитиллээччитигэр Дима Яковлевка туттарда. Дима кылгастык үөрүүтүн үллэһиннэ: - Мин олус соһуйдум, маннык улахан сүрүн бириискэ тиксиэм дии санаабатаҕым. Бэйэм ыйааһыммар 54 кг тустан бастаабытым. Көҥүл тустуунан үһүс кылаастан эрчиллэбин. Билигин Уус Алдан Оҕо спортивнай оскуолатын филиалыгар эрчиллэбин, Мындаабаҕа VII кылааска үөрэнэбин. Муус устар 6 күнүгэр Уһук Илиҥҥи эрэгийиэҥҥэ күрэхтэһиигэ барыахтаахпын, онно үчүгэйдик бэлэмнэнэбин. Инникитин өссө күүскэ эрчиллиэм диэн бэйэбэр эрэллээхпин,- диэтэ Дима бэрт сэмэйдик. Хаҥалас кырачаан хотойо, бу турниртан кынат үүннэринэн, көҥүл тустуу барахсан Аан дойду араас түһүлгэлэригэр, спорт үрдүктэн үрдүкү чыпчаалларыгар дабайа, далааһыннаахтык көтө тураар!
Быйыл ыытыллыбыт турнирга 16 улуустан 20 хамаанда, ол иһигэр 154 кыра уонна орто саастаах бөҕөстөр кыттыбыт, икки күннээх чаҕылҕанныы хамсаныылардаах, кыраһыабай бырахсыылардаах, элбэх албастардаах тустуулар кэннилэриттэн, сырдык дьоммут Геннадий Васильевич уонна Олег Геннадьевич спортка суолларын салгыыр уолаттар тахсан эрэллэрэ арылхайдык көһүннэ.
Уйбаан УЙГУУРАП,
Степан САВВИН хаартыскаҕа түһэриитэ.
Чөмпүйүөннэр уонна призердар
2005-2007 с.т. уолаттар
28 кг (16 тустуук)
1 миэстэ – Княжев Олег, (Уус Алдан улууһа)
2 миэстэ – Жирков Эрчим, (Дьокуускай к. 3-с №-дээх Оҕо спортивнай оскуолата)
3 миэстэ – Халгаев Уйусхан, (Дьокуускай к. 3-с №-дээх Оҕо спортивнай оскуолата)
3 миэстэ – Оконушкин Альберт, (Хатас)
30 кг (7 тустуук)
1 миэстэ – Осипов Ярик, (Хаҥалас улууһа)
2 миэстэ – Винокуров Юрий, (Дьокуускай к.)
3 миэстэ – Насыев Айаал, ( Усуйаана улууһа)
3 миэстэ – Андреев Роберт, (Хатас)
32 кг (13 тустуук)
1 миэстэ – Петров Дьулус, (Хаҥалас улууһа)
2 миэстэ – Портнягин Тимур, (Уус Алдан улууһа)
3 миэстэ – Григорьев Максим, ( Уус Алдан улууһа)
3 миэстэ – Явловский Эдик, (Хаҥалас улууһа)
35 кг (16 тустуук)
1 миэстэ – Кондратьев Арсен, (Хаҥалас улууһа)
2 миэстэ – Охлопков Айысхан, (Нам улууһа)
3 миэстэ – Иринеев Боря, (Дьокуускай к. 3-с №-дээх Оҕо спортивнай оскуолата)
3 миэстэ – Львов Артем, (Хаҥалас улууһа)
38 кг (11 тустуук)
1 миэстэ – Кононов Арсен, (Хаҥалас улууһа)
2 миэстэ – Баишев Дима, (Нам улууһа)
3 миэстэ – Колесников Валентин, (Усуйаана улууһа)
3 миэстэ – Леонтьев Эрэл, (Горнай улууһа)
42 кг (16 тустуук)
1 миэстэ – Ширяев Айтал, (Нам улууһа)
2 миэстэ – Робкин Витя, (Мэҥэ Хаҥалас улууһа)
3 миэстэ – Уваровскай Толя, (Аллайыаха улууһа)
3 миэстэ – Гоголев Дьулустан, (Уус Алдан улууһа)
50 кг (9 тустуук)
1 миэстэ – Халгаев Арсен, (Чурапчы улууһа)
2 миэстэ – Петров Алеша, (Хаҥалас улууһа)
3 миэстэ – Петров Руслан, (Хаҥалас улууһа)
3 миэстэ – Пахомов Роман, (Горнай улууһа)
2002-2004 с.т. уолаттар
38 кг (13 тустуук)
1 миэстэ – Адамов Петя, (Хаҥалас улууһа)
2 миэстэ – Охлопков Семен, (Нам улууһа)
3 миэстэ – Заболоцкай Коля, (Уус Алдан улууһа)
3 миэстэ – Федотов Егор (Дьокуускай к. 5-с №-дээх Оҕо спортивнай оскуолата)
42 кг (9 тустуук)
1 миэстэ – Дорожкин Кирилл, (Хаҥалас улууһа)
2 миэстэ – Васильев Родион, (Хаҥалас улууһа)
3 миэстэ – Неустроев Феликс, ( Өймөкөөн улууһа)
3 миэстэ – Егоров Азомат, (Горнай улууһа)
46 кг (12 тустуук)
1 миэстэ – Собакин Сергей, (Дьокуускай к. 3-с №-дээх Оҕо спортивнай оскуолата)
2 миэстэ – Стручков Григорий, (Өймөкөөн улууһа)
3 миэстэ – Иванов Саша, (Нам улууһа)
3 миэстэ – Захаров Вова, (Хаҥалас-Уус Алдан улууһа)
50 кг (9 тустуук)
1 миэстэ – Осогостох Вася, (Уус Алдан улууһа)
2 миэстэ – Афанасьев Будимир, (Хаҥалас улууһа)
3 миэстэ – Атласов Никита, (Өймөкөөн улууһа)
3 миэстэ – Шестаков Стас, (Мэҥэ Хаҥалас улууһа)
54 кг (11 тустуук)
1 миэстэ – Яковлев Дима, (Хаҥалас – Уус Алдан улууһа)
2 миэстэ – Пахомов Алеша, (Хаҥалас улууһа)
3 миэстэ – Яковлев Яков, (Дьокуускай к. 3-с №-дээх Оҕо спортивнай оскуолата)
3 миэстэ – Забара Богда, (Аллайыаха улууһа)
69 кг (8 тустуук)
1 миэстэ – Мандаров Валера, (Дьокуускай к. 5-с №-дээх Оҕо спортивнай оскуолата)
2 миэстэ – Жирков Айсен, (Дьокуускай к. 3-с №-дээх Оҕо спортивнай оскуолата)
3 миэстэ – Максимов Алеша, (Дьокуускай к. 3-с №-дээх Оҕо спортивнай оскуолата)
3 миэстэ – Сазонов Ньургун, (Орто Халыма улууһа)
92 кг (4 тустуук)
1 миэстэ – Иванов Данил, (Хаҥалас улууһа)
2 миэстэ – Старостин Руслан, (Хаҥалас улууһа)
3 миэстэ – Попов Кирилл, (Хаҥалас улууһа)
3 миэстэ – Федоров Уйгун, (Хаҥалас улууһа)
